ՄԱԿ-ի ՄՕՏ ԴԵՍՊԱՆ ՆԱԶԱՐԵԱՆ Կ’ԱՐԺԵՒՈՐԷ ԿԱՆԱՆՑ ԴԵՐԱԿԱՏԱՐՈՒԹԻՒՆԸ

0
123

ՄԱԿ-ի Ապահովութեան Խորհուրդը ընդունեց  բանաձեւ մը, ըստ որուն, զինեալ հակամարտութեան ընթացքին սեռական ոտնձգութիւնը կրնայ նկատուիլ մարդկութեան դէմ յանցագործութիւն կամ ցեղասպանութեան առնչուած արարք: ՄԱԿ-ի Ապահովութեան Խորհուրդին մէջ հակամարտութիւններու ընթացքին սեռական ոտնձգութիւններու նիւթին նուիրուած 24 Յունիսի նիստին մասնակցեցաւ ու ելոյթով հանդէս եկաւ ՄԱԿ-ի մօտ Հայաստանի դեսպան Կարէն Նազարեանը:
Դեսպանը իր խօսքին մէջ նշեց, որ կարելի չէ լուծել հակամարտութիւններու ընթացքին սեռական ոտնձգութեան խնդիրը՝ պարզապէս մատնանշելով կամ դատապարտելով յանցագործները: Անհրաժեշտ է կատարել հիմնական փոփոխութիւններ՝ օրինական եւ հասարակական մակարդակներու վրայ։ «Այդ յանցագործութեան դէմ պայքարն, անհնար է առանց քաղաքական, սոցիալական ու տնտեսական բնագաւառներում կանանց ամբողջական մասնակցութեան: Կանայք պէտք է մասնակից լինեն ցեղասպանութեան, անպատժելիութեան եւ անվտանգութեան հարցերի քննարկումներին, եթէ ցանկանում են կառուցել յարատեւ խաղաղութիւն», նշեց ան։ Հայաստանի դեսպանը ընդգծեց, որ, թէեւ հակամարտութիւններու ազդեցութիւնը մեծ է յատկապէս կիներուն եւ աղջիկներուն վրայ, բայց եւ այնպէս անոնք կարեւոր դերակատարութիւն ունին խաղաղութեան կերտման գործընթացին մէջ:
Քննարկման, զոր կը նախագահէր Միացեալ Թագաւորութեան արտաքին գործոց նախարար Ուիլիըմ Հէյկը, կը մասնակցէին նաեւ ՄԱԿ-ի գլխաւոր քարտուղարը, անոր յատուկ ներկայացուցիչը Զեյմապ Պանկուրան, ինչպէս նաեւ ՄԱԿ-ի գաղթականներու հարցերով գերագոյն յանձնակատարի յատուկ բանագնաց‘ Անժելինա Ժոլին:
Կազմակերպութիւնը կոչ ուղղեց պետութիւններուն՝ իրենց ազգային քրէական օրէնսդրութեան մէջ ներառելու սեռական ոտնձգութեան յանցագործութիւնը՝ այդօրինակ գործողութիւնները դատապարտելու եւ մեղաւորները պատասխանատուութեան ենթարկելու համար՝ արդարադատութեան մէջ ներառելով այդ յանցագործութենէն վերապրողները:

LEAVE A REPLY

Please enter your comment!
Please enter your name here