ԴԱՏԱՊԱՐՏՈՒՄԻ ԱԼԻՔՆԵՐ

0
125

Հանրապետութեան նախագահ Միշէլ Սըլէյման դատապարտեց  բաանկին դէմ  կատարուած  ոտնձգութիւնը եւ  ըսաւ, թէ  Լիբանան պիտի  չդառնայ  ներհամայնքային  պատերազմի  թատերաբեմ:

Նորանշանակ  վարչապետ  Թամամ Սալամ բոլոր կողմերէն պահանջեց  զօրավիգ կենալ  լիբանանեան բանակին:

Խորհրդարանի նախագահ Նեպիհ Պըրրի   յայտնեց, թէ բանակին իրաւունքն է  կատարել յարմարագոյնը՝ յանուն   երկրի պաշտպանութեան:

Խորհրդարանի  փոխնախագահ  Ֆարիտ Մաքարի  բանակէն  պահանջեց առանց վարանելու վերջ դնել Ասիրի երեւոյթին, մերժելով   համաձայնական բոլոր  միջնորդութիւնները:

Հրաժարեալ ներքին գործոց նախարար Մարուան Շերպէլ բանակէն պահանջեց վճռական  ըլլալ նախայարձակներուն դէմ:

Մարտ 14-ի ուժերու ընդհանուր  քարտուղարութեան համադրող Ֆարէս Սուէյտ դատապարտեց Սայտայի   միջադէպը, շեշտելով որ   բանակին  վրայ գործուած  յարձակումը անարդարանալի է,  ինչ որ ալ ըլլան անոր  պատճառները:

Հրաժարեալ  վարչապետ  Նեժիպ  Միքաթի  դատապարտեց բանակին դէմ կատարուած  յարձակումը եւ իմաստութեան կոչ ուղղեց  քաղաքական բոլոր կողմերուն:Միքաթի, այսօր՝ Երեքշաբթի՝ Ազգային Սուգ  յայտարարեց,  ի յիշատակ  լիբանանեան բանակի նահատակներուն:

Հանրապետութեան  միւֆթի շէյխ Մուհամմէտ Ռաշիտ Քապպանի դատապարտեց  բանակին դէմ կատարուած յարձակումը եւ կտրականապէս մերժեց բանակը   լքելու վերաբերեալ սիւննի ծառայողներուն ուղղուած կոչը:

Նախկին վարչապետ Սալիմ Հոս  պահանջեց  վերջ դնել  Լիբանանը եւ անոր քաղաքացիներուն  անվտանգութիւնը  հարուածող  ուժերուն:

Երեսփոխան  Պահիա  Հարիրի դատապարտեց Սայտայի մէջ ապօրէն զէնքի առկայութիւնը: «Պետութեան զէնքէն բացի որեւէ զէնք դատապարտելի է», յայտնեց ան: Հարիրի  դատապարտեց բանակին դէմ կատարուած  յարձակումը,  նշելով որ  Սայտայի  միջադէպը կը  միտի  քանդել  քաղաքը  եւ անոր  բնակիչներուն միջեւ համակեցութիւնը:   

Նախկին վարչապետ Սաատ Հարիրի  յայտարարեց, թէ Հըզպալլան  է Սայտայի   դէպքերուն պատճառը:

Մարոնիներու  Պշարա Ռայի  գարտինալը դատապարտեց   բանակին վրայ գործադրուած յարձակումը, միաժամանակ  դատապարտելով  նմանօրինակ  ոճիրներու քաղաքական հովանոց  ծառայող   անձնաւորութիւնները :

Երեսփոխան Սամի Ճեմայէլ  իշխանութիւններէն պահանջեց քաղաքականապէս թիկունք կենալ  բանակին,  կանաչ լոյս տալ անոր, որպէսզի   կատարէ իր ազգային պարտականութիւնը:

Լիբանանեան Ուժեր կուսակցութիւնը իր զօրակցութիւնը յայտնեց  բանակին, բոլոր անոնց դէմ որոնք կը  փորձեն  հարուածել երկրին ապահովութիւնը եւ կայունութիւնը:

Ընկերվար Յառաջդիմական կուսակցութեան  պետ Ուալիտ Ճոմպլաթ դատապարտեց բանակին վրայ կատարուած յարձակումը եւ պահանջեց  վերջ դնել  շէյխ Ասիրի երեւոյթին: Ան դարձեալ զգուշացուց Սուրիոյ հակամարտութիւնը  Լիբանան փոխադրելու  փորձերէն: Ճոմպլաթ  դատապարտեց բանակին  դէմ կատարուած  յարձակումը  եւ գիտակցութեան կոչ ուղղեց  բոլոր կողմերուն: «Կ’աշխատիմ  Սաատ Հարիրիի, Նեպիհ Պըրրիի եւ Հըզպալլայի հետ երկիրը դուրս բերելու  կառավարական պարապութենէն» ըսաւ Ճոմպլաթ:

Պաղեստինեան  Իշխանութեան նախագահ Մահմուտ Ապպաս դատապարտեց  լիբանանեան բաանկի դէմ բարձրացած պաղեստինեան  զէնքը,  զգուշացնելով, որ.« զէնքի  գործածութիւնը, որեւէ պայմանի տակ՝ արգիլուած է  Լիբանանի մէջ»:

LEAVE A REPLY

Please enter your comment!
Please enter your name here