ԱԼԻԵՒ ՈՒՂԵՂԱՅԻՆ ՑՆՑՈՒՄԷ ԿԸ ՏԱՌԱՊԻ…

0
135

«Թրենտ.ազ» կայքէջը կը հաղորդէ, որ Ատրպէյճանի նախագահ Իլհամ Ալիեւ Ատրպէյճանի զինեալ ուժերու օրուան նուիրուած տողանցքին ընթացքին իր արտասանած խօսքին մէջ յայտարարած է, որ՝ «ատրպէյճանական դրօշակը կրկին պիտի ծածանի Լեռնային Ղարաբաղի մէջ»։
Ալիեւ աւելցուցած է, որ Ատրպէյճանի ռազմական եւ տնտեսական հզօրութիւնը իր դերը պիտի խաղայ Լեռնային Ղարաբաղի հակամարտութեան կարգաւորման հարցին մէջ։
«Այսօր կարելի է ըսել, որ Ատրպէյճանի մէջ միայն Լեռնային Ղարաբաղի խնդիրը մնացած է անլոյծ, սակայն այդ հարցին մէջ ալ կայ յստակ քաղաքականութիւն։ Միջազգային իրաւական արժեչափերը, տնտեսական, քաղաքական գործօնները եւ մեր ռազմական հզօրութիւնը իրենց դերը պիտի խաղան Լեռնային Ղարաբաղի հարցի արդարացի լուծման իմաստով, եւ Ատրպէյճան պիտի վերականգնէ իր տարածքային ամբողջականութիւնը։ Ատրպէյճանական դրօշակը պիտի ծածանի Լեռնային Ղարաբաղի եւ բռնագրաւուած միւս տարածքներուն մէջ, Խանքենտիի մէջ (Ստեփանակերտ ) մէջ, Շուշիի մէջ։ Մենք պիտի վերականգնենք պատմական արդարութիւնը եւ պիտի վերադառնանք մեր հայրենի հողերուն։ Այլ ելք չկայ», յայտարարած է Ալիեւ։
Ան նաեւ աւելցուցած է, որ՝ «ուժեղ Ատրպէյճանը թոյլ Հայաստանի հետ կրնայ խօսիլ իր ուզած լեզուով։ Ատրպէյճանական «ԱՓԱ» լրատու գործակալութեան համաձայն, Ալիեւ աւելցուցած է, թէ իրենք «ի վիճակի են ղարաբաղեան հարցը լուծելու նաեւ ռազմական ուղիով, սակայն տարածաշրջանի կայունութիւնը չխաթարելու համար առայժմ կը նախընտրեն խնդիրի կարգաւորման բանակցային ուղին»:
«Ատրպէյճան տարածաշրջանին մէջ մեծ հեղինակութիւն ունի եւ կայունութիւն հաստատողի դեր կը կատարէ: Առանց Ատրպէյճանի համաձայնութեան, որեւէ նախագիծ, որեւէ նախաձեռնութիւն չի կրնար կեանքի կոչուիլ տարածաշրջանին մէջ: Ուստի, տարածաշրջանին մէջ կայունութիւնը պահպանելու համար մենք առայժմ նախապատուութիւնը կու տանք խնդիրի լուծման բանակցային գործընթացին: Սակայն գաղտնիք չէ, որ օրէ օր Ատրպէյճան կը դառնայ աւելի ուժեղ, իսկ Հայաստան կը տկարանայ: Որեւէ տեսանկիւնէ, մենք քանի մը անգամով կը գերազանցենք մեր թշնամիները, որոշ ուղղութիւններով՝ նոյնիսկ աւելի քան 10 անգամ… Եւ այդ տարբերութիւնը ժամանակի ընթացքին կ՛աւելնայ, քանի որ մենք հեռանկարներ, զարգացման ուղի ունինք», դիտել տուած է Ատրպէյճանի նախագահը:
«Բանակաշինութեան հարցը որեւէ պետութեան ներքին քաղաքականութեան առաջնահերթութիւնն է եւ յատկապէս այն պետութիւններուն, որոնք կը գտնուին պատերազմական վիճակի մէջ», յայտնած է ան։ Իրենց ռազմական պիւտճէին մասին խօսելով՝ Ալիեւ յայտնած է. «2003ին մեր ռազմական պիւտճէն կը կազմէր 163 միլիոն տոլար, անցեալ տարի՝ 3.6 միլիառ տոլար, իսկ այս տարի՝ 3.7 միլիառ տոլար: Համեմատութեան համար կրնամ ըսել, որ Հայաստանի ամողջ պիւտճէն մօտաւորապէս 2 միլիառ տոլար է… Այսինքն, այս բոլորը ցոյց կու տան, որ բանակաշինութիւնը գերակայ խնդիր է, եւ մեր պիւտճէէն տարեկան մեծ գումար կը յատկացուի անոր, ինչ որ բնական է, քանի որ պատերազմը չէ աւարտած, աւարտած է միայն պատերազմի առաջին հանգրուանը, եւ որեւէ պահու մեր բանակը պէտք է պատրաստ ըլլայ որեւէ ուղիով մեր երկրի տարածքային ամբողջականութեան վերականգնման», նշած է ան։
Ապա ան անդրադարձած է Ատրպէյճանի զինուած ուժերու զինանոցին եւ նշած, որ անոր համալրման գործընթացը պիտի կատարուի տեղական եւ օտար արտադրութիւններով։  Ալիեւ դիտել տուած է, որ վերջին տարիներուն իրենք  ձեռք բերած են ռազմական այնպիսի սարքաւորումներ, որոնք ի զօրու են ոչնչացնելու որեւէ թիրախ։

LEAVE A REPLY

Please enter your comment!
Please enter your name here