ԵԳԻՊՏՈՍԻ ԸՆԴԴԻՄՈՒԹՒԻՒՆԸ ԿԸ ՄԵՐԺԷ ՆՈՐ ԿԱՌԱՎԱՐՈՒԹԵԱՆ ՏԱՐԱԶԸ

0
132

 Եգիպտոսի  ժամանակաւոր  նախագահ  Ատլի Մանսուր,  նախկին ելեւմտական հարցերու նախարար  Հազէմ  Պապլաուին հրաւիրեց   վարչապետի պաշտօնին, որպէսզի  կազմէ  երկրին նոր կառավարութիւնը: Պապլաուի  խոստացաւ  յառաջիկայ   24  ժամերուն ընթացքին  կազմել  նոր կառավարութիւն: Սալաֆական   թեքումով «Նուր» կուսակցութիւնը  ողջունեց  վարչապետի պաշտօնին  Պապլաուիի նշանակումը:  Մանսուր, արտաքին գործոց նախարարի պաշտօնին առաջարկեց   Աթոմական Ուժանիւթի Միջազգային  Գործակալութեան նախկին նախագահ   Մուհամմէտ Ալ Պարատէյի անունը: Իսլամական  Եղբայրակցութիւնը մերժեց կառավարութեան մաս կազմելու առաջարկները: Եգիպտոսի ազատականներու « Ազգային  Փրկութեան Ճակատ»ը   նոյնպէս  մերժեց ժամանակաւոր նախագահ Ատլի Մանսուրի  առաջարկած սահմանադրական հռչակագիրը: Նշենք, թէ  «Ազգային  Փրկութեան Ճակատ»ը կ’ընդգրկէ  36 կուսակցութիւն եւ կազմակերպութիւն:

   Սէուտական Արաբիա եւ Արաբական Միացեալ  Էմիրութիւններ խոստացան ութ միլիառ տոլար արժողութեամբ օգնութիւն առաքել Եգիպտոսին: Զօրակցական քայլի մը  մէջ, Էմիրութիւններու արտաքին գործոց նախարար շէյխ Ապտալլա Պըն  Զայէտ  այցելեց Գահիրէ եւ   հանդիպումներ  ունեցաւ իշխանութեան ներկայացուցիչներուն հետ: Ան  դարձաւ Մորսիի  դէմ  յեղաշրջումէն ետք, Գահիրէ այցելող առաջին  օտար  դիւանագէտը:

Եգիպտական ատեանը  ձերբակալման  հրամանագիր արձակեց Իսլամական Եղբայրակցութեան  տասը անդամներու դէմ:  Արտաքին գործոց  նախարարութիւնը  յայտարարեց, թէ  նախկին նախագահ Մոհամմէտ Մորսի  ապահով վայրի մը մէջ  կը գտնուի եւ ամբաստանութիւններ  չկան անոր դէմ:

Միւս կողմէ, Գահիրէի մօտ Թուրքիոյ դեսպան  Հիւսէյն  Պոսթանլը կանչուեցաւ   Եգիպտոսի արտաքին   գործոց  նախարարութիւն՝ կապուած Եգիպտոսի զարգացումներուն վերաբերեալ  Թուրքիոյ արձագանգներուն:  Դեսպանին  փոխանցուեցաւ   չմիջամտել Եգիպտոսի ներքին գործերուն:  

Իսրայէլի  պաշտպանութեան նախարար Մոշէ  Այալոն յայտնեց, թէ Եգիպտոսի անկայուն վիճակը  զգօնութիւն կը  թելադրէ  Իսրայէլին:

Եւրոպական  Միութեան մօտ Հարաւային Միջերկրականի  պատուիրակ  Պեռնարտօ  Լիոն    բացառեց  Եգիպտոսի մէջ  քաղաքացիական պատերազմ  ծագելու մտահոգութիւնները : Բրիտանական «Տէյլի Թելեկրաֆ» օրաթերթը կը գրէ, թէ  Եգիպտոս  յար ու նման է Սուրիոյ կացութեան:

LEAVE A REPLY

Please enter your comment!
Please enter your name here