ՊՐԱԶԻԼ ՇԱՀԵՑԱՒ ԳՈՆՖԵՏԵՐԷՅՇՆ ԳԱՓ-Ը

0
136

Պրազիլի հաւաքականը շահեցաւ  ֆութպոլի «Գոնֆետերէյշըն Գափ»ը: Աւարտական մրցումին,  Պրազիլ՝  3-0 արդիւնքով պարտութեան մատնեց  աշխարհի եւ Եւրոպայի ախոյեան Սպանիան (կիսախաղ՝ 2-0):  Պրազիլի կոլերը նշանակեցին  Ֆրէտը (2) եւ  Նէյմարը:  Նշենք, թէ Պրազիլի հաւաքականը երրորդ անգամ ըլլալով կը շահէր    համանուն մրցաշարքը:  

Ֆեռնանտօ Թորէզ  նշանակած  հինգ կոլերով  դարձաւ  մրցաշարքին լաւագոյն  ռմբարկուն եւ ստացաւ  մրցաշարքի «Ոսկէ Խաղակօշիկ»ը:  Պրազիլի հաւաքականի եւ Ֆլիւմինենսի  յարձակող Ֆրէտ նոյնպէս նշանակեց հինգ կոլ, սակայն ան ստացաւ  «Արծաթէ Խաղակօշիկ»ը:

ԻՏԱԼԻԱ ՇԱՀԵՑԱՒ  ՊՐՈՆԶԷ   ՄԵՏԱԼԸ

«Գոնֆետերէյշն Գափ»ի  պրոնզէ մետալի մրցանակին համար,  Իտալիոյ եւ Ուրուկուէյի միջեւ  տեղի ունեցած  ճակատումը աւարտեցաւ իտալացիներուն յաղթանակով:   Մրցումին լրացուցիչ  90  վայրկեանները վերջ գտան  2-2 հաւասարութեամբ:  Էտինսոն Գաւանի նշանակեց Ուրուկուէյի  զոյգ կոլերը եւ արժանաւորապէս  ընտրուեցաւ մրցումին լաւագոյն մարզիկը:   Տաւիտէ Ասթորի եւ Ալեսանտրօ  Տիամանթի նշանակեցին  Իտալիոյ կոլերը: Յաւելեալ  երեսուն վայրկեանները  նոյնպէս  վերջ գտան հաւասարութեամբ:  Իրաւարարը նշանակեց    փենալթի հարուածաշար:  Իտալացիները   3-2 արդիւնքով պարտութեան մատնեցին  Ուրուկուէյը եւ    գրաւեցին խորհրդանշական երրորդ դիրքը:  Էտինսըն Գաւանի ընտրուեցաւ մրցումին լաւագոյն մարզիկը:

Յատկանշական է, որ սոյն մրցումին ընթացքին  ցուցարարները պաշարեցին  մարզադաշտը եւ արգիլեցին մարզասէրներու մուտքը:

ԼԵՒՈՆ ԱՐՈՆԵԱՆ   ԵՐԿՐՈՐԴ ԴԻՐՔԻ ՎՐԱՅ

 Ճատրակի  միջազգային  ֆետերասիոնը  հրապարակեց   համաշխարհային դասակարգման  նոր աղիւսակը:  Ընդհանուր դասաւորումը կը գլխաւորէ նորվեկիացի Մակնուս Գարլսընը՝ 2862 կէտ: Երկրորդ  դիրքի վրայ կու գայ  Լեւոն Արոնեանը՝ 2813 կէտ:

 

ՌԷԱԼ 30 ՄԻԼԻՈՆ ԿԸ ՊԱՀԱՆՋէ  ՀԻԿՈՒԱՅԻՆԻ   ՀԱՄԱՐ

Սպանական Ռէալ Մատրիտը արժանթինցի յարձակող Կոնսալօ Հիկուայինի ակումբային արձանագրութիւնը փոխելու համար կը պահանջէ  երեսուն միլիոն եուրօ գումար մը: Լոնտոնի Արսենալը  լուրջ  հետաքրքրութիւն կը ցուցաբերէ 25-ամեայ ֆութպոլիստին համար: Արսենալ պատրաստ է շաբթական 130 հազար սթերլին աշխատավարձ  վճարելու Հիկուայինին:  Նշենք թէ անգլիական կարգ մը  թերթերու համաձայն, Արսենալ կը  մտադրէ  իր կազմին մէջ ունենալ  Չելսիի յարձակող  Ֆեռնանտօ  Թորէզը:

ՄԱՆՉԵՍԹԸՐ   ԵՈՒՆԱՅԹԸՏ ՆՈՐ ՊԱՅՄԱՆԱԳԻՐ Կ’ԱՌԱՋԱՐԿԷ  ՏԷ ԽԷԱՅԻՆ

Մանչեսթըր Եունայթըտ ակումբը նոր  պայմանագրութիւն մը առաջարկեց սպանացի բերդապահ  Տաւիտ Տէ Խէային:   Եունայթըտ կ’առաջարկէ մինչեւ 2018-ը երկարաձգել  22-ամեայ  բերդապահին  պայմանագրութիւնը եւ 88  հազար եուրոյի  բարձրացնել  անոր  շաբթական աշխատավարձը:  Տէ Խէա ներկայիս կը ստանայ   64  հազար եուրօ:

 

ՈՒԻԼԻՅԸՄԶԻ 600-ՐԴ  ՅԱՂԹԱՆԱԿԸ

Ուիմպըլտընի թենիսի աղջկանց  միջազգային մրցաշարքի երրորդ հանգրուանի մրցումներուն,  Սերենա Ուիլիյըմզ արձանագրեց իր ասպարէզին 600-րդ յաղթանակը: Յաղթանակներու  ցուցանիշով,  Սերենա գործող  թենիսիստուհիներուն  մէջ  կը զիջի  միայն  իր  քրոջ՝ Վինըս Ուիլյըմզին՝ 632 յաղթանակ:  Իսկ ընդհանրապէս յաղթանակներու  մրցանակակիրը  Մարթինա Նավրաթիլովան  է՝ 1442:

ՆԻՔԻ  ՌՈԶՊԸՐԿ  ՇԱՀԵՑԱՒ  ԲՐԻՏԱՆԻՈՅ ԿՐԱՆ ՓՐԻՆ

Նիքի  Ռոզպըրկ (Մերսետես) շահեցաւ   ֆորմիւլա -1 ինքնաշարժներու  Բրիտանիոյ Կրան Փրին:  Մարք  Ուեպըր  եւ Ֆեռնանտօ  Ալոնզօ համապատասխանաբար գրաւեցին երկրորդ եւ  երրորդ դիրքերը:

 

ՓԵՐՈԹԱ ԼՔԵՑ ՖՈՒԹՊՈԼԸ

Ռոմա խումբի  միջնապահ եւ Իտալիոյ  հաւաքականի նախկին անդամ Սիմոնէ Փերոթա  լքեց  ասպարէզը: 36-ամեայ ֆութպոլիստը 2004-ին,  Քիեւոյէն միացած էր  Ռոմայի:  Ան  նաեւ կրած է  Ռեճինայի,  Եուվենթուսի եւ Պարիի  շապիկները:  Փերոթա, 42  անգամ  ներկայացուցած է Իտալիոյ ազգային խումբը եւ  2006-ին  Իտալիոյ ազգային խումբին հետ  շահած է  Մոնտիալի բաժակը:

ՏՈՍ ՍԱՆԹՈՍ  ՄԻԱՑԱՒ  ՎԻԼԱՌԷԱԼԻ

Թոթենհամի եւ Մեքսիքոյի հաւաքականի անդամ  Ճիովանի Տոս Սանթոս  միացաւ Վիլառէալի: 24-ամեայ  մեքսիքացիին  փոխանցման մանրամասնութիւններուն մասին տեղեկութիւններ  չեն   փոխանցուիր տակաւին:   Տոս Սանթոս 2012-ին  սպանական  Մայորքայէն միացաւ  Թոթենհամին: Ան, 29  մրցում կատարեց անգլիական ակումբին հետ, նշանակելով  վեց կոլ:

 ՏՐԱՔՍԼԷՐ ՄԵՐԺԵՑ ՄԻԱՆԱԼ  ՌԷԱԼԻ

 Շալքէ 04-ի եւ Գերմանիոյ հաւաքականի անդամ Եուլիան  Տրաքսլէր մերժեց  միանալ Ռէալ Մատրիտին: 19-ամեայ ֆութպոլիստը  երկարաձգեց գերմանական ակումբի հետ   իր պայմանգրութիւնը:  Ռէալ  Մատրիտ  Տրաքսլէրին  առաջարկած էր տարեկան  12   միլիոն եուրօ  գումար  աշխատավարձով, հինգ տարուան պայմանագրութիւն մը:

ԵՈՒՆԱԹԸՏ  ԿԸ ՀԵՏԱՊՆԴԷ ԱԼՔԱՆԱԹԱՐԱՆ

Գաթալոնական Պարչելոնա խումբին կիսապաշտպան Թիակօ  Ալքանթարայի ծառայութիւններով   հետաքրքրուող Մանչեսթըր Եունայթըտը պատրաստ է  18 միլիոն եուրօ  վճարելու  22-ամեայ  ֆութպոլիստին:  Պայերն Միւնիխ եւ  Ռէալ Մատրիտ  նոյնպէս հետաքրքուած են Ալքանթարայի զարգացումներով:

ՉՈՐՍ  ՖՈՒԹՊՈԼԻՍՏՆԵՐ  ԼՔԵՑԻՆ ՉԵԼՍԻՆ

Փորթուգալացի  Փաուլօ Ֆերէյրա, Իսրայէլի հաւաքականի անդամ Եոսի Պենայուն, ֆրանսացի կիսապաշտպան Ֆլորան Մալուտա եւ անգլիացի  բերդապահ Ռոս Թըրնպոլ  ազատ արձակուեցան  Չելսիէն: Ակումբի  տնօրէնութիւնը մերժեց  վերանորոգել  պայմանագրութիւնները եւ շնորհակալութիւն յայտնեց անոնց  ծառայութիւններուն համար:

ԷՎՐԱ ԿՐՆԱՅ ՎԵՐԱԴԱՌՆԱԼ ՄՈՆԱՔՈՅԻ

 Անգլիական  Մանչեսթըր Եունայթըտ  խումբի եւ Ֆրանսայի հաւաքականի յետսապահ Փաթրիս Էվրա կրնայ  վերամիանալ Մոնաքոյի, եթէ անգլիական ակումբը ձեռք  բերէ  Էվըրթընի  պաշտպաններէն՝  Լէյթըն  Պէյնզը: 32-ամեայ   Էվրա, 2002- 2006  կրած է  Մոնաքոյի շապիկը: Անցնող  շաբթուան ընթացքին,  Մանչեսթըր Եունայթըտ 16 միլիոն սթերլին գումար մը  առաջարկեց 28-ամեայ  Պէյնզի համար,բայց  մերժուեցաւ: Բրիտանական  օրաթերթերը կը գրեն, թէ Եունայթըտ  մտադրած է  երկրորդ անգամ՝ 20  միլիոն գումար  առաջարկել  Պէյնզի համար, որ կը նկատուի  Բրիտանիոյ լաւագոյն  ձախ  եզրային պաշպանը:

ՍԱՆՉԷՍ ԿԸ ՓԱՓԱՔԻ ԽԱՂԱԼ  ՄԵՍԻԻ ԵՒ ՆԷՅՄԱՐԻ ԿՈՂՔԻՆ

 Պարչելոնայի  չիլիցի   յարձակող Ալեքսիս Սանչէս  շատ կը փափաքի խաղալ  Մեսիի եւ Նէյմարի կողքին:« Բոլոր որակները ունիմ՝ Մեսիի եւ Նէյմարի կողքին խաղալու համար: Հիանալի պիտի  ըլլայ խաղալ անոնց հետ: Մրցակցութիւնը աւելի պիտի  զօրացնէ կազմը». նշեց  Սանչէս:

Միւս  կողմէ, գաթալոնական ակումբը մտադրած է երկարաձգել Սպանիոյ հաւաքականի պաշտպան  Ճեռար Փիքէի պայմանագրութիւնը: 26-ամեայ  ֆութպոլիստին պայմանագրութիւնը  Պարչելոնայի հետ կ’աւարտի  2015-ին: 2012-2013   մարզաշրջանին, Փիքէ  Պարչելոնայի  կազմէն կատարեց 44  մրցում, նշանակելով  3 կոլ:

ՄԱՐԻՕ  ԿՈՄԷԶ ՊԻՏԻ ՄԻԱՆԱՅ  ՖԻՈՐԵՆԹԻՆԱՅԻ

Պայերն Միւնիխի եւ  Գերմանիոյ հաւաքականի յարձակող Մարիօ  Կոմէզ բազմիցս  արտայայտուած էր  Պայերնը լքելու մասին:  27-ամեայ ֆոթպոլիստը    համաձայնութիւն մը կնքեց  իտալական Ֆիորենթինա ակումբին հետ:  Պայերնի նոր մարզիչ  Խօսէփ Կուարտիոլա  մեծ յոյսեր չէր  կապեր Կոմէզի  հետ:  Անոր փոխանցման սակը կրնայ  գնահատուիլ 20 միլիոն եուրօ: Անգլիական  Մանչեսթըր Սիթի խումբը նոյնպէս կը հետաքրքրուէր  Կոմէզի ստորագրութեամբ

ՌԻՊԵՐԻ ԿԸ ՓԱՓԱՔԻ ՊԱՅԵՐՆԻ ՀԵՏ ԱՒԱՐՏԵԼ  ԱՍՊԱՐԷԶԸ

 Պայերն  Միւնիխի եւ Ֆրանսայի  հաւաքականի   կիսապաշտպան Ֆրանք Ռիպերի մինչեւ 2017  թուականը երկարաձգեց գերմանական ակումբին հետ պայմանագրութիւնը:  30-ամեայ  Ռիպերի   2007-ին   Մարսէյէն  միացաւ Պայերնին:  Ան յայտնեց, թէ շատ ուրախ է նոր պայմանգրութիւն կնքելու առիթով  եւ կը  փափաքի Պայերնի  հետ աւարտել իր ասպարէզը:

Պայերնի  մարզիչ  Խօսէփ  Կուարտիոլա  պիտի  փորձէ  Պարչելոնայի յարձակող Լիոնէլ Մեսիի դիրքին վրայ  օգտագործել  Ռիպերին:

ԳԱՒԱՆԻ ՀԱՄԱՁԱՅՆԵՑԱՒ   ՄԻԱՆԱԼՈՒ  ՉԵԼՍԻԻ

Իտալական  Նափոլի ակումբի եւ Ուրուկուէյի հաւաքականի յարձակող  Էտինսոն Գաւանի հաւանութիւն տուաւ  Չելսիին միանալու առաջարկութեան:  Փոխանցման սակը առայժմ կը մնայ անորոշ:  Գաւանի  հինգ տարուան  պայմանագրութիւն մը պիտի կնքէ անգլիական ակումբին հետ:  Նափոլի սկզբունքով  վաթսուն միլիոն եուրօ գումար մը կը պահանջէ  27-ամեայ  ֆութպոլիստին ստորագրութեան համար: Գաւանի ընթացիկ  տարեշրջանին  Նափոլիի հետ կատարած է 29  մրցում,  նշանակելով  29 կոլ:

ԷԼ  ՇԱԱՐԱՈՒԻ    ՄԵՐԺԵՑ ՄԻԱՆԱԼ ԱՆԺԻԻ

 Ա.Սէ. Միլանի եւ Իտալիոյ հաւաքականի յարձակող  Սթեֆան ալ Շաարաուի  մերժեց Մախաչկալայի Անժի խումբին միանալու առաջարկ մը:  Միլան՝  35  միլիոն  եուրօ գումար մը կը պահանջէ  երիտասարդ  ֆութպոլիստին համար:  Նշենք, թէ Նափոլի եւ Մանչեսթըր Սիթի  նոյնպէս  հետաքրքրուած են Շաարաուի  ծառայութիւններով:  Շաարաուի, այս տարուան  Իտալիոյ ախոյեանութեան մրցումներուն ընթացքին նշանակեց 18  կոլ:

 

LEAVE A REPLY

Please enter your comment!
Please enter your name here