ԲՐԻՏԱՆԻԱ ԿԸ ԴԱԴՐԵՑՆԷ ԾԱՅՐԱՅԵՂԱԿԱՆՆԵՐՈՒՆ ԱՌԱՔՈՒՈՂ ՌԱԶՄԱԿԱՆ ՕԳՆՈՒԹԻՒՆԸ

0
116

 Մեծն Բրիտանիոյ  խորհրդարանը  վարչապետ  Տէյվիտ Գամերոնը  լիազօրեց  վեթոյի իրաւունքը  օգտագործել՝ Սուրիա   զէնք մատակարարելու մասին  ներկայացուող որոշումներուն վերաբերեալ:   Սոյն  որոշումին պատճառը Պահպանողական կուսակցութեան  մտահոգութիւնն է, որ  ընդդիմութիւնը զինելը պիտի  հանգեցնէ  հակամարտութեան սրման, իսկ  զէնքը պիտի յայտնուի  ծայրայեղականներու  ձեռքը:  Գամերոն եւ  արտաքին գործոց նախարար  Ուիլիյըմ Հէյկ յայտարարեցին, թէ  քաղաքական եւ  խաղաղ լուծում  կը  փափաքին Սուրիոյ հակամարտութեան:

Միացեալ Նահանգներու փոխնախագահ Ճօ Պայտըն եւ  Իրաքի վարչապետ Նուրի Մելիքի  հեռախօսային զրոյցի մը  ընթացքին քննարկեցին Սուրիոյ իրավիճակը:  Անոնք  շեշտեցին  հակամարտութեան քաղաքական  լուծում մը գտնելու անհրաժեշտութիւնը:

Հալէպի Աւետարանական համայնքի նախագահ վերապատուելի  Իպրահիմ  Նասիր յայտարարեց, թէ  ռումբերով եւ  զէնքերով  ժողովուրդին վրայ յարձակում կատարող ծայրայեղական կազմակերպութիւնները,  ապրուստի եւ պատառ մը հացի վրայ կը  յարձակին ներկայիս:  Նասիր նշեց, թէ  Հալէպի բնակչութիւնը անմիջական  օժանդակութեան անհրաժեշտութիւն  ունի, որովհետեւ ուտեստեղէնի եւ կենցաղային իրերու  սակերը  անսանձելի  մագլցում կ’արձանագրեն: «Պաշարումին հետեւանքով,  կաթնեղէնը,   կանաչեղէնը, դարձած են անգտանելի». հաւաստեց Նասիր, աւելցնելով  թէ  ծայրայեղականները  յատկապէս քրիստոնէական շրջանները դարձուցած են  թիրախ: Ան ընդգծեց, թէ Հալէպի   բնակիչները գիտակցաբար կը դիմադրեն  դժուարութիւնները, բայց կառչած պիտի մնան  օրինական  կառավարութեան եւ բանակին: Անմիջական   օգնութեան անհրաժեշտութիւն ունի  Հալէպի բնակչութիւնը:

Ճշգրիտ պատկերացում մը տալու համար Հալէպի իրավիճակին մասին՝ նշենք, որ Հալէպ մէկ տարի է ի վեր բաժնուած է երկու մասի՝ արեւելեան մասը ընդդիմութեան իշխանութեան տակ է, արեւմտեան մասը՝ իշխանութեան։ Արեւմտեան բաժինին մէջ են նաեւ հայաբնակ թաղամասերը, որոնք սահմանակից են ընդդիմութեան իշխանութեան տակ եղող արեւելեան Հալէպին, այսինքն` հայկական թաղամասերը իշխանութեան հովանաւորութեան տակ ըլլալով հանդերձ՝ շատ մօտ են ընդդիմութեան հովանաւորութեան տակ գտնուող Հալէպի միւս բաժինին, հետեւաբար մեր հայրենակիցները միշտ շատ մօտ են դիպուկահարներու թիրախին։

Հալէպի երկու բաժիններուն միջեւ կայ միայն մէկ անցք, ուրկէ արեւելեան շրջանէն սնունդ կը մտնէր արեւմտեան շրջան, կամ քաղաքացիներ, որոնք գործով արեւելեան կողմէն երեւելեան շրջան կ’ուզեն գալ, պէտք է անցնին այդ անցքէն, որ հինգ օր փակուելէն ետք, Չորեքշաբթի՝ Յուլիս 10-ին, վերաբացուեցաւ եւ այնտեղէն սկսաւ որոշ չափով սնունդ հասնիլ ժողովուրդին: Այսուամենայնիւ այդ անցքը ժամանակ առ ժամանակ կը փակուի ընդդիմութեան կողմէ։ Ընդդիմութեան իշխանութեան տակ գտնուող Հալէպի բնակչութիւնը երկու օր շարունակ մեծ ցոյցեր կազմակերպեց՝ ի նպաստ Հալէպի միւս բաժինի ժողովուրդին, պահանջելով ընդդիմութենէն, որ վերաբանայ  անցքը եւ սնունդ հասցնեն այնտեղ ապրող քաղաքացիներուն, ցուցարարները առաւել զայրացած էին, որ ընդդիմադիր զինեալները հաց եւ միս կը թափեն իրենց ապրած շրջանին մէջ եւ այդ մէկը կը հակասէ իսլամական օրէնքներուն, մինչ միւս կողմի բնակչութիւնը զրկուած է  նուազագոյն սնունդէն: ։

Ռազմական գետնի վրայ, Ալ Քայիտայի զինեալները  սպաննեցին այսպէս կոչուած սուրիական ազատ բանակի  հրամանատարութեան  ղեկավարներէն  Քամալ  Խամամին: Սուրիոյ կառավարական զօրքերուն դէմ կռուող Ճեպհէթ ալ Նուսրա իսլամիստ խմբաւորումը եւ Ալ Քայիտա կը փորձեն  իսլամական  իշխանութիւն ստեղծել Սուրիոյ մէջ: Ազատ բանակի  խօսնակ մը յայտնեց, թէ սպանութիւնը Քայիտայի կողմէ  պատերազմի յայտարարութիւն մըն է:

 

LEAVE A REPLY

Please enter your comment!
Please enter your name here