ՄՈՐՍԻԻ ԿՈՂՄՆԱԿԻՑՆԵՐԸ ՀՈԾ ՀԱՒԱՔՆԵՐ ՊԻՏԻ ԿԱԶՄԱԿԵՐՊԵՆ ՈՒՐԲԱԹ

0
104

Միացեալ Նահանգներու նախարար   Պարաք Օպամա պահանջեց  վերանայիլ Եգիպտոսին ցուցաբերուող օժանդակութեան:  Օպամա իր վարչակարգէն  գնահատական  պահանջեց  Եգիպտոսի իրադարձութիւններուն  վերաբերեալ: Պետական քարտուղարութեան խօսնակ  Ճեն Փսաքի  յայտնեց, թէ  Եգիպտոսի մէջ տեղի ունեցած  իրադարձութիւնները  չպէտք է դիտել իբրեւ  յեղաշրջում:  Սակայն ան   աւելցուց,  թէ ժամանակի կը կարօտի   իրավիճակին մասին լիարժէք  գնահատական  տալու  համար: Պսաքի  ընդգծեց, թէ  պետական քարտուղարութիւնը յստակ  ազդանշան  ղրկած է  Եգիպտոսի հակամարտութեան  բոլոր կողմերուն՝ բռնութեան մակարդակը նուազեցնելու եւ  ժողովրդավարական գործընթացին մասնակցելու մասին:

Ռուսիոյ  արտաքին գործոց նախարար  Սերկէյ Լաւրով յայտարարեց, թէ  Միջին Արեւելքի եւ  իսլամական աշխարհի կայունութիւնը  մեծապէս   կախեալ է Եգիպտոսի  կացութենէն:

 Արդարութիւն եւ  Ազատութիւն կուսակցութեան ղեկավարներէն  Մուհամմէտ Պալթաճի, Ուրբաթ օրուան համար հոծ  շարքերով բողոքի   հաւաքներու հրաւիրեց  Մորսիի կողմնակիցները՝ պաշտպանելու օրինականութիւնը եւ  վերականգնելու  Մորսիի իշխանութիւնը  Պալթաճի  յայտնեց, թէ   Իսլամական Եղբայրակցութեան առջե   18 օր կը մնայ  վերականգնելու Մորսիի իշխանութիւնը:

Եգիպտոսի բանակին հովանիին տակ գործող ժամանակաւոր իշխանութիւնները հրամանագիր մը արձակեցին ձերբակալելու  Իսլամական  Եղբայրակցութեան բարձրաստիճան ղեկավարները՝ զանոնք պատասխանատու նկատելով այս շաբաթասկիզբը տեղի ունեցած ցոյցերուն, որոնց ընթացքին սպաննուած էին բանակին կողմէ պաշտօնազրկուած նախագահ Մոհամմէտ Մորսիի 55 համակիրներ:
Իսլամական  Եղբայրակցութեան  պաշտօնատարները դատապարտեցին ձերբակալութեան հրամանագիրը՝ միաժամանակ մերժելով Եգիպտոսի ժամանակաւոր նախագահ Ատլի Մանսուրի կողմէ նոր ընտրութիւններու համար ճշդուած ժամանակացոյցին հրամանագիրը՝ զայն «անօրինական» որակելով:
Հրամանագիրը ժամանակաւոր նախագահը կը լիազօրէ նոր կառավարութեան հետ խորհրդակցելէ ետք՝ նոր օրէնքներ հրապարակելու եւ 15 օրուան ընթացքին սահմանադրութիւնը վերատեսութեան ենթարկելու համար յանձնախումբ մը կազմելու:

Թուրքիոյ փոխվարչապետ եւ կառավարութեան խօսնակ Պիւլենտ Արընչ եգիպտական բանակի միջամտութիւնը բուռն կերպով դատապարտելէ ետք՝ ըսաւ, որ Թուրքիա պիտի շարունակէ եգիպտացի ժողովուրդին եւ ընտրուած նախագահ Մորսիի իր զօրակցութիւնը, եւ աւելցուց, թէ Մորսի պէտք է իր պաշտօնին վերադառնայ, իսկ բոլոր ձերբակալուած ղեկավարները պէտք է ազատ արձակուին:

Զինեալներ երէկ առաւօտեան յարձակեցան հիւսիսային  Սինայի  Արէյշ  քաղաքին մէջ  տեղակայուած եգիպտական բանակի  անցակէտին վրայ:

LEAVE A REPLY

Please enter your comment!
Please enter your name here