ՄԱԼՔԱՐԱՅԻ ՀԱՅՈՑ ԳԵՐԵԶՄԱՆԱՏՈՒՆԸ ԳԻՆԵՏԱՆ ՎԵՐԱԾՈՒԵՑԱՒ

0
99

Պոլսահայ «Ակօս» շաբաթաթերթի Յուլիս 2-ի թիւին մէջ Էմրէ Էրթանի լոյս ընծայած «Մալքարայի հայոց գերեզմանատունը գինետան կը վերածուի» խորագրեալ յօդուածին մէջ կը հաղորդուի, որ Թեքիրտաղ-Մալքարայի քաղաքապետութեան ա-ճուրդի հանած Մալքարայի հայոց գերեզմանատունը շահած է տեղւոյն Արդարութիւն եւ Բարգաւաճում կուսակցութեան վարչականներէն Տեմիրալի Փալա, որ զայն պիտի վերածէ սրճարանի, գինետան եւ գիշերային զբօսավայրի:
Այս նիւթին վերաբերեալ յաւելեալ տեղեկութիւն տուած է լրագրող-ուսումնասիրող Իւմիթ Պայազօղլու, ըստ որուն՝ Մալքարայի հայկական համայնքէն այսօր մնացած է միմիայն փլատակ Ս. Թորոս եկեղեցին եւ թալանուած գերեզմանատունը. ան աւելցուցած է, թէ մինչեւ 70-ականներու աւարտը եկեղեցին վարձու կը տրուէր իբրեւ շարժապատկերի եւ հարսանիքի սրահ, ապա 80-ական եւ 90-ականներուն՝ անիկա գործածուեցաւ իբրեւ արմտիքի շտեմարան, իսկ վերջին տասը տարիներուն ամբողջովին լքուեցաւ՝ փլուզումի ենթարկուելով. Պայազօղլու նշած է, որ փլուզումը արագացնելու նպատակով եկեղեցւոյ տանիքը քանդած են, այդ պատճառով ալ ձիւնը ու անձրեւը կը տեղային եկեղեցւոյ ներքնամասը. այժմ մնացած է միայն չորս պատ:
Ինչ կը վերաբերի հայոց գերեզմանատան՝ Պայազօղլու ըսած է, որ 50ական եւ 60-ականներուն անիկա տակնուվրայ եղաւ գանձ փնտռողներու կողմէ, ապա քաղաքապետարանին հրահանգով, շիրմաքարերը տեղահանուելով՝ գործածուեցան իբրեւ կոյուղիներու կափարիչ:
Պայազօղլու հետեւեալ ձեւով ներկայացուցած է այժմու վիճակը. «Արդէն սկսած է պեթոնապատման աշխատանքը. իսկ շինարարութեան համար պեղումներու ընթացքին յայտնաբերուած ոսկորներն ու քարերը նետուած են աղբանոց»:

 

LEAVE A REPLY

Please enter your comment!
Please enter your name here