ՃՈՄՊԼԱԹ՝ ԵՐԿԻՐԸ ԱՄԲՈՂՋՈՒԹԵԱՄԲ ԱՐԳԵԼԱԿՈՒԱԾ Է

0
110

Ընկերվար   Յառաջդիմական  Կուսակցութեան պետ Ուալիտ Ճոմպլաթ  իր  անհանգստութիւնը  յայտնեց  տիրող կացութենէն,    ընդգծելով, թէ Պիր Էլ Ապըտի   պայթումը  ուղղուած էր բոլորին:  Ճոմպլաթ դատապարտեց  Սայտայի եւ Թրիփոլիի մէջ ապահովական  խլրտումներ ստեղծող կողմերը.« Եթէ այսպէս շարունակենք, այնպիսի կացութեան մը առջեւ պիտի  գտնուինք, որ  պիտի  չգիտնանք թէ  ու՞ր կրնայ հասցնել  մեզի եւ  ինչպէ՞ս կրնայ վերջանալ». զգուշացուց ան:  Ճոմպլաթ միաժամանակ  ընդգծեց, թէ  Հըզպալլա կը պահանջէ  արգելակող մէկ երրորդի  լիազօրութիւն, անոր այս պահանջը կը խանգարէ  կառավարութեան կազմութիւնը:  Ճոմպլաթ  դիտել տուաւ, թէ  երկիրը ամբողջութեամբ արգելակուած է   հակադիր կեցուածքներու եւ նախապայմաններու  միջեւ: Ան  նշեց, թէ կը  հաւատայ   Թամամ Սալամի  խօսքերուն, երբ վերջինս  կը յայտնէ, թէ ինք պիտի  մնայ  բոլորին երաշխաւորը: Ճոմպլաթ նշեց, թէ  քաղաքացին կը տառապի  քաղաքական, ապահովական,  ընկերային, կենցաղային   տագնապներու մէջ՝ անհրաժեշտ է  դուրս  գալ  ներկայացուցչական  չափերէն եւ   նպաստել նոր կառավարութեան կազմութեան:

LEAVE A REPLY

Please enter your comment!
Please enter your name here