ՀՐԷԱԿԱՆ ՍՓԻՒՌՔԸ ԿԸ ԿԱՆԳՆԻ ԿԵԶԻԻ ՑՈՅՑԵՐՈՒՆ ԵՏԻՆ …

0
110

«Թուտէյզ Զաման» օրաթերթի կայքը երէկ հաղորդեց, որ Թուրքիոյ փոխվարչապետ Պեշիր Աթալայ յայտնած է, որ արտաքին ուժեր եւ հրէական սփիւռքը կը կանգնին Թուրքիոյ վերջին ցոյցերուն ետին եւ անոնք աշխատած են երկրին մէջ անկարգութիւնները հրահրելու։
Աթալայ Քըրըքալէ նահանգին մէջ յայտնեց, որ «գոյութիւն ունին շրջանակներ, որոնք Թուրքիոյ արձանագրած աճին կը նախանձին։ Անոնք բոլորն ալ կը միաւորուին, եւ անոնց մէկ կողմը հրէական սփիւռքն է։ Տեսաք «Կեզի» հանրապարտէզի դէպքերուն ընթացքին օտար լրատուամիջոցներուն վերաբերմունքը. անոնք հաւատացին եւ սկսան անմիջապէս հեռարձակելու առանց (կացութեան պատշաճ) գնահատական մը տալու»։
Թուրքիոյ փոխվարչապետը նաեւ յայտնեց, որ արտաքին լրատուամիջոցները դաւադրութեան մէջ մեծ դերակատարութիւն ունեցան եւ ճարպիկ կերպով շահագործեցին անկարգութիւնը։ «Անոնք, որոնք Մեծն Թուրքիոյ ճամբան կը փորձեն փակել, պիտի չյաջողին», աւելցուց ան։
Յիշեցնենք, որ Թուրքիոյ վարչապետ Ռեճէփ Թայիփ Էրտողան ցոյցերու հրահրման համար ամբաստանած էր «տոկոսի լոպին» եւ միջազգային լրատուամիջոցները։

 

LEAVE A REPLY

Please enter your comment!
Please enter your name here