«Հայաստան» Հիմնադրամը Կը Շարունակէ Աջակցիլ Սուրիահայերուն

0
104

 Հայաստան Համահայկական Հիմնադրամը սուրիահայութեան աջակցութեան ծրագիրի ծիրին մէջ կը շարունակէ աջակցիլ սուրիահայ հայրենակիցներուն:
Հիմնադրամի մամլոյ ծառայութենէն յայտնած են, թէ այդ նպատակով բացուած դրամատնային հաշիւին փոխանցուած գումարները գոյացած են մասնաւորաբար Հիմնադրամի Ֆրանսայի, Գերմանիոյ, Միացեալ Նահանգներու Արեւմտեան ափի, Արժանթինի, Պրազիլի, Լիբանանի, Շուէտի տեղական մարմիններուն կողմէ կազմակերպուած «Հեռուստամարաթոն 2012»էն հաւաքուած գումարներէն, ինչպէս նաեւ Հայաստանի եւ արտերկրի տարբեր իրաւաբանական եւ բնագիտական անձերու նուիրատուութիւններէն (որոնց կարգին՝ Հրայր Յովնանեան, Արա Աբրահամեան, «Փեթակ» ընկերութիւն, «Հայռուսգազարտ», «Գալուստանեան Րաֆֆի» բարեգործական կեդրոն, Հայաստանի դատաւորներ, Հայաստանի Գիտութիւններու ազգային ակադեմիոյ պատմութեան հիմնարկ, «Բանանց ֆուտբոլային ակումբ», Գիւմրիի Կարա Միրզայի անուան երաժշտական դպրոց, «Տուրուանդ» ընկերութիւն եւ այլն):
Իրականացուած են ծրագիրներ առողջապահութեան, կրթութեան եւ ընկերային բնագաւառներուն մէջ: 2013ի Յունիսի դրութեամբ 100,000 եուրօ (Ֆրանսայի տեղական մարմին), 12,000 եուրօ (Գերմանիոյ տեղական մարմին), 100,000 տոլար (Լիբանանի տեղական մարմին) ուղարկուած են Սուրիոյ մէջ բնակող մեր հայրենակիցներու տարբեր կարիքներուն. գումարին զգալի մասը յատկացուած է Հալէպի հայկական վարժարաններու ուսուցիչներուն՝ որպէս աշխատավարձ:
Հիմնադրամի Պրազիլի, Արժանթինի, Շուէտի տեղական մարմիններու հանգանակած գումարներով հիմնադրամը փոխհատուցած է 110 սուրիահայ ուսանողի ուսման թոշակը, ինչպէս նաեւ վեց սուրիահայու սիրտի վիրահատութեան եւ երեքի յուղարկաւորութեան ծախսերը:
Հիմնադրամի  Միացեալ Նահանգներու Արեւմտեան ափի տեղական մարմինի հաւաքած 10,000 տոլարով նիւթական օժանդակութիւն ցուցաբերուած է Երեւանի Կիլիկեան դպրոցին, ուր կ՛ուսանին Հայաստան տեղափոխուած սուրիահայ երեխաներ: Գործարարներ Հրայր Յովնանեանի եւ Արա Աբրահամեանի նուիրաբերած միջոցներով հիմնադրամը ֆինանսաւորած էր Հալէպ-Երեւան-Հալէպ թռիչքները։

LEAVE A REPLY

Please enter your comment!
Please enter your name here