ԱՀԱԲԵԿՉԱԿԱՆ ԳՈՐԾՈՂՈՒԹԻՒՆ ՄԸ ՑՆՑԵՑ ՊԻՐ ԷԼ ԱՊԸՏԸ

0
132

Ահաբեկիչ ձեռքեր  համայնքային    բախումներ   հրահրելու   փորձ մը եւս  կատարեցին  երէկ առաւօտեան, երբ  Պէյրութի հարաւային արուարձաններու  Պիր Էլ  Ապըտ   շրջանին մէջ, սպառողական իրերու՝  Իսլամական Համագործակցութեան կեդրոնին  մօտ,  ինքնաշարժներու կառատան   մէջ գտնուող ինքնաշարժի  մը  սնտուկին  մէջ զետեղուած աւելի քան  35 քիլոկրամ կշռող  ռումբ մը պայթեցաւ,  խլելով  աւելի քան    յիսուն վիրաւոր: Պայթումը   ստեղծեց  երկու մեթր խորութեաբ եւ երեք  մեթր  տրամագիծով   փոս մը: Հանրապետութեան նախագահ  Միշէլ Սըլէյման դատապարտեց  պայթումը եւ  վերանորոգեց երկխօսութեան   սեղան վերադառնալու, ինչպէս նաեւ  Պաապտայի Յայտարարութեան յանձնառու մնալու անհրաժեշտութիւնը:  Հրաժարեալ վարչապետ Նեժիպ Միքաթի, նորանշանակ վարչապետ Թամամ Սալամ,   Լիբանանեան Ուժեր կուսակցութեան գործադիր  խորհուրդի պետ Սամիր Ժաաժա,  նախկին վարչապետ Սաատ Հարիրի, Ուալիտ Ճոմպլաթ Մարտ  14-ի ուժերու ընդհանուր քարտուղարութիւնը, Օմար Քարամէ, Ամին Ճեմայէլ, կրօնական եւ  քաղաքական այլ անձնաւորութիւններ, Լիբանանի մօտ Միացեալ Նահանգներու  դեսպան Մորա Գոնելի դատապարտեցին   ահաբեկչական արարքը  շեշտելով,որ այսօրինակ փորձեր   չարաչար պիտի ձախողին անապահովութեան մթնոլորտ ստեղծել Լիբանանի մէջ:  Ներքին գործոց նախարար Մարուան Շերպէլ անմիջապէս այցելեց   պայթումին վայրը:  Նախարարը  դիտել տուաւ, որ պայթումը    շիի- սիւննի  համայնքային բախում հրահրելու փորձ մըն է, որ  բարեբախտաբար  մերժուած է   երկու համայնքներու  ղեկավարութեան կողմէ:  Լիբանանեան բանակի եւ  ներքին ապահովութեան  ուժերու մասնագէտներ անմիջապէս  հետաքննութիւն մը  բացին պայթումին վերաբերեալ:

LEAVE A REPLY

Please enter your comment!
Please enter your name here