ՍԹՐԵԹԸՃԻ ՓԷՅՃ .« ԱՏՐՊԷՅՃԱՆ ՊԷՏՔ Է ՆԿԱՏԻ ՈՒՆԵՆԱՅ ՀԱՅԵՐՈՒՆ ՊԱՏԵՐԱԶՄԵԼՈՒ ԴԱՐԱՒՈՐ ՓՈՐՁԱՌՈՒԹԻՒՆԸ»

0
132

Հայաստանեան լրատու գործակալութիւններ թարգմանաբար ներկայացուցած են հատուածներ վերլուծական այն յօդուածէն, որ լոյս տեսած է «Սթրեթըճի Փէյճ» կայքին վրայ եւ որուն մէջ կը ներկայացուին Ղարաբաղի հակամարտութեան վերջին զարգացումներն ու հաւանական պատերազմի մասին մեկնաբանութիւններ։ Ստորեւ՝ այդ բաժինը.
Հայաստանի ու Ատրպէյճանի միջեւ 19-ամեայ զինադուլին շնորհիւ կարելի եղաւ Ղարաբաղի հողատարածքին մօտաւորապէս 75 տոկոսը մաքրել՝ շուրջ 88 հազար ականներէ եւ այլ զինամթերքներէ, որոնք չեն պայթած։ Փոքրիկ Լեռնային Ղարաբաղը ամբողջութեամբ ականազերծելու համար, կը պահանջուի տասնամեակ մը եւս։
Հայաստան ու Ատրպէյճան հակամարտութեան մէջ են Ղարաբաղի համար, որ 4400 քառակուսի մեթր տարածքով, ամբողջութեամբ հայաբնակ հողատարածք մըն է։
Ատրպէյճան 95 առ հարիւր համեմատութեամբ իսլամական երկիր է, եւ թէեւ եռապատիկ կը գերազանցէ Հայաստանին՝ իր բնակչութեան թիւով, եւ աւելի հարուստ պետութիւն է՝ քարիւղին շնորհիւ, հայեր աւելի լաւ զինուորներ են։ Հակամարտութեան լուծումը այս շրջանին անելի մատնուած է, բայց ատրպէյճանցիները յիմար չեն ու նկատի պէտք է ունենան, որ հայերը շատ լաւ մարտիկներ են, իսկ Ռուսիան Հայաստանի ռազմավարական գլխաւոր դաշնակիցն է։ Երկու տարի առաջ Հայաստան ապահովական մարզի մէջ համաձայնագիր մը ստորագրեց Ռուսիոյ հետ։
Վերջին քանի մը տարիներուն ընթացքին Ատրպէյճան աւելի քան 5 միլիառ արժողութեամբ զէնք ու սպառազինութեան նոր սարքեր գնած է Իսրայէլէն եւ Ռուսիայէն։ Պաշտօնապէս այդ բոլորը նախատեսուած է Հայաստանի դէմ հաւանական պատերազմի համար։ Սակայն միլիառները կը ծախսուին նաեւ ռազմածովային սպառազինութեան ու հակաօդային պաշտպանութեան համար, ինչ որ Իրանէն պաշտպանուելու նպատակ կը հետապնդէ։
Ատրպէյճան լուրջ ջանքեր կը ներդնէ արդիւնաւէտ բանակ մը ստեղծելու եւ երկրին տնտեսութիւնը զարգացնելու համար։ Ատրպէյճանի պարտութիւն՝ կազմակերպեալ հայկական զօրքերուն դէմ, գլխաւորաբար ատրպէյճանական վարչական փտախտի եւ երկպառակութեան հետեւանք էր։ Բացի ատկէ, հայեր դարերէ եկած ռազմական աւանդութիւններ ունին։ Ատրպէյճան մեծ ջանք կը գործադրէ ռազմական հաւասարակշռութիւնը վերականգնելու համար, այստեղէն ալ կը բխի Հայաստանի՝ Ռուսիոյ հետ միութեան պահանջը եւ ատրպէյճանական ռազմական ծախսերու կտրուկ բարգաւաճումը։ Այնուհանդերձ, Հայաստան պէտք է անհանգստանայ միակ թշնամիի մը առումով, իսկ Ատրպէյճան պէտք է խորհի թէ՛ Հայաստանի եւ թէ Իրանի մասին։

 

LEAVE A REPLY

Please enter your comment!
Please enter your name here