ԹՈՄԱՍ ՏԸ ՎԱԱԼ ԱՆՀԱՒԱՆԱԿԱՆ ԿԸ ԳՏՆԷ ՊԱՏԵՐԱԶՄԻ ԸՆՏՐԱՆՔԸ

0
129

«Քարնըկի» հիմնարկի մասնագէտներէն Թոմաս Տը Վաալ արտայայտուած է Ատրպէյճանի, Ղարաբաղի ու Հայաստանի միջեւ շարունակուող հակամարտութեան մասին ու պաշտպանած է այն կարծիքը, թէ պատերազմ մը հաւանական չէ այս երեքին միջեւ, իսկ եթէ պատերազմ մը պայթի, ապա, այդ պարագային, հայերը պիտի ունենան երկու առաւելութիւն։
Նախ՝ իրենց լեռնային բնաշխարհը. լեռներու մէջ ինքնապաշտպանութիւնը աւելի դիւրին է քան յարձակումը, եւ հայերը ինքնապաշտպանութեան այս դիրքին մէջ զօրաւոր պիտի ըլլան։ Երկրորդ կէտն ալ այն է, որ հայերը շատ աժան գինով զէնք կը գնեն Ռուսիայէն։
Տը Վաալի համաձայն՝ պատերազմ մը հաւանական չէ, որովհետեւ այսպիսի պատերազմ մը երեքին միջեւ չի մնար, այլ կը տարածուի, քանի որ տարածաշրջանի երկիրները շահեր ունին այդտեղ։ Ան համոզուած է, որ խաղաղ միջոցներով հաշտութիւն մը կարելի է, սակայն շարք մը դժուարութիւններ կը մնան առկայ։ Իբր օրինակ՝ ան յիշեցուցած է, որ ատրպէյճանցիները շատ խիստ դիրք որդեգրած էին վիպագիր Աքրամ Այլիսլիի դէմ, որ հաշտութեան մասին խօսած էր։
Յայտնենք, թէ Թոմաս տը Վաալ հեղինակն է «Սեւ Այգի. Հայաստանն ու Ատրպէյճանը խաղաղութեան ու պատերազմի միջով» գիրքին (2003), որուն վերախմբագրուած տարբերակը անցեալ շաբաթ վերահրատարակուեցաւ: Ան «Քարնըկի» հիմնարկի Ռուսիոյ ու Եւրասիոյ ծրագիրներու աւագ վերլուծաբան մըն է:

 

LEAVE A REPLY

Please enter your comment!
Please enter your name here