ԱՍԱՏ ԿԸ ՇԵՇՏԷ ՄԻԱՍՆԱԿԱՆՈՒԹԵԱՆ ԱՄՐԱՊՆԴՈՒՄԸ

0
109

Նախագահ Պաշշար Ասատ  յայտարարեց, թէ  յառաջիկայ հանգրուանի կարեւորագոյն  խնդիրներէն մէկը սուրիացի հասարակութեան ազգային   միասնականութեան ամրապնդումը պիտի ըլլայ: Ասատ  նաեւ խօսեցաւ երկրի կացութեան մասին: Ան  նաեւ  վերլուծեց  արաբական եւ  միջազգային դիրքորոշումները՝ կապուած  Սուրիոյ  մէջ տիրող իրավիճակին:  

Սուրիոյ ազգային խորհուրդի  նախկին  ղեկավար  Ապտէլ Պասիթ Սիտա յայտարարեց, թէ  տակաւին որոշում  չէ կայացած  «Ժընեւ-2» խորհրդաժողովին մասնակցելու   վերաբերեալ՝  մասնակցութեան պաշտօնական հրաւէր  չստանալու պատճառով:

Ռազմական  գետնի  վրայ,  ծանր բախումներ տեղի կ’ունենան Հալէպի  Խան Ալ Ասալ շրջանին մէջ: Հալէպը քանի մը օրէ ի վեր շրջափակման մէջ է, այս պատճառով ալ սննդամթերքի, վառելանիւթի բացակայութիւնը սկսած է տիրական դառնալ, իսկ կացութենէն օգտուողները շատ բարձր գիներ կը պահանջեն։
Հալէպի աղբիւրները յայտնած են, որ քաղաքի որոշ մուտքեր փակուած են ռազմական գործողութիւններու հետեւանքով, իսկ որոշ մուտքեր՝ ապստամբ զինեալներուն կողմէ, որոնք նպատակ ունին սովի մատնելով՝ ոտքի հանել Հալէպի բնակչութիւնը:
Սննդամթերքի խիստ պակաս կայ, քանի որ բեռնատար ինքնաշարժները չեն կրնար քաղաք մտցնել բանջարեղէն, ալիւր, մսեղէն եւ մանկական սնունդ: Իսկ քաղաքին մէջ գտնուող մթերքը կա՛մ փճացած է, կամ չափազանց սուղ գիներով կը վաճառուի:
Անգամ մը եւս Հալէպի մէջ հաց ապահովելու դժուարութիւն կայ: Փուռերու առջեւ կարգ բռնած է ժողովուրդը, իսկ հացին գինը չափազանց սուղ է,  բնակչութեան համար օրուան հացը գտնելը մեծապէս դժուարացած է:

LEAVE A REPLY

Please enter your comment!
Please enter your name here