ՄԻՏՈՒՄՆԱՒՈՐ ԵՒ ՍԱՌՆԱՍՐՏՕՐԷՆ ԳՈՐԾԱԴՐՈՒԱԾ ՈՃԻՐՆԵՐ

0
132

Լիբանանեան բանակը  հրապարակեց  հաղորդագրութիւն մը, որուն  մէջ  կը  դատապարտէր բանակայիններուն դէմ միտումնաւոր եւ   սառնասրտօրէն  գործադրուած    ոճիրները, ընդգծելով, թէ անոնք   թշնամիի փամփուշտով  չէին կատարուած, այլ  լիբանանեան խմբաւորումներէ՝  Սայտայի  մէջ գրգռութիւններ ստեղծելու եւ  Լիբանանը    1975-ի  իրավիճակին վերադարձնելու նպատակով: Բանակը հաղորդագրութեան մէջ   կը  շեշտէր, թէ  զինուորական գործողութիւնները պիտի շարունակուին  մինչեւ  իրենց աւարտը՝ զինեալ երեւոյթներու վերացումը:  Լիբանանեան բանակը  պաշարեց   Պիլալ Պըմ Ռապահ  մզկիթը, ուր  թաքնուած էր  Ասիրը:  Բուռն բախումներ տեղի ունեցան մզկիթին մօտակայ  շրջաններուն մէջ: Կիրակի  երեկոյէն մինչեւ Երկուշաբթի առաւօտեան կանուխ  ժամերը   Սայտայի արուարձաններուն մէջ սուր  բախումներ  տեղի կ’ունենային  բանակին եւ  Ասիրի հետեւորդներուն  միջեւ: Երկուշաբթի կէսօրին  բանակը իր   հակակաշիռին տակ  վերցուց  Ահմէտ Ասիրի  կեդրոնատեղին:  Բախումներու ընթացքին  սպաննուեցաւ Ասիրի  զինուորական  պատասխանատուն՝ Ապտէլ Ռահման Շամանտարը:  Ասիրի ճակատագիրը  ցարդ  կը մնայ անորոշ:  Կարգ մը աղբիւրներ հաղորդեցին, թէ Ասիր ստացած էր մարմնական  վնասուածք:  Անոր զինակիցներէն շատեր փախուստ տուած են  մզկիթէն, ոմանք անձնատուր դարձած, ուրիշներ՝ սպաննուած: Բանակը   սկսաւ   հետապնդել զինեալները եւ  ձերբակալութիւններ կատարել: Հետաքննութիւնները պարզեցին, թէ  Ասիրի կողքին կռուող զինեալներուն մեծամասնութիւնը Քըսէյրէն  փախուստ տուած սուրիացի եւ  օտարազգի ծայրայեղականներ են:

Պետութեան  մօտ զինուորական ատեանի դատախազ ՍաքրՍաքր  հետապնդումի եւ  հարցաքննութեան  հրամանագիր մը հրապարակեց Ահմէտ Ասիրի եւ անոր  զինակից  123 անձերու դէմ: Հեռատեսլի կայաններ  հաղորդեցին, թէ Սայտայի մէջ բանակին նահատակներուն թիւը բարձրացաւ  քսանի, վերաւորներու թիւը անցաւ  հարիւրը:

LEAVE A REPLY

Please enter your comment!
Please enter your name here