ՀԱՅՈՑ ՑԵՂԱՍՊԱՆՈՒԹԵԱՆ ՀԻՄՆԱԽՆԴԻՐՆԵՐՈՒ ՀԵՏԱՊՆԴՄԱՆ ՅԱՏՈՒԿ ՅԱՆՁՆԱԽՈՒՄԲԻ ՍՏԵՂԾՈՒՄ

0
125

Սփիւռքի նախարարութիւնը կը տեղեկացնէ, թէ Յուլիս 6-ին, Հայաստանի Գիտութիւններու ազգային ակադեմիոյ նախագահութեան նիստերու դահլիճին մէջ իր աշխատանքը աւարտած է «Հայոց Ցեղասպանութեան 100-րդ տարելիցին ընդառաջ» խորագիրով Իրաւաբաններու համահայկական երկրորդ համաժողովը, որ նուիրուած էր Հայոց Ցեղասպանութեան 100-ամեակին ընդառաջ՝ Սփիւռքի մէջ ձեւաւորուած շրջանային յանձնախումբերու գործունէութեան իրաւական հարցերու քննարկման:
Ընթացքին քննարկուեցան Ցեղասպանութեան ենթարկուածներու ժառանգորդներու գոյքային հատուցման վերաբերեալ դատական հայցադիմումներ ներկայացնելու, ինչպէս նաեւ իրաւայաջորդութեան եւ պահանջատիրութեան ներկայացման այլ հարցեր:
Հայաստանի նախագահ Սերժ Սարգսեան ողջոյնի խօսք յղեց համաժողովի մասնակիցներուն: Ան գոհունակութիւն յայտնեց, որ մէկ յարկի տակ հաւաքուած են հայ իրաւագիտական միտքի յայտնի ներկայացուցիչները: Նախագահը նշեց, որ համահայկական մասնագիտական նախաձեռնութիւնները դարձած են Հայաստան-Սփիւռք համագործակցութեան կարեւորագոյն ուղղութիւններէն մէկը եւ անոնք արդէն իսկ որոշ արդիւնքներ կու տան՝ բացայայտելով աշխարհասփիւռ հայութեան ներուժի արդիւնաւէտ օգտագործման նորանոր օրինակներ:
Նախագահը շեշտեց, որ երբե՛ք պատահական չէ, որ հայ իրաւաբաններու ուշադրութեան կեդրոնը կը գտնուին Հայոց Ցեղասպանութեան իրաւական հիմնախնդիրները: Նախագահ Սարգսեան գնահատեց իրաւաբաններու տեսական եւ գործնական աշխոյժ մասնակցութիւնը՝ Ցեղասպանութեան միջազգային ճանաչման հոլովոյթներուն, ինչպէս նաեւ անոնց ջանքերը՝ տարբեր երկիրներու պետական եւ քաղաքական կառոյցներուն ուշադրութիւնը Հայոց Ցեղասպանութեան 100րդ տարելիցին բեւեռելու եւ ճշմարտութիւնը համայն աշխարհին ներկայացնելու ուղղութեամբ, այսպիսով՝ նպաստելով աշխարհի որեւէ կէտի վրայ ցեղասպանութեան ահաւոր ոճիրի կրկնութեան կանխարգիլման:
Նախագահ Սարգսեան շեշտեց, որ Հայոց Ցեղասպանութեան միջազգային ճանաչումը, դատապարտումը եւ անոր հետեւանքներու վերացումը միշտ արդիական հարցեր պիտի մնան: Հայաստանի նախագահը ընդգծեց, որ քանի տակաւին գոյութիւն ունի հայոց պետութիւնը՝ անյաջողութեան պիտի մատնուին այս պատմական իրողութիւնը ուրանալու եւ մոռացութեան մատնելու բոլոր փորձերը: Ըստ նախագահին՝ մարդկութեան դէմ գործուած մեծագոյն այս ոճիրը պէտք է մէկ անգամ ընդմիշտ ճանչցուի եւ դատապարտուի՝ նախ եւ առաջ Թուրքիո՛յ կողմէ:
«Սիրելի՛ բարեկամներ, Ապրիլ 2011-ին ձեւաւորուեցաւ Հայոց Ցեղասպանութեան 100-րդ տարելիցին նուիրուած ձեռնարկները համակարգող պետական յանձնաժողովը, կազմաւորուեցաւ միջազգային խորհրդատուական խումբը, ինչպէս նաեւ՝ Սփիւռքի համապատասխան շրջանային յանձնախումբերը: Ձեզմէ շատերը, անկասկած, արդէն աշխուժօրէն ներգրաւուած են այդ աշխատանքներուն մէջ: Այսօր՝ Հայոց Ցեղասպանութեան 100-ամեակի տարելիցի նախաշեմին, դուք կրնաք մէկտեղել ձեր գիտելիքն ու փորձառութիւնը, կատարել առաջարկներ եւ գիտական եզրակացութիւններ», ընդգծեց Հայաստանի նախագահը:
Համաժողովին մասնակցեցաւ նաեւ Հայաստանի գլխաւոր դատախազ Աղուան Յովսէփեան, որ ի միջի այլոց ըսաւ. «Խօսելով Հայոց Ցեղասպանութեան միջազգային ճանաչման եւ դատապարտման մասին՝ մենք հիմնական պատասխանատու կը նկատենք Թուրքիան: Թուրքիան, իրաւաբանական լեզուով ըսած՝ ոճրագործութեան կատարողն է: Եւ ատիկա այդպէս է: Բայց մենք՝ իրաւաբաններս, լաւ գիտենք, որ ոճրագործները յաճախ կ՛ունենան յանցակիցներ՝ կազմակերպիչներ, դրդիչներ, օժանդակողներ: Իսկ եղա՞ծ են արդեօք անհատ անձեր, միջազգային բացայայտ կամ գաղտնի կազմակերպութիւններ, ժողովուրդներ եւ պետութիւններ, որոնք կազմակերպած, օժանդակած կամ դրդած են Հայոց Ցեղասպանութիւնը իրականացնողները: Եւ գլխաւորը՝ ի՛նչ նպատակով: Գրականութեան մէջ արդէն իսկ յայտնուած են որոշ տեղեկութիւններ՝ Հայոց Ցեղասպանութեան կազմակերպիչներուն, օժանդակողներուն, նոյնիսկ համակատարողներուն մասին: Բայց այդ տեղեկութիւններուն մէջ ներկայացուած միջազգային կազմակերպութիւններուն եւ պետութիւններուն մասին ես առայժմս կը լռեմ, քանի որ անոնք սոսկ վարկածներ են, որոնք իրաւական լուրջ հետազօտութիւններու կարիքն ունին: Ինչպիսի՞ն է փոխհատուցում ստացող ենթականերուն շրջանակը: Անիկա պէտք է ընդգրկէ Ցեղասպանութեան զոհերու ժառանգորդները՞, Հայ առաքելական եկեղեցի՞ն, Հայաստանի Հանրապետութի՞ւնը, թէ բոլորը միասին: Իմ խորին համոզումով՝ Ցեղասպանութեան զոհերու ժառանգորդները պէտք է նիւթական փոխհատուցում ստանան, հայ եկեղեցիին պէտք է վերադարձուին Թուրքիոյ տարածքին հրաշքով կանգուն մնացած եկեղեցիները եւ եկեղեցապատկան հողերը, Հայաստանի Հանրապետութիւնը պէտք է ստանայ իր կորսնցուցած տարածքները եւ այլն: Բայց այդ բոլոր պահանջները պէտք է ունենան անթերի իրաւական հիմնաւորումներ», ընդգծեց գլխաւոր դատախազը:
Եզրափակելով համաժողովի արդիւնքները՝ Հայաստանի Սահմանադրական դատարանի նախագահ Գագիկ Յարութիւնեան յայտարարեց, որ կը ստեղծուի յատուկ յանձնախումբ մը՝ Հայոց Ցեղասպանութեան հիմնախնդիրներու իրաւական թղթածրարը ամբողջականացնելու նպատակով:
«Հայոց Ցեղասպանութեան 100-րդ տարելիցին ընդառաջ» իրաւաբաններու համահայկական երկրորդ համաժողովը նաեւ որդեգրեց յայտարարութիւն մը, զոր կը ներկայացնենք անջատաբար:

 

LEAVE A REPLY

Please enter your comment!
Please enter your name here