ՆԱԼՊԱՆՏԵԱՆ ԿԱՏԱՐԵՑ ԵԽԽՎ-Ի ԱՄԱՌՆԱՅԻՆ ՆՍՏԱՇՐՋԱՆԻ ԲԱՑՈՒՄԸ

0
122

Սթրազպուրկի մէջ  կատարուեցաւ  ԵԽԽՎ-ի  ամառնային  նստաշրջանին բացումը, որ պիտի  երկարի մինչեւ   Ուրբաթ, 28 Յունիս: Նստաշրջանի բացման խօսքը արտասանեց Հայաստանի արտաքին գործոց նախարար, Եւրոպական Խորհուրդի նախարարներու Խորհուրդի   նախագահ Էտուարտ Նալպանտեանը: 

 Ելոյթ  ունենալով Եւրոպայի խորհուրդի Խորհրդարանական Վեհաժողովի լիագումար նիստին, Նալպանտեան յայտնեց Հայաստանի գերակայութեան գլխաւոր  դրոյթները՝ ցեղային խտրականութիւն, ատելութեան հրահրման եւ անհանդուրժողութեան դէմ պայքարը: Նալպանտեան նաեւ վստահեցուց,թէ  Հայաստան պիտի  շարունակէ Եւրոպական Խորհուրդի   Նախարարներու Խորհուրդի նախորդ նախագահներու ՝ժողովրդավարութեան հաստատման, մարդու իրաւունքներու  պաշտպանութեան եւ օրէնքի գերակայութեան  ուղղութեամբ  կատարուող  հետեւողական  ջանքերը: Նալպանտեան հանդիպում մը ունեցաւ մարդու իրւունքներու եւրոպական դատարանի  նախագահ  Տին  Շփիլմանի հետ: Ան կատարեց մարդու իրաւունքներու եւրոպական խորհրդաժողովի  15-րդ արձանագրութեան ստորագրութեան արարողութեան բացումը:  Պատասխանելով ԵԽԽՎ-ի պատուիրակութիւններու հարցումներուն, Նալպանտեան ընդգծեց, թէ Հայաստանի դիրքիորոշումը ամբողջութեամբ կը համընկնի ԵԱՀԿ Մինսքի  խումբի համանախագահ  երկիրներու ղեկավարներուն  յայտարարութեան մէջ արտացոլացուած  դիրքորոշումներուն: Ան աւելցուց, թէ երկու օր  ետք  հերթական հանդիպումը պիտի  ունենայ  համանախագահներուն  հետ: Նալպանտեան նաեւ անդրադարձաւ հայ-թրքական արձանագրութիւններուն.« Երկարատեւ եւ ծանր  բանակցային գործընթացէ ետք,  մենք համաձայնութեան եկանք եւ  2009-ի Հոկտեմբերին Ցիւրիխի մէջ ստորագրեցինք արձանագրութիւնները: Ցաւ ի սիրտ, Թուրքիա  հրաժարեցաւ վաւերացնել  փաստաթուղթերը ու առանց  նախապայմաններու ստորագրել   համաձայնագիրը: Արձանագրութիւններու  վաւերացման  ու իրականացման հարցով  կարգը Թուրքիայինն է» եզրակացուց Նալպանտեան:

 Խումբ մը երկիրներու՝  Սպանիա, Բրիտանիա,  Իտալիա, Ֆինլանտա,  Պելճիքա,  Պուլկարիա,  Իրլանտա՝ 31 պատուիրակներ վիճարկեցին   ԵԽԽՎ-ի  Հայաստանի նախագահութեան հարցը, դիտել տալով, որ  Հայաստան  օտար  պետութեան մը  հողերը «գրաւած» պետութիւն մըն է: Անոնք պահանջեցին քննարկման  օրակարգ դարձնել Հայաստանի նախագահութեան հարցը:

Նշենք, թէ  16 Մայիսին, Հայաստան պաշտօնապէս ստանձնած էր  Եւրոպայի Խորհուրդի Նախարարներու Խորհուրդի  նախագահութիւնը:

LEAVE A REPLY

Please enter your comment!
Please enter your name here