ՍՈՒՐԻՈՅ ՀԱԿԱՄԱՐՏՈՒԹԻՒՆԸ ԼԻԲԱՆԱՆ ՓՈԽԱԴՐԵԼՈՒ ՓՈՐՁ…

0
154

ԲԱՆԱԿԸ  ՆՈՐ ՆԱՀԱՏԱԿՆԵՐՈՎ  ԿԸ ՊԱՇՏՊԱՆԷ  ԵՐԿՐԻՆ ԴԷՄ  ՈՒՂՂՈՒԱԾ ԴԱՒԱԴՐՈՒԹԻՒՆՆԵՐԸ

Թրիփոլիի  համեմատական   հանդարտութիւնը եւ  երկրին  ապահովական կայունութիւնը ամրապնդելու  բազմակողմանի ճիգերը ծանր հարուած մը ստացան, երբ  Կիրակի  օր,  Պիլալ պըն Ռապահ մզկիթի  շէյխ Ահմէտ Ասիրի  հետեւորդ  լիբանանցի եւ  օտարազգի զինեալները, տարբեր տեսակի  զէնքերով  եւ հրթիռներով   յարձակում գործեցին լիբանանեան բանակի  կեդրոնի մը վրայ, սպաննելով տասը եւ վիրաւորելով աւելի քան քառասուն  միաւորներ: Շէյխ Ասիր միաժամանակ  սիւննի  զինուորներուն    հրահանգեց  լքել բանակը:

Ասիրի հետեւորդ զինեալները  անմիջապէս   փորձեցին  փակել Սայտայի գլխաւոր  ճանապարհները: Քաղաքին  մէջ  ստեղծուեցաւ  ելեկտրականացած  մթնոլորտ:  Այս միջոցին, Այն Հելու գաղթակայան    թափանցած  Ֆաթհ  Իսլամ կազմակերպութեան զինեալները կրակ  բացին գաղթակայանին կից  գտնուող  բանակի դիրքերուն վրայ: Բանակը հակադարձեց:  Գաղթակայանի պատասխանատուները  դատապարտեցին  բանակին վրայ կատարուած  յարձակումը, սակայն անոնք միաժամանակ  հաստատեցին, թէ Ֆաթհ Իսլամի եւ  սալաֆական  կազմակերպութեան  զինեալներ  մագլցումի կը  մղեն  իրավիճակը:   Սալաֆական  կազմակերպութիւններ   փորձեցին  ընդլայնել   բախումներու ծիրը, զայն  փոխադրելով Թրիփոլի եւ այլուր: Ասիրի  հետեւորդներ եւ անոնց ետին կեցող ուժեր  փակեցին Թրիփոլիի գլխաւոր   ճանապարհները: Բանակը  վերաբացաւ  բոլոր  ճանապարհները:

Լիբանանեան բանակը  հրապարակեց  հաղորդագրութիւն մը, որուն  մէջ  կը  նշէր, թէ բանակայիններուն դէմ միտումնաւոր եւ   սառնասրտօրէն  կատարուած   ոճիրները  թշնամիի փամփուշտով  չէին կատարուած, այլ  լիբանանեան խմբաւորումներէ՝  Սայտայի  մէջ գրգռութիւններ ստեղծելու եւ  Լիբանանը  վերադարձնելու  1975-ի  իրավիճակին: Բանակը հաղորդագրութեան մէջ   կը  շեշտէր, թէ  պիտի  շարունակէ իր առաքելութիւնը եւ  արդարութեան   առջեւ պիտի  բերէ բոլոր  յանցագործները:  Լիբանանեան բանակը  պաշարեց   Պիլալ Պըմ Ռապահ  մզկիթը, ուր  թաքնուած է  Ասիրը: Կիրակի  երեկոյէն մինչեւ Երկուշաբթի առաւօտեան կանուխ  ժամերը   Սայտայի արուարձաններուն մէջ սուր  բախումներ  տեղի կ’ունենան  բանակին եւ  Ասիրի հետեւորդներուն  միջեւ:

 

Հանրապետութեան նախագահ Միշէլ Սըլէյման  ըսաւ, թէ  Լիբանան պիտի  չդառնայ  ներհամայնքային  պատերազմի  թատերաբեմ:

Նորանշանակ  վարչապետ  Թամամ Սալամ բոլոր կողմերէն պահանջեց  զօրավիգ կենալ  լիբանանեան բանակին:

Հրաժարեալ ներքին գործոց նախարար Մարուան Շերպէլ բանակէն պահանջեց վճռական  ըլլալ նախայարձակներուն հանդէպ:

Մարտ 14-ի ուժերու քարտուղարութեան  ընդհանուր համադրող Ֆարէս Սուէյտ դատապարտեց Սայտայի   միջադէպը, շեշտելով որ   բանակին  վրայ գործուած  յարձակումը անարդարանալի է,  ինչ որ ալ ըլլան պատճառները:

Հրաժարեալ  վարչապետ  Նեժիպ  Միքաթի  դատապարտեց բանակին դէմ կատարուած  յարձակումը եւ իմաստութեան կոչ ուղղեց  քաղաքական բոլոր կողմերուն:

Նախկին վարչապետ Սալիմ Հոս  պահանջեց  վերջ դնել  Լիբանանը եւ անոր քաղաքացիներուն  անվտանգութիւնը  հարուածող  ուժերուն:

Երեսփոխան  Պահիա  Հարիրի դատապարտեց Սայտայի մէջ ապօրէն զէնքի առկայութիւնը: «Պետութեան զէնքէն բացի որեւէ զէնք դատապարտելի է», յայտնեց ան: Հարիրի  դատապարտեց բանակին դէմ կատարուած  յարձակումը,  նշելով որ  Սայտայի  միջադէպը կը  միտի  քայքայել  քաղաքը  եւ անոր  բնակիչներուն միջեւ համակեցութիւնը:   

Նախկին վարչապետ Սաատ Հարիրի  յայտարարեց, թէ Հըզպալլան  է Սայտայի   դէպքերուն պատճառը:

Երեսփոխան Սամի Ճեմայէլ  իշխանութիւններէն պահանջեց քաղաքականապէս թիկունք կենալ  բանակին,  կանաչ լոյս տալ անոր, որպէսզի   կատարէ իր ազգային պարտականութիւնը:

Լիբանանեան Ուժեր կուսակցութիւնը իր զօրակցութիւնը յայտնեց  բանակին, բոլոր անոնց դէմ որոնք կը  փորձեն  հարոածել երկրին ապահովութիւնը եւ կայունութիւնը:

Ընկերվար Յառաջդիմական կուսակցութեան  պետ Ուալիտ Ճոմպլաթ դատապարտեց բանակին վրայ կատարուած յարձակումը եւ պահանջեց  վերջ դնել  շէյխ Ասիրի երեւոյթին: Ան դարձեալ զգուշացուց Սուրիոյ հակամարտութիւնը  Լիբանան փոխադրելու  փորձերէն: Ճոմպլաթ  դատապարտեց բանակին  դէմ կատարուած  յարձակումը  եւ գիտակցութեան կոչ ուղղեց  բոլոր կողմերուն: «Կ’աշխատիմ  Սաատ Հարիրիի, Նեպիհ Պըրրիի եւ Հըզպալլայի հետ երկիրը դուրս բերելու  կառավարական պարապութենէն» ըսաւ Ճոմպլաթ:

LEAVE A REPLY

Please enter your comment!
Please enter your name here