ՀԱԼԷՊ ԿԸ ՄՆԱՅ ՇՐՋԱՓԱԿՈՒԱԾ

0
135

Հալէպի նահանգապետ Մուհամմատ Վահիտ Աքքատ հաստատեց, որ նահանգ հասցուած է  մեծ քանակով ալիւր եւ վառելանիւթ: Ասիկա թոյլ պիտի տայ լուծելու բնակչութիւնը հացով ապահովելու խնդիրը: Կ’ենթադրուէր  նաեւ, որ երէկ  Յուլիս 11-ին  Հալէպ հասնէր  զանազան պարէնամթերք: Այս մասին հաղորդեց  սուրիական  ՍԱՆԱ տեղեկատուական գործակալութիւնը: Նահանգապետը ընդգծեց , որ ծայրայեղականներու  յանցաւոր գործունէութեան իբրեւ արդիւնք՝ Հալէպի մէջ ստեղծուած է բարդ իրավիճակ: Ծայրայեղականները  Հալէպի  մէջ ոչնչացուցած են  սննդանիւթի  աւելի քան 1000 գործարան:

Հալէպի,  Ալ-Ռաշիտին, Ալ-Հալտիյա, Պուսթան ալ-Քասր թաղամասերուն, ինչպէս նաեւ Սալահ-էտտին հրապարակի մօտակայքը՝ ծայրայեղականներու  եւ կառավարական բանակին  միջեւ տեղի կ’ունենան ծանր  բախումներ:

 Սուրիոյ վարչապետ Ուայէլ ալ-Հալիքի, Դամասկոսի մէջ  գլխաւորեց  տնտեսական յանձնաժողովի նիստին, ուր քննարկուեցան ներքին շուկային մէջ լայն սպառման ապրանքներու եւ պարենամթերքի սակագիներուն  չարաշահութիւնը կանխելու վերաբերող  հարցեր:

 Հալէպի մէջ  կը տիրէ  մտահոգիչ կացութիւն։ Արդարեւ, քաղաքին շրջափակման պատճառով բնակիչները կը գտնուին սնունդ ապահովելու անկարելիութեան դէմ յանդիման։ Սուրիական երբեմնի տնտեսական մայրաքաղաքը այսօր կը գտնուի կենցաղային պարագաներու ապահովման մեծ դժուարութեան դէմ յանդիման։
«Արմէնփրէս»ին հետ ունեցած զրոյցին ընթացքին հալէպահայ «Գանձասար» շաբաթաթերթի աշխատակիցներէն Զարմիկ Պողիկեան փոխանցած է. «Սովորաբար Հալէպի շրջակայ գիւղերը քաղաքին կը մատակարարէին սննդամթերք՝ բանջարեղէն, պտուղ, կաթնեղէն, ալիւր, սակայն շրջափակման պատճառով եօթը օր է, որ սննդամթերք չի գար Հալէպ»։ Անոր համաձայն, Հալէպի առատ շուկաները այսօր դատարկուած են, խանութներուն մեծամասնութիւնը փակ է, շատ քիչ թիւով փուռեր կը շարունակեն գործել, որովհետեւ ալիւր չկայ։ Քաղաքին մայրուղիները փակ են, այդ պատճառով ալ վառելանիւթի, դեղորայքի եւ այլ կենսական իրերու չգոյութիւն կայ, իսկ բժիշկներուն մեծ մասը լքած է քաղաքը։ Այս բոլորին վրայ կ՛աւելնայ այն, որ սուրիական դրամի արժէքի անկման իբրեւ հետեւանք ահաւոր սղաճ կայ։
«Պարէնին գինը եռապատկուած է, վառելանիւթը՝ տասնապատկուած։ Արդէն մէկ տարիէ ի վեր անգործ ժողովուրդը այսօր կը դժուարանայ հոգալ իր ապրուստի կենսական կարիքները։ Դժուար է կացութիւնը յատկապէս բազմանդամ ընտանիքներու պարագային», յայտնած է Պողիկեան։ Անոր համաձայն, ելեկտրականութիւնն ու ջուրը յաճախ կ՛ընդհատուին, իսկ քաղաքին մէջ զինեալ բախումներն ու անկանխատեսելի պայթումները կը սպառնան խաղաղ բնակչութեան կեանքին։
«Հալէպահայութեան Շտապ օգնութեան մարմինն ու բարեսիրական միութիւններ կը շարունակեն օգնել մեր հայրենակիցներուն՝ ամսական դրութեամբ կարիքաւորներուն սնունդ հայթայթելով, ինչպէս նաեւ ծառայողական տարբեր տեսակի աշխատանքներ տանելով, օրինակ՝ բժշկական ծառայութիւններ մատուցանելով, վիրաւորները խնամելով բախումներու գօտիին մէջ ապրող հայութեան փոխադրութիւն այլ շրջաններ եւ այլն», յայտնած է Զարմիկ Պողիկեան։

LEAVE A REPLY

Please enter your comment!
Please enter your name here