ՆՈՐ ՑՈՅՑԵՐ ԹԱՔՍԻՄ ՀՐԱՊԱՐԱԿԻՆ ՄԷՋ

0
105

Թուրքիոյ մէջ անցնող շաբաթավերջին վերսկսան հակակառավարական ցոյցերը: Ցուցարարները Երկուշաբթի  երեկոյեան  վերադարձան Պոլսոյ կեդրոնը գտնուող Թաքսիմի հրապարակը:
Թրքական ոստիկանութիւնը «Կեզի» հանրապարտէզի մուտքին հաւաքուած ցուցարարներուն դէմ արցունքաբեր կազ օգտագործեց եւ ցրեց զանոնք: Ցուցարարները փորձեցին  մուտք գործել հանրապարտէզի տարածքը, սակայն Պոլսոյ քաղաքապետը նախազգուշացուց, որ իրաւապահները այդ պարագային պիտի դիմադրեն ցուցարարներուն:
Յիշեցնենք, որ անցեալ ամիս Թուրքիոյ Թաքսիմի հրապարակին վրայ ցուցարարները շուրջ երկու շաբաթէն աւելի բողոքի զանգուածային ցոյցեր կատարեցին Թուրքիոյ վարչապետ Ռեճէպ Թայիփ Էրտողանի դէմ՝ մեղադրելով երկիրը բռնապետութեան վերածելու յանցանքով:
Թուրքիոյ ներքին գործոց նախարար Մուամմար Կիւլէր, պատասխանելով ոստիկանութեան կողմէ ցուցարարներուն դէմ արցունքաբեր կազի օգտագործման մասին հարցումի մը՝ յայտնեց, որ Թաքսիմի հրապարակին վրայ ապօրինի ցոյցերը ցրուելու համար թրքական ոստիկանութեան միջամտութիւնը «բնական» կը նկատուի:
Թրքական «Հիւրրիյէթ» օրաթերթը հաղորդեց, որ Կիւլէր աւելցուցած է, թէ Թաքսիմի հրապարակին վրայ գտնուող «Կեզի» հանրապարտէզը հասարակութեան առջեւ բաց է, սակայն շեշտած է, որ կը մերժէ հանրապարտէզին մէջ հաւաքները, ցոյցերը եւ վրաններու զետեղումը:

 

LEAVE A REPLY

Please enter your comment!
Please enter your name here