ԼԻԲԱՆԱՆԵԱՆ ՔԱՂԱՔԱԿԱՆ ԲԵՄԸ ՍՊԱՍՈՂԱԿԱՆ ՎԻՃԱԿ ՄԸ ԹԵՒԱԿՈԽԱԾ Է

0
129

Լիբանանի  քաղաքական  բեմին  վրայ տիրող փակուղային իրավիճակը քաղաքական  ուժերուն կը  թելադրէ  համախոհական  լուծումներ  գտնել սահմանադրական եւ ապահովական տագնապներուն: Հանրապետութեան նախագահ Միշէլ Սըլէյման դիտել կու տայ, թէ  տագնապը աւելի քաղաքական  բնոյթ կը կրէ, քան՝ սահմանադրական:   Եկող   շաբաթը հաւանաբար դառնայ  լուծումներու  շաբաթ, այլապէս՝ 16-17-18 Յուլիսին նախատեսուած խորհրդարանի լիագումար նիստերուն ճակատագիրը պիտի ըլլայ  ձախողութիւն:  Խորհրդարանի նախագահ Նեպիհ Պըրրի համոզուած է, որ  իրաւունք ունի նիստի  հրաւիրելու խորհրդարանը: Հրաժարեալ վարչապետ Նեժիպ Միքաթի կը  պնդէ հակառակը: Քաղաքական   վերլուծաբաններու  կարծիքով, Մուսթաքպալ  Հոսանքը եւ Մարտ  14-ի ուժերը խորհրդարանի  լիագումար նիստերուն մասնակցելու   փոխարէն  կը պահանջեն երկարաձգել զօրավար Աշրաֆ Ռիֆիի պաշտօնավարութեան ժամկէտը:

Ընկերվար Յառաջդիմական Կուսակցութեան պետ Ուալիտ Ճոմպլաթի կարծիքով,  տիրող կացութենէն   դուրս  գալու միակ  միջոցը երկխօսութիւնն է: Այս ծիրին մէջ, ան դրուատեց Լիբանանի մօտ Սէուտական Արաբիոյ  դեսպան Ալի Աուատ Օսէյրիի վերջին օրերուն կատարած այցելութիւնները: Լիբանանեան Ուժեր Կուսակցութեան  գործադիր խորհուրդի պետ Սամիր Ժաաժա այն համոզումը ունի, որ  Քաթարի   մէջ  իշխանափոխութիւնը ոչ մէկ առնչութիւն ունի Եգիպտոսի  դէպքերուն  հետ: Անոր կարծիքով,  Եգիպտոսի  ժողովրդավարական յեղափոխութիւնը պիտի տարածուի այլ արաբական  երկիրներու մէջ:  Ժաաժա իր  այցելուներուն կը յայտնէ, թէ նորանշանակ  վարչապետ Թամամ Սալամ պարտաւոր է կազմելու  նոր կառավարութիւնը, որովհետեւ՝  չունի այլընտրանք:

Կառավարութեան կազմութեան  ծիրին մէջ մնալով, անցնող օրերուն նոր կառավարութեան կազմելու  խորհրդակցութիւնները արձանագրեցին տեղքայլ, սպասելով  շրջանային  զարգացումներու արդիւնքին:   Ռիատ՝ նորանշանակ վարչապետ Թամամ Սալամին   թելադրած  է ժամանակաւորապէս    սառեցնել  կազմութեան   աշխատանքները, մինչեւ շրջանային զարգացումներու յստակացումը: Ռիատ, միաժամանակ    ոչ մէկ կեցուածք կ’արտայայտէ կառավարութեան կազմին մէջ  Հըզպալլայի մասնակցութեան դէմ Մուսթաքպալ Հոսանքի  նախապայմանին: Աղբիւրները կ’աւելցնեն, թէ  կառավարութեան  կազմին մէջ Հըզպալլայի «ոչ  գործունեայ»  մասնակցութիւնը,  աւելի ժխտական անդրադարձ պիտի ունենայ  Լիբանանի քաղաքական  կեանքին վրայ:  Սալամ  նոյնպէս,  կը  փոխանցէ  թէ  նորութիւն  չունի  այս  ուղղութեամբ:  Սալամ անհաւանական  կը գտնէ  Միշէլ Աունի հետ հանդիպում մը ներկայ հանգրուանին:

Լիբանանեան կարգ մը   օրաթերթեր, իրենց տեղեկութիւնները Արաբական Ծոցի  մամուլէն քաղելով, կը  գրեն, թէ  Իրան եւ Արաբական Ծոցի երկիրներ համագործակցաբար  հաշտութիւն մը  կ’աշխատին գոյացնել   Սաատ  Հարիրիի եւ  Հըզպալլայի միջեւ:

 

LEAVE A REPLY

Please enter your comment!
Please enter your name here