ԱՍԻՐԻ ԵՐԵՒՈՅԹԻՆ ՄԱՍԻՆ

0
147

Լիբանանեան բանակի փունջ մը եկաւ աւելնալու, յանուն  հայրենիքի  պաշտպանութեան՝   նահատակներու  բագինին վրայ: Աւելի քան երկու տարի Սայտայի մէջ  բոյն դրած  Ահմէտ Ասիր երեւոյթը,  կառավարութեան եւ բանակին  յաջորդական սպառնալիքներ, վերջնագիրներ  յղելէ ետք,  անցնող Կիրակի  օր, Ասիրի հետեւորդ ահաբեկիչները  յարձակեցան  բանակի  անցարգելի մը վրայ,  սպաննելով եւ  վիրաւորելով անոր  սպաները եւ    զինուորները:

Սայտայի  միջադէպը խռովարարութեան  փորձ մը չէր, այլ՝ բանակը եւ  պետութիւնը  հարուածելու միտումնաւոր   քայլ մը:Ասիր եւ զինք  հովանաւորող  քաղաքական, կրօնական հոսանքներ փորձեցին  նոր հաւասարակշռութիւն  ստեղծել քաղաքական բեմին վրայ, բայց ձախողեցան,շնորհիւ  լիբանանեան բանակի  նահատակներուն: Ասիրի  արկածախնդրութիւնը  կը միտէր    քայքայելու երկրին  համայնքային համակեցութիւնն ու ապահովական կայունութիւնը:  Քաղաքացիական պատերազմի   յայտարարութիւն մըն էր Ասիրի եւ անոր  բազմազգ   հրոսակախումբին  արկածախնդրութիւնը:

Քաղաքական  բազմաթիւ  հոսանքներ, խորհրդարանի անդամներ,  նախազգալով  Ասիրի   շարժումին տակ պահուած պալարը խստիւ դատապարտեցին  միջադէպը եւ անվերապահ զօրակցութին  յայտնեցին բանակին: Բայց դժբախտաբար, քաղաքական կարգ մը   հոսանքներու  մօտ  պակսեցաւ  հատուածական  շահը   հաւաքականին զոհելու խիզախութիւն:  Ոմանք մանուածապատ յայտարարութիւններով  ի զուր  փորձեցին  ծածկել իրենց  համոզումները:  Ոմանք  չկրցան  յստակ պատասխան  տալ՝  բանակ  թէ՞  Ասիր  հարցադրումին:  Ոմանք  իրողութեան անիրազեկ  հաղորդագրութիւններ   հրապարակեցին՝ անգործնական եւ անիրապաշտ   պահանջներ  ներկայացնելով կառավարութեան, կարծէք Լիբանանէն հեռու վայրի մը  մէջ ապարած  ըլլային:  Ոմանք  հաւասար  դիրքերէ  մեկնաբանեցին  լիբանանեան  բանակին  հայրենանուէր  սխրագործութիւնները  եւ Ասիրի աւազակախումբին արարքները:

 Նոյնը  պատահեցաւ լսատեսողական   աղբիւրներու պարագային:  Ոմանք, զարմանք արտայայտելու չափ   սովորական եւ  մակերեսային  եղանակով  ներկայացուցին Սայտայի  միջադէպերը: Ուրիշներ՝ կարծէք  երկու խմբաւորումներու միջեւ  հերթական  բախում մը  ներկայացնէին :  Ոմանք  միջադէպը կը վերլուծէին այնպէս, կարծէք  Ալ Քայիտայի  դաշնակիցներ  ըլլային:  Բարեբախտաբար  շատեր  ցուցաբերեցին  լրջութիւն, հետեւողականօրէն   ընդգծելով  երկրին խաղաղ գոյակցութեան  դէմ նետուած մարտահրաւէրը,  երկիրը   քաղաքացիական  նոր պատերազմի մը  ուրուականէն   փրկելու  քաջարի բանակին  դերակատարութիւնը:   Սակայն  մեծագոյն անակնկալը   եկաւ   հրաժարեալ վարչապետէն, երբ ազգային  սուգ  յայտարարելէ ետք,  խնդրեց  միայն  մէկ ժամով  դադրեցնել աշխատանքները…:

Լիբանան  փրկուեցաւ   Ասիրի միջոցաւ  քաղաքացիական պատերազմի  յորձանուտը   իյնալու  սադրանքէն:  Բայց, ինչպէս արեւմտեան  կարգ մը   աղբիւրներ  կը հաւաստեն,  երկիրը կը գտնուի  քաղաքացիական նոր պատերազմի մը սեմին:  Սուրիայէն փախուստ տուած  բազմազգ   զինեալներ, սալաֆականներ եւ պաղեստինեան գաղթակայաններու մէջ  տեղակայուած   զինեալներու  աջակցութեամբ  աւելի   լայնածաւալ գրգռութիւն մը  կրնան ստեղծել  երկրին մէջ:  Լիբանանցիները միայն իրենց միասնականութեամբ  պիտի յաջողին  պարտութեան մատնել  երկիրը ալեկոծելու  փորձերը:  Այս պարագային, միասնականութիւն՝ պետականութեան եւ բանակին  շուրջ:  Բանակին եւ համայնքներու միջեւ  թշնամանք սնուցանելու,  յատկապէս սիւննի համայնքին դէմ ՝  արհեստական  ատելութեան  փորձերը  լաւ  դաս պէտք է ծառայեն Ասիրի եւ անոր ետին  գտնուող ուժերուն:  Բանակը  հաւասար  հեռաւորութեան  վրայ կը գտնուի  բոլորէն եւ  նախանձախնդիր պիտի մնայ երկրի անվտանգութեան, ապահովական կայունութեան պահպանութեան:  Բանակին  ցուցմունք , թելադրութիւն, ուղղութիւն  եւ  խրատ տալու ժամանակը հաւանաբար անցաւ:

Դատարկաբանութիւններով  զբաղելու   ժամանակը սպառած է: Պէտք է   ձերբազատիլ դատարկամիտ  կարգախօսներէն:  Ժամանակն է, որ   իրաւական պետութիւն, կրօնական  հանդուրժողութիւն   քարոզող  կազմակերպութիւններ   եւ անոնց  հետեւորդներ,  Լիբանանի ամբողջականութեան եւ  գերիշխանութեան   նախանձախնդիր ուժեր,  սթափին  ու  վերատեսութեան  ենթարկեն իրենց ռազմավարութիւնը  եւ առանց՝  եթէ-ներու կամ  բայց-երու, գործնապէս  սատար  կենան   լիբանանեան բանակին ու պետականութեան:  

Ասիրի  երեւոյթը   աւարտեցաւ:  Բայց նոյնքան   մեղաւոր են  քաղաքական այն հոսանքները  եւ  անձնաւորութիւնները որոնք Ասիրներու  նման  «հերոսներ» կը ներմուծեն   լիբանանեան  բեմին: Չի բաւեր  հաւատալ ու լսել անոնց դատապարտումները, անհրաժեշտ է հաշուետուութեան հրաւիրել զանոնք:  Ժողովուրդը  ունի  դատելու կարողութիւն: Բարեբախտաբար  կարելի  չէ  խաբել  ժողովուրդը: Ասիր   մեկնեցաւ  պատմութեան  զամբիւղը:  Անիկա  լաւ   դաս  մը  պիտի  ծառայէ  նոր «Ասիրիկ»ներ   փորձարկողներուն: 

Բազմակարծութիւնը եւ  տեսակէտներու  տարբերութիւնը   ժողովրդավար  որեւէ հասարակարգի  հասունութեան արտայայտութիւն է:  Սակայն  Լիբանանի մէջ  ուժեր կը  գործեն, որոնց  առաջնայնութիւնը    կը մնայ  հայրենիքի  մէջ օտարի շահերու պաշտպանութիւնը: Հեգնականը այս բոլորին մէջ,  մեր  թշնամին՝ Իսրայէլը,  արդէն իսկ սկսած է   Միջերկարականի  բնական հարստութիւններէն օգտուիլ, կազ արտահանել,  տնտեսական նոր շուկաներ  ստեղծել…: Ո՞վ այսօր կը     յիշատակէ արաբական բռնագրաւեալ հողերու պահանջատիրութեան մասին:  Ո՞վ կրնայ անոր պարտադրել,  դադրեցնելու   բռնագրաւեալ  հողերու վրայ  բնակութեան  ծրագիրները: Ո՞վ կրնայ   Իսրայէլին   հրահանգել  ջնջելու  Կազայի դէմ հաստատած  պաշարումը: Մենք    Լիբանանի եւ արաբական աշխարհի մէջ նստած յարանուանական լարուածութեամբ կը դաստիրակենք մեր   սերունդները, համայնքային ատելութեան  թոյներով կը սնանենք զանոնք:  Ո՞վ կը  խորհի  տնտեսութեան, ճարտարարուեստի, մարդ արարածի պատրաստութեամբ… :  Վերադարձ  դէպի  Քարէ Դար…:

 Պետութիւններ  չեն կառուցուիր ատելութեան եւ այլամերժութեան  հիմքերու վրայ…:

ԱՀԱՐՈՆ ՇԽՐՏԸՄԵԱՆ

LEAVE A REPLY

Please enter your comment!
Please enter your name here