ՀԱՅԱՍՏԱՆ – ԼԵՀԱՍՏԱՆ ԵՐԿԿՈՂՄ ՅԱՐԱԲԵՐՈՒԹԻՒՆՆԵՐԸ ԶԱՐԳԱՑՆԵԼՈՒ ՀԵՌԱՆԿԱՐՆԵՐ

0
146

Պաշտօնական այցելութեամբ Լեհաստան գտնուող Հայաստանի նախագահ Սերժ Սարգսեան հանդիպում ունեցած է այդ երկրի նախագահ Պրոնիսլաւ Քոմորովսկիին հետ: Լրագրողներուն հետ ունեցած հանդիպումին ընթացքին Քոմորովսկին անդրադարձած է տարեվերջին Վիլնիւսի մէջ տեղի ունենալիք Արեւելեան գործընկերութեան գագաթնաժողովի ծիրին մէջ Եւրոպական Միութեան հետ Զուգորդման համաձայնագիրի ստորագրութեան իմաստով Հայաստանի յառաջընթացի անհրաժեշտութիւնը: Գոհունակութիւն յայտնելով Սերժ Սարգսեանի Լեհաստան կատարած այցելութենէն՝ Լեհաստանի նախագահը դիտել տուած է. «Համոզուած եմ, որ նախագահին այս այցելութիւնը արդարացի է, քանի որ անիկա, բացի պատմական, մշակութային, տնտեսական եւ քաղաքական կապերու զարգացումէն, ունի նաեւ այլ նպատակներ՝ հետամուտ ըլլալ ԵՄի հետ Զուգորդման համաձայնագիրի ստորագրութեան»։
Ան նշած է, որ բանակցութիւններէն ետք ինք ունեցած է այն տպաւորութիւնը, որ Հայաստան պատրաստ է այս համաձայնագիրի ստորագրութեան՝ դիտել տալով, որ նման համաձայնագիրի մը վաւերացումը լրացուցիչ իրաւական դաշտ պիտի ստեղծէ հայ-լեհական յարաբերութիւններու զարգացման համար: Լեհաստանի նախագահին համաձայն, հայ եւ լեհ ժողովուրդներուն միջեւ առկայ բարիդրացիական յարաբերութիւններու հիման վրայ մեծ կարելիութիւն կայ զարգացնելու նաեւ տնտեսական կապերը. այս պարունակին մէջ Քոմորովսկին կարեւոր նկատած է հայ-լեհական առեւտրական ֆորումի կայացումը: Ան աւելցուցած է, որ Հայաստանի նախագահին այցելութիւնը յարգանքի տուրք է ոչ միայն երկկողմանի կապերու դարաւոր անցեալին, այլ նաեւ անիկա մեծապէս պիտի նպաստէ երկու ժողովուրդներու հետագայ փոխշահաւէտ համագործակցութեան:
Պատասխանելով լրագրողներուն հարցումներուն՝ Լեհաստանի նախագահը հաստատած է, որ իր երկիրը պիտի շարունակէ աջակցիլ Արեւելեան գործընկերութեան ծրագիրին՝ ընդարձակուելու ընդհանուր եւրոպական տարածաշրջանին մէջ, տարածելու եւրոպական արժեհամակարգն ու խորացնելու տնտեսական ու քաղաքական կապերը:
Իր կարգին, Սերժ Սարգսեան լաւ ապագայ նախատեսած է երկկողմանի համագործակցութեան զարգացման ուղղութեամբ: Ան նշած է, որ Հայաստան մեծապէս հետաքրքրուած է Լեհաստանի հետ տնտեսական յարաբերութիւններու զարգացմամբ:
Այնուհետեւ երկու երկիրներուն նախագահները ստորագրած են փոխադրութեան, գիւղատնտեսութեան, բնապահպանութեան եւ մաքսային ոլորտներուն մէջ համագործակցութեան զարգացման փաստաթուղթեր: Հայաստանի եւ Լեհաստանի նախագահները Վարշաւիոյ մէջ պիտի մասնակցին նաեւ հայ-լեհական գործարար համաժողովի փակման արարողութեան:
Նախագահ Սերժ Սարգսեան հանդիպում պիտի ունենայ նաեւ Լեհաստանի հայ համայնքի ներկայացուցիչներուն հետ:

 

LEAVE A REPLY

Please enter your comment!
Please enter your name here