ՊԵՏԱԿԱՆ ԿԱՌՈՅՑՆԵՐՈՒ ԿԱՅՈՒՆՈՒԹԵԱՆ ԱՌՈՒՄՈՎ ՀԱՅԱՍՏԱՆ 105-ՐԴ ԴԻՐՔԻ ՎՐԱՅ Է

0
121

Պետական կառոյցներու կայունութեան առումով Հայաստան աշխարհի 178 պետութիւններու շարքին 105-րդ դիրքի վրայ է: Այս մասին կը վկայէ Ուաշինկթընի մէջ գործող Խաղաղութեան հիմնադրամի եւ հեղինակաւոր «Ֆորըն փոլիսի» հանդէսի հրապարակած տարեկան զեկոյցի տուեալները, որոնք  կը վերաբերին այսպէս կոչուած «ձախողած պետութիւններուն»:
Ուսումնասիրողները նկատի առած են ընկերային, քաղաքական, տնտեսական չափորոշիչները՝ միտք ունենալով պարզել այս կամ այն պետութեան բնորոշ տկար եւ խոցելի կողմերը: Ամերիկացի փորձագէտները այս ոլորտները 10 աստիճանով, որքան աւելի ըլլայ թիւը, աւելի վատ վիճակի մէջ կ՛ըլլայ պետութիւնը։
Հայաստանը 120-էն ստացած է 71 միաւոր. ան բաւական վտանգուած վիճակի մէջ է։ Ըստ զեկուցումին, ամէնէն վտանգաւոր խնդիրը այսպէս կոչուած «իշխող խաւին մասնատուածութիւնն է»: «Այս ձեւակերպման տակ նկատի ունինք պայքարը իշխանութեան համար, ընտրախախտումներու առկայութիւնը, քաղաքական ճամբարներու փոփոխութիւնը: Իրավիճակ մը, երբ տեղական եւ ազգային մակարդակի առաջնորդները կը գտնուին փակուղիի մէջ», նշուած է զեկուցումին մէջ։
Ընկերային չափորոշիչներու առումով Հայաստանի հիմնական խնդիրներ կը նկատուին գաղթականութեան առկայութեան, ինչպէս նաեւ արտագաղթի ծաւալները:
Քաղաքական չափորոշիչները եւս Հայաստանի մէջ բաւական անյոյս են՝ լուծման կարօտ հիմնական խնդիրները կը նկատուին պետական կառոյցներու օրինականութիւնը, օրէնքի գերակայութեան ապահովումն ու մարդու իրաւունքներու պաշտպանութեան անհրաժեշտութիւնը:
Հայաստանի պարագային մեծ է նաեւ արտաքին ուժերու ներգրաւուածութեան մակարդակը: Այս ցուցանիշը, ըստ վերլուծաբաններուն, բարձր կ՛ըլլայ, երբ պետութեան սահմաններու մէջ տեղակայուած են այլ պետութեան ռազմական ուժեր՝ իրողութիւն, որ Հայաստանի մէջ առկայ է 90ականներու սկիզբէն:
Վրաստանը 120 կէտէն հաւաքած է 84. հիմնական խնդիրները երկրի ներքին զարգացումներուն արտաքին միջամտութեան բարձր մակարդակն է եւ իշխող վերնախաւին մասնատուած վիճակը:
Ատրպէյճանի պարագային իրավիճակը գրեթէ նոյնն է: Որպէս առանցքային խնդիրներ մատնանշուած են գաղթականներու մեծ բանակի առկայութիւնն ու պետական հաստատութիւններու օրինականութեան ցած մակարդակը:

 

LEAVE A REPLY

Please enter your comment!
Please enter your name here