ՄԻՋԱԶԳԱՅԻՆ ԵՒ ՇՐՋԱՆԱՅԻՆ ԽԱՌՆ ԿԵՑՈՒԱԾՔՆԵՐ ՄՈՐՍԻԻ ՀԵՌԱՑՈՒՄԻՆ ՇՈՒՐՋ

0
103

Մորսիի   պաշտօնազրկումը   խառն արձագանգ  ստեղծեց   արեւմտեան եւ արեւելեան   ոստաններու մէջ:  ՄԱԿ-ի ընդհանուր  քարտուղար  Պան Քի Մուն  իր մտահոգութիւնը յայտնեց  զարգացումներուն  առնչութեամբ եւ պահանջեց   վերականգնել  քաղաքացիական  կառավարութիւն:  Քի  Մուն  չդատապարտեց  իշխանափոխութիւնը:  Միացեալ Նահանգներու նախագահ  Պարաք  Օպամա  պահանջեց անմիջապէս  կազմակերպել խորհրդարանական  նոր  ընտրութիւններ եւ  կազմել  նոր կառավարութիւն:  Օպամա  շեշտեց, թէ  եգիպտացի  ժոշովուրդը պիտի  վճռէ  երկրին ճակատագիրը: Ֆրանսայի արտաքին գործոց նախարար  Լորան Ֆապիւս յայտնեց, թէ Ֆրանսա « Իրազեկ  դարձած  է»  Եգիպտոսի մէջ՝  փոխանցման  շրջանէ մը ետք,  նոր ընտրութիւններու որոշումին: Եւրոպական  Միութեան արտաքին  քաղաքականութեան գլխաւոր բանագնաց Քաթրին Աշթըն պահանջեց անմիջապէս  վերականգնել երկրին   ժողովրդավարական գործընթացը եւ  կազմակերպել նախագահական ընտրութիւններ: Սէուտական Արաբիոյ  Ապտալլա Պըն Ապտէլ Ազիզ  թագաւորը շնորհաւորական    հեռագիր մը  յղեց   Եգիպտոսի նոր  ղեկավարութեան: Սուրիոյ նախագահ  Պաշշար Ասատ  ողջունեց Եգիպտոսի մէջ Իսլամական Եղբայրակցութեան տապալումը:

« Եգիպտոսի յեղաշրջումը  յետադիմութեան նշան է» . յայտարարեց  Թուրքիոյ իշխող Արդարութիւն եւ Բարգաւաճում կուսակցութեան  խօսնակը: Ռուսիա ինքնազսպումի կոչ   ուղղեց Եգիպտոսի  քաղաքական  կողմերուն: Քուէյթի Սապահ Ահմէտ Սապահ իշխանը  շնորհաւորեց ժամանակաւոր նախագահ Ատլի Մանսուրը: Պաղեստինեան Իշխանութեան  նախագահ  Մահմուտ  Ապպաս  շնորհաւորեց Մանսուրը  եւ   դրուատեց բանակին  դերակատարութիւնը: Քաթար յայտարարեց, թէ  կը մնայ եգիպտացի  ժողովուրդին կամքին կողքին:

Եգիպտոսի Հայ Բարեգործական  Ընդհանուր Միութեան  գրասենեակի  ղեկավար Պերճ Թերզեան  յայտնեց, թէ  քաղաքական կացութիւնը  ոչ մէկ սպառնալիք   ստեղծած է հայ համայնքին :

LEAVE A REPLY

Please enter your comment!
Please enter your name here