ՀԱՅԱՍՏԱՆ ՍՏԱՆՁՆԵՑ ՍԵՒԾՈՎԵԱՆ ՏՆՏԵՍԱԿԱՆ ՀԱՄԱԳՈՐԾԱԿՑՈՒԹԵԱՆ ՆԱԽԱԳԱՀՈՒԹԻՒՆԸ

0
121

Օտեսայի մէջ տեղի ունեցաւ Սեւծովեան տնտեսական համագործակցութեան (ՍԾՏՀ) կազմակերպութեան անդամ երկիրներու արտաքին գործոց նախարարներու խորհուրդի 28-րդ հանդիպումը, որուն ընթացքին Հայաստանի արտաքին գործոց նախարար Էտուարտ Նալպանտեան վեց ամսուան ժամկէտով՝ մինչեւ այս տարուան 31 Դեկտեմբերը, ստանձնեց կազմակերպութեան նախագահութիւնը: Այս առիթով արտասանած իր խօսքին մէջ նախարարը նշեց, որ ՍԾՏՀ կազմակերպութիւնը կը թեւակոխէ իր գործունէութեան 22-րդ տարին՝ տնտեսական համագործակցութեան նոր օրակարգով:
Նախարար Նալպանտեան արձանագրեց, որ Հայաստան աշխոյժ քայլերու պիտի դիմէ՝ կազմակերպութեան նոր օրակարգը կեանքի կոչելու եւ տարածաշրջանին մէջ փոխշահաւէտ համագործակցութիւնը խթանելու նպատակով:
Հայաստան նախաձեռնած է տարածաշրջանային տեղեկատուական արհեստագիտութեան զարգացման համար կարեւորութիւն ունեցող «Արհեստագիտութիւններու հաղորդակցման համացանց» ստեղծելու վերաբերեալ հայկական նախագիծի երկրորդ հանգրուանի: Նախապատրաստական աշխատանքները կը շարունակուին ՍԾՏՀ տեղեկատուական արհեստագիտութիւններու միութիւն հիմնադրելու ուղղութեամբ:
Ստանձնելով ՍԾՏՀ նախագահութիւնը՝ նախարար Նալպանտեան շեշտեց, որ Հայաստանը մեծ կարեւորութիւն կու տայ սեւծովեան տարածաշրջանին մէջ տնտեսական համագործակցութեան խթանման ուղղութեամբ յաւելեալ ջանքերու ներդրման, կազմակերպութեան գործունէութեան արդիւնաւէտութեան բարձրացման եւ միջազգային բեմահարթակին վրայ անոր հեղինակութեան ամրապնդման:
Նախարարը կարեւոր նկատեց  միջազգային կազմակերպութիւններու, ՍԾՏՀ յարակից մարմիններու, դիտորդներու եւ բնագաւառային երկխօսութեան գործընկերներու հետ համագործակցութեան զարգացման, կազմակերպութեան քարտուղարութեան բարեփոխումներու եւ հաւասար ներկայացուածութեան սկզբունքի կիրառման անհրաժեշտութիւնը: Հանդիպման աւարտին ՍԾՏՀ արտաքին գործոց նախարարները ընդունած են կազմակերպութեան գործունէութեան առնչուող կարգ մը որոշումներ:

 

LEAVE A REPLY

Please enter your comment!
Please enter your name here