ԵԱՀԿ-Ի ԱՄԵՐԻԿԱՑԻ ՀԱՄԱՆԱԽԱԳԱՀԸ ՄԱՐԴՈՒ ԻՐԱՒՈՒՆՔՆԵՐԸ ՅԱՐԳԵԼՈՒ ԿՈՉ Կ’ՈՒՂՂԷ ՊԱՔՈՒԻՆ

0
127

Ատրպէյճանական «Contact.az» կայքը  հաղորդեց, որ ԵԱՀԿ-ի մօտ Միացեալ Նահանգներու դեսպան եւ Մինսքի խմբակի ամերիկացի համանախագահ Իան Քելի, Ատրպէյճանի իշխանութիւններուն՝ մարդու իրաւունքներու պաշտպանութեան մարզին մէջ ԵԱՀԿ-ի առջեւ ստանձնած իրենց պարտաւորութիւնները ամբողջութեամբ կատարելու կոչ  ուղղած է:
Աւստրիոյ մայրաքաղաք Վիեննայի մէջ կայացած ԵԱՀԿ-ի մնայուն խորհուրդի նիստին ընթացքին, Քելի ըսած է, որ Ատրպէյճանի մէջ քաղաքացիական հասարակութեան հիմնարկները, կուսակցութիւնները, մամլոյ ներկայացուցիչներն ու իրաւապաշտպանները իշխանութիւններուն կողմէ ճնշումներու կ՛ենթարկուին:
«Մենք Ատրպէյճանի իշխանութիւններուն կոչ կ՛ուղղենք՝ խօսքի, հաւաքներու, միութիւններ կազմելու ազատութեան իրաւունքները երաշխաւորելու առնչութեամբ ստանձնած իրենց պարտաւորութիւնները կատարելու», ըսած է ան:
Ամերիկացի դիւանագէտը նաեւ մտահոգութիւն յայտնած է «Ազատ միտքի համալսարան» կեդրոնը փակելու, ՆԻՏԱ շարժումի գործիչներու, ինչպէս նաեւ յայտնի ընդդիմադիր գործիչ ու Հանրապետական այլընտրանք շարժումի ղեկավար Իլկար Մամետովի ձերբակալութեան կապակցութեամբ:
Քելի անդրադարձած է նաեւ Պաքուի մէջ ԵԱՀԿ-ի առաքելութեան լիազօրութիւնները նուազեցնելու Ատրպէյճանի իշխանութիւններուն մտադրութեան եւ կոչ ուղղած է պահպանելու գործող կարգավիճակը:
ԵԱՀԿ-ի մօտ Միացեալ Նահանգներու ներկայացուցիչը Պաքուն նաեւ յորդորած է ԵԱՀԿ-ի ժողովրդավարական հաստատութիւններու, մարդկային իրաւանց գրասենեակի եւ խորհրդարանական վեհաժողովի ներկայացուցիչները հրաւիրել Ատրպէյճան՝ Հոկտեմբեր 2013-ին նախատեսուած նախագահական ընտրութիւններուն հսկելու համար:

LEAVE A REPLY

Please enter your comment!
Please enter your name here