ՌԻՔԱՐՏՈՆԷ Կ’ԱՅՑԵԼԷ ԱՂԹԱՄԱՐ ԿՂԶԻՆ

0
146

Թուրքիոյ մօտ Միացեալ Նահանգներու դեսպան Ֆրենսիս Ռիքարտոնէ  իր  կնոջ ընկերակցութեամբ այցելած է Վանայ Աղթամար կղզին եւ հիացած է հայկական Սուրբ Խաչ եկեղեցիով:
Թրքական «Սի.Էն.Էն. Թիւրք»ը յայտնած է, որ Վանայ Աղթամար կղզի այցելած դեսպանը լրագրողներուն հետ կիսած է իր տպաւորութիւնները: Ան շեշտած է, որ Աղթամարը վերականգնումէն ետք աւելի գեղեցկացած է:
Դեսպանը նշած է, թէ ինք Պոսթընէն է եւ շատ զարմացած է, երբ Աղթամարի մէջ Պոսթընէն ժամանած զբօսաշրջիկներու հանդիպած է: Ան նշած է, թէ Թուրքիոյ մէջ կ՛ընթանայ քրտական հարցի կարգաւորման գործընթաց: Իսկ անդրադառնալով հայ-թրքական յարաբերութիւններուն, դեսպանը պնդած է, որ Թուրքիոյ եւ Հայաստանի միջեւ  յարաբերութիւններու կարգաւորման գործընթացը եւս առաջ կ՛ընթանայ:
«Երկու գործընթացներու արդիւնքները արդէն կ՛երեւին: Նախորդ տարուայ համեմատ  չորս անգամ աւելի շատ զբօսաշրջիկ այցելած է Աղթամար: Վանի պատմութիւնը՝ բնութեան եւ կրօնական տեսանկիւնէն զբօսաշրջիկութեան համար կարեւոր տեղ կը գրաւէ: Միեւնոյն ժամանակ այս վայրը շատ կարեւոր է հայերու եւ ամերիկացիներու համար: Ով որ կ՛ուզէ գալ Վան, թող առանց վարանելու գայ», յայտարարած է դեսպանը:

LEAVE A REPLY

Please enter your comment!
Please enter your name here