ՊՈՒԱՅԷ ԿՈՉ Կ’ԸՆԷ ՀՈԼԱՆՏԻՆ՝ ՎԵՐՋ ՏԱԼՈՒ ՑԵՂԱՍՊԱՆՈՒԹԵԱՆ ՀԱՐՑՈՎ ԵՐԿԵՐԵՍԱՆԻ ԽԱՂԵՐՈՒՆ

0
130

Ֆրանսայի նախագահ Ֆրանսուա Հոլանտ պէտք է դադրեցնէ Հայկական Ցեղասպանութեան ուրացումը քրէականացնող օրէնքի վաւերացման հարցով իր երկերեսանի խաղը. Յունաստանի «Ազատ օր» թերթին տուած հարցազրոյցի մը ընթացքին նշած է Ֆրանսայի խորհրդարանի անդամ եւ Հայկական Ցեղասպանութեան ուրացումը քրէականացնող օրինագիծի հեղինակ Վալերի Պուայէ: Ան ըսած է, որ Ֆրանսայի իշխանութիւնները այժմ չեն փորձեր նոյնիսկ ցոյց տալ, թէ գործնական քայլեր կը կատարեն այս գծով:
«Նախագահ Ֆրանսուա Հոլանտ 2012-ի Ապրիլ 24-ին, Ֆրանսայի նախագահական ընտրութիւններէն առաջ, խոստացած էր զբաղիլ այդ հարցով: Այդ խոստումին համաձայն՝ մինչեւ 2013-ի Ապրիլ 24 պէտք է վաւերացուած ըլլար Ցեղասպանութեան ժխտումը քրէականացնող օրէնքը: Սակայն բոլորս ականատես եղանք, որ խոստումը չկատարուեցաւ, եւ այս տարի Ապրիլ 24-ը նշուեցաւ՝ առանց օրէնքի կիրառման: Հոլանտ դրժեց իր խոստումը եւ աւելին՝ Էլիզէ պալատին մէջ սեղմեց Ատրպէյճանի նախագահին ձեռքը: Այդ երկերեսանի խաղը պէտք է աւարտի», ըսած է ան:
Պուայէ նշած է նաեւ, որ օրէնքը միայն Հայկական Ցեղասպանութեան չի վերաբերիր, այլ պէտք է ընդգրկէ բոլոր ցեղասպանութիւնները, որոնք վաւերացուած են Ֆրանսայի կողմէ: «Ցեղասպանութեան հարցը պէտք է շատ արագ լուծուի», աւելցուցած է ֆրանսացի պատգամաւորը:
«Դիմած եմ խորհրդարանի նախագահին եւ տարբեր քաղաքական խմբակցութիւններու, որպէսզի վերաքննենք ցեղասպանութիւններու վերաբերող օրէնքը եւ յստակացնենք Ցեղասպանութեան ժխտողականութեան վերաբերեալ դիրքորոշումը: Մենք չենք կրնար բաւարարուիլ Սահմանադրական խորհուրդի միակողմանի դիրքորոշումով», եզրակացուցած է ան:

 

LEAVE A REPLY

Please enter your comment!
Please enter your name here