Արամ Ա. Ընդունեց Իրանի Հոգեւոր Առաջնորդին Ներկայացուցիչը

0
135

 Երեքշաբթի, 25 Յունիս 2013ի առաւօտեան, Արամ Ա. վեհափառ ընդունեց Իրանի Իսլամական հանրապետութեան հոգեւոր առաջնորդ այաթոլլա Ալի Խամենէի խորհրդականը՝ այաթոլլա Ղուլան Ալի Նայիմ Ապատին, ընկերակցութեամբ Լիբանանի մօտ Իրանի դեսպան տոքթ. Ղանտաֆարի եւ դեսպանատան քաղաքական ու մշակութային կցորդներու:
Այաթոլլա Ապատին վեհափառ հայրապետին ներկայացուց այաթոլլա Խամենէի բարեմաղթութիւնները եւ յատուկ գնահատանքով անդրադարձաւ Իրանի Իսլամական հանրապետութեան ու Մեծի Տանն Կիլիկիոյ կաթողիկոսութեան յարաբերութեանց, ինչպէս նաեւ՝ իրանահայութեան վիճակին։ Խօսելով Իրանի հայ համայնքին մասին՝ Ղուլան Ապատին յիշեց, այաթոլլա Խումէյնիի եւ այաթոլլա Խամենէի դրական վկայութիւնները հայութեան մասին: «Մենք ամբողջական ազատութիւն տուած ենք հայ համայնքին, իրեն կրօնական ու ազգային աւանդութիւնները պահելու», ըսաւ ան։
Վեհափառ հայրապետը, իր կարգին, ողջունելով բարձրաստիճան հիւրը՝ անդրադարձաւ Մեծի Տանն Կիլիկիոյ կաթողիկոսութեան եւ Իրանի Իսլամական հանրապետութեան միջեւ փոխադարձ յարգանքի վրայ հիմնուած յարաբերութեան ու երկխօսութեան։ Վեհափառը իր գնահատանքը յայտնեց մեր ժողովուրդին նկատմամբ Իրանի պետութեան ցուցաբերած յատուկ նախանձախնդրութեան համար։
Աւելի քան ժամ մը տեւած հանդիպումը առիթ հանդիսացաւ նաեւ անդրադառնալու Լիբանանի, Սուրիոյ եւ ընդհանրապէս շրջանի կացութեան։ Այս ծիրէն ներս, Արամ Ա. կաթողիկոս ողջունեց թէ՛ Ղարաբաղի եւ թէ Հայոց Ցեղասպանութեան գծով հայ ժողովուրդին նկատմամբ Իրանի պետութեան ցուցաբերած զօրակցութիւնը։

 

LEAVE A REPLY

Please enter your comment!
Please enter your name here