ԼԱՐՈՒԱԾՈՒԹԻՒՆԸ ԿԸ ՍՐԻ ԵԳԻՊՏՈՍԻ ՀԱԿԱՄԱՐՏՈՒԹԵԱՆ ԿՈՂՄԵՐՈՒՆ ՄԻՋԵՒ

0
129

Անցեալ շաբթուան ընթացքին բանակին միջմատութեամբ իշխանութենէն հեռացուած Եգիպտոսի նախագահ Մոհամմէտ Մորսիի համակիրները Երկուշաբթի, Յուլիս 8-ին նախագահական պահակագունդի կեդրոնատեղիին առջեւ ընդհարումներ ունեցան ոստիկանութեան հետ, որ կը փորձէր Իսլամական  Եղբայրակցութեան ցոյցը բռնի ուժով ցրուել: Ըստ իսլամական Ազատութիւն եւ Արդարութիւն կուսակցութեան՝ Մորսիի համակիրներու շարքին մէջ 51 զոհ եւ 500 վիրաւորներ արձանագրուած են:
Ըստ եգիպտական բանակին՝ «ահաբեկչական խմբակ մը փորձած է Գահիրէ գտնուող նախագահական պահակագունդի կեդրոնը ներխուժել. բախումին ընթացքին սպաննուած է սպայ մը եւ 40 վիրաւոր արձանագրուած է:
«Սքայ Նիուզ»ի արաբական ծառայութիւնը հաղորդեց, որ Գահիրէի այլ շրջաններու մէջ եւս եգիպտական բանակին ու Իսլամական  եղբայրակցութեան  միջեւ բուռն բախումներ տեղի ունեցած են: Նաեւ, Իսլամական  եղբայրակցութեան  քաղաքական թեւի՝ Ազատութիւն եւ Արդարութիւն կուսակցութեան Գահիրէի գլխաւոր կեդրոնատեղին կարմիր մոմով կնքուեցաւ, հոն զէնքերու յայտնաբերումէն ետք:
Եգիպտոսի սալաֆական «Նուր» կուսակցութիւնը այս ընդհարումներէն ետք յայտարարեց, թէ Եգիպտոսի արժամեայ նախագահ Ատլի Մանսուրի հետ «գործակցութիւնը դադրեցուցինք»:
Միւս կողմէ, Ռուսիոյ նախագահ Վլատիմիր Փութին, Ղազախստանի մայրաքաղաք Ասթանայի մէջ Կիրակի օր յայտնեց, թէ Եգիպտոս «քաղաքացիական պատերազմի մէջ ներքաշուելու վտանգը կը դիմագրաւէ»: Ղազախստանի նախագահ Նուրսուլթան Նազարպայեւ իր կարգին յայտնեց, թէ ինք Եգիպտոսի զարգացումներուն «մտահոգութեամբ կը հետեւի, որովհետեւ Եգիպտոսի եւ Սուրիոյ հարցերը բոլորիս վրայ կ՛ազդեն»:
Փութին ըսաւ, որ «Սուրիա քաղաքացիական պատերազմի դաշտ է, եւ որքա՛ն ալ ցաւալի թուի, Եգիպտոս նոյն ուղղութեամբ կ՛ուղղուի»: Ան յոյս յայտնեց, որ եգիպտացիները հեռու մնան այդ ժխտական զարգացումէն:
Ներքին ճակատի վրայ, «Նուր» կուսակցութեան գերագոյն մարմինի անդամ Շարիֆ Թահա յայտնեց, թէ «Տըսթուր» կուսակցութեան ղեկավար Մոհամմէտ Պարատէյ վարչապետի պաշտօնին յարմար թեկնածու մը չէ: Ան աւելցուցած է, թէ Պարատէյի թեկնածութեան առաջադրումը «իսլամական հոսանքի զաւակներուն մօտ լուսանցքայնացումի եւ յուսաբեկման զգացումներ կը յառաջացնէ», որովհետեւ Պարատէյ իսլամականներուն դէմ կեցուածքներ ունի:
Ըստ անոր՝ Պարատէյի թեկնածութեան առաջադրումը կը հակասէ քաղաքական ուժերուն եւ պաշտպանութեան նախարար զօր. Ապտէլ Ֆաթահ Սիսիի միջեւ համաձայնութեամբ գոյացած ճամբու քարտէսին:
Յայտնենք, թէ երկրին ժամանակաւոր նախագահութիւնը, «Նուր» կուսակցութեան բուռն ընդդիմութեան պատճառով, ետդարձ կատարած է Պարատէյի թեկնածութիւնը առաջադրելու մտադրութենէն: Եգիպտոսի նախագահութեան բանբերը յայտնեց, որ վարչապետի նշանակման հարցին շուրջ խորհրդակցութիւնները կը շարունակուին, եւ կառավարութեան կամ անոր վարչապետին անունին յայտարարման համար ճշդուած ժամկէտ մը գոյութիւն չունի: Ան նաեւ նշեց, որ Իսլամական Եղբայրակցութիւնը  կրնան մասնակցիլ երկրին մէջ կատարուելիք նոր ընտրութիւններուն:
Մինչ այդ, Փենթակոնը յայտարարեց, որ Միացեալ Նահանգներու պաշտպանութեան նախարար Չաք Հէյկըլ Ուրբաթ եւ Շաբաթ օր երեք անգամ հեռաձայնային հաղորդակցութիւն ունեցած է իր եգիպտացի պաշտօնակիցին հետ: Սպիտակ տունը իր կարգին յայտարարեց, որ Միացեալ Նահանգներու նախագահ Պարաք Օպամա կը դատապարտէ Եգիպտոսի մէջ բռնարարքներու շարունակումը եւ կողմնակից չէ որեւէ կուսակցութեան կամ խմբակի:
Իր կարգին, Թուրքիոյ վարչապետ Ռեճէպ Թայիփ Էրտողան հեռաձայնային հաղորդակցութիւն մը ունեցած է ՄԱԿ-ի ընդհանուր քարտուղար Պան Քի Մունի հետ եւ մտահոգութիւն յայտնած «Եգիպտոսի մէջ ժողովրդային կամքը անտեսող զինուորական յեղաշրջումէն ետք՝ Եգիպտոսի մէջ ժողովրդավարական հոլովոյթի կասեցման առնչութեամբ»:

 

LEAVE A REPLY

Please enter your comment!
Please enter your name here