ՄՈՐՍԻ ՊԱՇՏՕՆԱՆԿ ԴԱՐՁԱՒ – ՄԱՆՍՈՒՐ ՊԻՏԻ ՍՏԱՆՁՆԷ ԻՇԽԱՆՈՒԹԻՒՆԸ

0
159

 Ամիսներու վրայ  երկարող  Եգիպտոսի  քաղաքական  տագնապը նոր  հանգրուան մը  թեւակոխեց,   երբ  Եգիպտոսի  պաշտպանութեան նախարար, բանակի  գերագոյն  հրամանատար, զօրավար Ապտուլ  Ֆաթահ  Ալ Սիսի  հեռատեսիլային   ուղղակի հաղորդումի մը  ընթացքին, յայտարարեց թէ  երկրին սահմանադրութեան կիրառութիւնը  ժամանակաւորապէս դադրած է: Սիսի  նշեց, թէ  Սահմանադրական  Ատեանի նախագահը ժամանակաւորապէս  պիտի ստանձնէ երկրին նախագահութեան  լիազօրութիւնները, որուն լոյսին տակ Մուհամմէտ Մորսի կը դադրի նախագահի պաշտօնէն:  

Գահիրէի Թահրիր  հարապարակի վրայ  հաւաքուած ցուցարարրները ողջունեցին բանակի   հրամանատարութեան  յայտարարութիւնը: Մորսի նախապէս մերժած էր   բանակին կողմէ առաջարկուած  «Ճանապարհային Քարտէս»ը, ինչպէս նաեւ  48 ժամուան վերջնագիրը:  Ընդդիմութեան ղեկավար  Մուհամմէտ Ալ Պարատէյի  ողջունեց  բանակին  գործողութիւնները, զայն  նկատելով երկիրը  ճգնաժամէն դուրս  բերելու միջոց: Եգիպտոսի Սահմանադարական Ատեանի  նախագահ Ատլի  Մանսուր այսօր  երդմնակալութիւն պիտի կատարէ, իբրեւ  ժամանակաւոր պետութեան  ղեկավար:

 

Միջազգային եւ շրջանային    լուսարձակները կեդրոնացած են Եգիպտոսի զարգացումներուն վրայ, ուր վայրկեան առ վայրկեան տեղի կ’ունենան անկիւնադարձային  փոփոխութիւններ:Սակայն  բեւեռացած քաղաքական  կացութիւնը   շուտափոյթ  լուծում  չի խոստանար Փարաւոններու երկրին:

Պաշտօնէն  հեռացուած նախագահ Մոհամմէտ Մորսի կը գտնուի ներքին գործոց նախարարութեան մօտ:  Բանակը  անմիջապէս   ձերբակալեց   Իսլամական Եղբայրակցութեան աւելի քան՝  350 ղեկավարներ եւ  անդամներ:  Բանակը նաեւ  ձերբակալեց Ազատութիւն եւ  Արդարութիւն կուսակցութեան պետ Սաատ Քաթաթնին եւ Իսլամական Եղբայրակցութեան  փոխ  հոգեւոր առաջնորդ  Ռշատ  Ալ Պիումին:  Բանակի աղբիւր մը հաղորդեց Մորսիի դէմ դատական հայց բարձրացնելու կարելիութիւն մը:

Մորսիի   պաշտօնազրկումը   խառն արձագանգ  ստեղծեց   արեւմտեան եւ արեւելեան   ոստաններու մէջ:  ՄԱԿ-ի ընդհանուր  քարտուղար  Պան Քի Մուն  իր մտահոգութիւնը յայտնեց  զարգացումներուն  առնչութեամբ եւ պահանջեց   վերականգնել  քաղաքացիական  կառավարութիւն:  Քի  Մուն  չդատապարտեց  իշխանափոխութիւնը:  Միացեալ Նահանգներու նախագահ  Պարաք  Օպամա  պահանջեց անմիջապէս  կազմակերպել խորհրդարանական  նոր  ընտրութիւններ եւ  կազմել  նոր կառավարութիւն:  Օպամա  շեշտեց, թէ  եգիպտացի  ժոշովուրդը պիտի  վճռէ  երկրին ճակատագիրը: Ֆրանսայի արտաքին գործոց նախարար  Լորան Ֆապիւս յայտնեց, թէ Ֆրանսա « Իրազեկ  դարձած  է»  Եգիպտոսի մէջ՝  փոխանցման  շրջանէ մը ետք,  նոր ընտրութիւններու որոշումին: Եւրոպական  Միութեան արտաքին  քաղաքականութեան գլխաւոր բանագնաց Քաթրին Աշթըն պահանջեց անմիջապէս  վերականգնել երկրին   ժողովրդավարական գործընթացը եւ  կազմակերպել նախագահական ընտրութիւններ: Սէուտական Արաբիոյ  Ապտալլա Պըն Ապտէլ Ազիզ  թագաւորը շնորհաւորական    հեռագիր մը  յղեց   Եգիպտոսի նոր  ղեկավարութեան: Սուրիոյ նախագահ  Պաշշար Ասատ  ողջունեց Եգիպտոսի մէջ Իսլամական Եղբայրակցութեան տապալումը: « Եգիպտոսի յեղաշրջումը  յետադիմութեան նշան է» . յայտարարեց  Թուրքիոյ իշխող Արդարութիւն եւ Բարգաւաճում կուսակցութեան  խօսնակը:

«Ալ Ահրամ» օրաթերթը կը գրէ, թէ  Մորսի  մերժած է Քաթար կամ Թուրքիա ապաստանելու  առաջարկ  մը: Ապահովական գետնի վրայ բախումներուն հաշուեկշիռը՝  14 զոհ,   1200 վիրաւոր:

Եգիպտոսի Հայ Բարեգործական  Ընդհանուր Միութեան  գրասենեակի  ղեկավար Պերճ Թերզեան  յայտնեց, թէ  քաղաքական կացութիւնը  ոչ մէջ սպառնալիք   ստեղծած է հայ համայնքին :

LEAVE A REPLY

Please enter your comment!
Please enter your name here