ՁԵՐԲԱԿԱԼՄԱՆ ՀՐԱՄԱՆԱԳԻՐ ԻՍԼԱՄԱԿԱՆ ԵՂԲԱՅՐԱԿՑՈՒԹԵԱՆ ՂԵԿԱՎԱՐՆԵՐՈՒ ԴԷՄ

0
111

Եգիպտոսի բանակին հովանիին տակ գործող ժամանակաւոր իշխանութիւնները հրամանագիր մը արձակեցին ձերբակալելու  Իսլամական  Եղբայրակցութեան բարձրաստիճան ղեկավարները՝ զանոնք պատասխանատու նկատելով այս շաբաթասկիզբը տեղի ունեցած ցոյցերուն, որոնց ընթացքին սպաննուած էին բանակին կողմէ պաշտօնազրկուած նախագահ Մոհամմէտ Մորսիի 55 համակիրներ:
Իսլամական  Եղբայրակցութեան  պաշտօնատարները դատապարտեցին ձերբակալութեան հրամանագիրը՝ միաժամանակ մերժելով Եգիպտոսի ժամանակաւոր նախագահ Ատլի Մանսուրի կողմէ նոր ընտրութիւններու համար ճշդուած ժամանակացոյցին հրամանագիրը՝ զայն «անօրինական» որակելով:
Հրամանագիրը ժամանակաւոր նախագահը կը լիազօրէ նոր կառավարութեան հետ խորհրդակցելէ ետք՝ նոր օրէնքներ հրապարակելու եւ 15 օրուան ընթացքին սահմանադրութիւնը վերատեսութեան ենթարկելու համար յանձնախումբ մը կազմելու:
Ըստ հրամանագիրին՝ նախագահը, սահմանադրութեան բարեփոխման ծրագիրի հրապարակումէն ոչ աւելի քան երկու ամիս ետք, խորհրդարանական ընտրութիւններ պիտի հրաւիրէ:
Միւս կողմէ, Թուրքիոյ փոխվարչապետ եւ կառավարութեան խօսնակ Պիւլենտ Արընչ եգիպտական բանակի միջամտութիւնը բուռն կերպով դատապարտելէ ետք՝ ըսաւ, որ Թուրքիա պիտի շարունակէ եգիպտացի ժողովուրդին եւ ընտրուած նախագահ Մորսիի իր զօրակցութիւնը, եւ աւելցուց, թէ Մորսի պէտք է իր պաշտօնին վերատիրանայ, իսկ բոլոր ձերբակալուած ղեկավարները պէտք է ազատ արձակուին:

 

LEAVE A REPLY

Please enter your comment!
Please enter your name here