ՖՐԱՆՍԱ ԱՇԽԱՐՀԻ ԵՐԻՏԱՍԱՐԴԱԿԱՆ ԱԽՈՅԵԱՆ

0
138

Ֆութպոլի աշխարհի մինչեւ 20 տարեկաններու առաջնութիւնը  վերջ գտաւ Ֆրանսայի  յաղթանակով:  Աւարտական  մրցումին, ֆրանսացիները   փենալթի հարուածներու   շնորհիւ պարտութեան մատնեցին  Ուրուկուէյը:  Մրցումին սովորական  90 վայրկեանները   0-0 հաւասարութեամբ  վերջ գտնելէ ետք, ֆրանսացիները   յաջողեցան աւելի դիպուկ իրականցնել  փենալթի հարոածները:   Կանա գրաւեց   երրորդ դիրքը՝ 3-0 արդիւնքով պարտութեան մատնելով Իրաքը:

 

ՎԱԼՓՈՒԵՆԱ ՊԱՐՉԵԼՈՆԱՅԻ ՑՈՒՑԱԿԻՆ ՄԷՋ

Ֆրանսայի ազգային  խումբի  եւ Մարսէյի կիսապաշտպան Մաթիէ Վալփուենա ընդգրկուեցաւ  Պարչելոնայի   փոխանցումներու ցուցակին մէջ:  28-ամեայ  ֆրանսացիին համար սպանական ակումբը պատրաստ է  վճարելու  15  միլիոն եուրօ գումար  մը:  Վալփուենա,  ընթացիկ տարեշրջանին Մարսյէի շապիկով կատարեց   37  մրցում եւ նշանակեց   երեք կոլ:

ԿՈՒԱՐՏԻՈԼԱ ԿԸ  ՀԵՏԱՊՆԴԷ  ՕԶԻԼԸ

 Ռէալ  Մատրիտի եւ Գերմանիոյ հաւաքականի միջնապահ Մեսուտ Օզիլ ինկած է  Պայերն Միւնիխի  հետաքրքրութեան ոլորտէին մէջ:  Մարզիչ Խօսէպ Կուարտիոլա կը փափաքի իր կազմին մէջ տեսնել  24-ամեայ միջնապահը:  Աւելի վաղ, կ’ըսուէր, թէ  պաւարիական ակումբը կը  հետապնդէր Պարչելոնայի երիտասարդ միջնապահ  Թիակօ Ալքանթարան:

ԱՆՃԵԼՈԹԻ  ՊԱՇՏՕՆԱՊԷՍ ՍՏԱՆՁՆԵՑ   ՌԷԱԼԸ

Ռէալ Մատրիտի   նորանշանակ մարզիչ  Գառլօ Անճելոթի  ժամանեց  Սպանիա եւ  պաշտօնապէս ստանձնեց Ռէալի գլխաւոր մարզիչի պարտականութիւնները:   Անճելոթի  իրեն  օգնական նշանակած է անգլիացի  Փօլ Գլիմենթը: Ռէալի ֆիզիքական պատրաստութեան  մարզիչ  նշանակուեցաւ  իտալացի  Ճիովանի  Մաուրին: Իտալացիին  օգնականներէն պիտի ըլլայ ֆրանսացի առասպելական ֆութպոլիստ  Զինէտտին Զիտանը: Անճելոթի երեք  տարուան պայմանագրութիւն մը  կնքեց  Ռէալի հետ:

ՎԻԼԱ ՊԻՏԻ  ԿՐԷ ՖԱԼՔԱՈՅԻ  ՇԱՊԻԿԸ

 Վերջերս  Աթլեթիքօ Մատրիտի  միացած Սպանիոյ  հաւաքականի   յարձակող Տաւիտ  Վիլա պիտի կրէ   Ռատամէլ  Ֆալքաոյի  թիւ  9-ը շապիկը:  31-ամեայ ֆութպոլիստը  փոխան    հինգ միլիոն   եուրօ  գումարի մը  Պարչելոնայէն միացաւ  Աթլեթիքոյի:

ՇԹԻԿԼԻՑ ՊԱՀՊԱՆԵՑ  ՏԻՏՂՈՍԸ

Արհեստավարժ  բռնցքամարտի  գերմիջին ծանրութեան կարգի WBO վարկածով  աշխարհի ախոյեան  Ռոպերթ Շթիկլից  պահպանեց իր տիտղոսը՝  պարտութեան մատնելով   ճափոնցի  Եուզօ Քիոթային:  Գերմանիոյ Տրեզտէն  քաղաքին մէջ,  31-ամեայ Շթիկլից   10-րդ  ռաունտին,  թեքնիքական «նոքաութ»ով  պարտութեան մատնեց իր մրցակիցը:  Նշենք, թէ Շթիկլից հայազգի  Արթուր Ապրահամէն  խլած էր  աշխարհի ախոյեանի տիտղոսը:

ՓՕԼ  ՓՈԿՊԱ՝ ԱՇԽԱՐՀԻ ԵՐԻՏԱՍԱՐԴԱԿԱՆ  ԱՌԱՋՆՈՒԹԵԱՆ  ԼԱՒԱԳՈՅՆ ՖՈՒԹՊՈԼԻՍՏ

Եուվենթուսի եւ Ֆրանսայի երիտասրդական հաւաքականի կիսապաշտպան Փօլ Փոկպա  ընտրուեցաւ ֆութպոլի աշխարհի մինչեւ  20 տարեկաններու առաջնութեան  լաւագոյն   ֆութպոլիստը: Ֆրանսայի հաւաքականի  կիսապաշտպանը աշխարհի ախոյեանութեան մրցաշրքին կատարեց վեց մրցում եւ  նշանակեց մէկ կոլ:

ՄԵՍՍԻԻ  ՆՈՒԻՐՈՒԱԾ ՍՐԱՀ

 Գաթալոնական Պարչելոնայի  թանգարանին մէջ  տեղի ունեցաւ  Արժանթինի հաւաքականի խմբապետ  Լիոնէլ Մեսիի նուիրուած սրահին  բացումը:  Նու Գամփ մարզադաշտի առաջին  յարկին վրայ գտնուող սրահը  այցելողները, պիտի  տեսնեն  25-ամեայ արժանթինցիին անհատական բոլոր մրցանակները:

Պարչելոնայի պատմութեան մէջ առաջին անգամն է, երբ ակումբի թանգարանին մէջ առանձին սրահ կը  տրամադրուի  ֆութպոլիստի  մը անունով: Յատկանշական է, որ  հակառակ իր  անվիճելի  մակարդակին, Մեսի տարեկան   13  միլիոն  եուրօ աշխավարձ կը ստանայ  Պարչելոնայէն,  Նէյմար՝  19 , Ինիյէսթա  եւ Զավի՝  10-ական միլիոն եուրօ:

ԱԼՊԵՐԹ ՍԱՐԳՍԵԱՆ ԴԱՐՁԱՒ  50  ՏԱՐԵԿԱՆ

 Երեւանի Միքա  մարզադաշտին մէջ,  Շաբաթ,  13 Յուլիսին, Երեւանի Արարատի նախկին մարզիկ Ալպերթ Սարգսեանի  ծննդեան  50-ամեակին առիթով,  ֆութպոլի բարեկամական մրցում մը տեղի ունեցաւ   Երեւանի Արարատի եւ ԽՍՀՄ հաւաքականի նախկին մարզիկներուն միջեւ:     Արարատի մարզիչը  Արկադի Անդրէասեանն էր, իսկ խմբապետը՝ Խորէն  Յովհաննիսեանը:  ԽԱՀՄ  հաւաքականի մարզիչը   Եւգենի   Լովչեւն էր: Մրցումի նախօրէին,   դաշտ ներկայացող մարզիկները  շնորհաւորեցին հայկական ֆութպոլի վեթերան  Ալպերթ Սարգսեանը՝ իր  ծննդեան  տարեդարձին առիթով:   Մրցումը վերջ գտաւ Արարատի յաղթանակով՝  5-4:

ԶԱՎԻ ՄՏԱՒ  ԱՄՈՒՍՆՈՒԹԵԱՆ ՎԱՆԴԱԿԸ

Գաթալոնական  Պարչելոնայի եւ  Սպանիոյ հաւաքականի  կիսապաշտպան Զավի իր ընկերուհիին   Նուրինի հետ մուտք գործեց ամուսնութեան  վանդակը:  33-ամեայ ֆութպոլիստին պսակադրութեան արարողութիւնը  տեղի  ունեցաւ  Փլան քաղաքին մէջ,  անոր խմբակիցներուն ներկայութեան:

ՏՈՐԹՄՈՒՆՏ  ՉՈՐՍ ԳՆԴԱԿ   ԶԵՏԵՂԵՑ  ՊՈՒՐՍԱՍՓՈՐԻ ԲԵՐԴԻՆ ՄԷՋ

Ֆութպոլի  բարեկամական  մրցումի մը  ընթացքին,   Պորուսիա Տորթմունտ  4-1 արդիւնքով պարտութեան մատնեց   Պուրսասփորը:  Լեվանտովսքի,  Փիէռ   Էմերիք  Օպամէյանկ,  Մարքօ Ռոյս եւ  Սերտար Ազիզ (ինքնակոլ)  նշանակեցին գերմանական կազմին կոլերը:  Մրցումին նաեւ մասնակցեցաւ  Պորուսիային նորերս միացած Հենրիխ Մխիթարեանը:

ՊԱՐԹՈԼԻ ՄԱՐԶՈՒԵՑԱՒ  ՄԱՐՍԷՅԻ ՀԵՏ

Ուիմպըլտընի թենիսի աղջկանց  միջազգային մրցաշարքի  տիտղոսակիր   Մարիօ  Պարթոլի  մարզումային  փորձ մը կատարեց  ֆրանսական Մարսէյ ակումբին հետ:  Երիտասարդ  թենիսիստուհին  յայտարարեց, թէ ինք մանկութենէն  եղած է Մարսէյի երկրպագու մը:

ՇԱՐԱՓՈՎԱ  ՈՒՆԵՑԱՒ ՆՈՐ ՄԱՐԶԻՉ

Հանրածանօթ  թենիսիստ  Ճիմի Գանըրզ դարձաւ   ռուս Մարիա Շարափովայի մարզիչը: «Ուրախ եմ յայտարարելու, որ նոր մարզիչս ճիմի Գանըրզն է: Ես  շատոնց կը ճանչնամ Գանըրզը: Մենք իրարու հետ աշխատած ենք  2008-էն առաջ:   Շատ ուրախ եմ մեր համագործակցութեան  համար եւ անհամբերութեամբ կը սպասեմ նոր մրցաշարքներուն». ըսաւ Շարափովա:  Շարափովայի նախկին մարզիչը եղած է  Թոմաս  Հոկսթենտը:

ԼԻՎԸՐՓՈՒԼ  ՉՈՐՍ ԿՈԼ ՆՇԱՆԱԿԵՑ ՊԻԼ ՇԵՆՔԼԻԻ  ԾՆՆԴԵԱՆ  100-ԱՄԵԱԿԻՆ ՆՈՒԻՐՈՒԱԾ  ՄՐՑՈՒՄԻՆ

Անգլիական  ֆութպոլի հսկաներէն՝ Լիվըրփուլ ակումբը որքա՜ն  կը զգայ իր  նախկին մարզիչին Պիլ Շենքլիի անհրաժեշտութիւնը..:  Արդարեւ,  Շաբաթ,  13 Յուլիսին,  Լիվըրփուլ ֆութպոլի բարեկամական  մրցում մը կատարեց՝ նուիրուած Պիլ Շենքլիի ծննդեան  100-ամեակին:  

Լիվըրփուլ  չորս անպատասխան գնդակ զետեղեց  Անգլիոյ  երրորդ դասակարգի  Փրեսթըն Նորթ Էնտ խումբին  բերդէն ներս:  Ֆելիփէ  Գութինիօ,  Ճորտան  Իպէ, Ռահիմ Սթերլինկ եւ  Եակօ Ասբաս  նշանակեցին  «Կարմիրներ»ուն  կոլերը:

Նախքան  Լիվըրփուլը գլխաւորելը (1959-1974),   Պիլ Շենքլի  մարզած է Հատըրսֆիլտը եւ  կրած է Փրեսթընի շապիկը:

Լիվըրփուլ ակումբը ներկայիս կը  փորձէ  ձեռք բերել Այաքս Ամսթերտամի   միջնապահ  Քրիսթիան Էրիքսընը:  Գալով  Լուիս  Սուարէզի կացութեան,  ուրուկուէյցի ֆութպոլիստը սկզբունքով  22 Յուլիսին պիտի  վերամիանայ իր  խմբակիցներուն, սակայն 26-ամեայ ֆութպոլիստը մտադրած է հեռանալ  Էնֆիլտ Ռոտի ակումբէն:

ԱԼՊԻՈԼ ԿՐՆԱՅ ՄԻԱՆԱԼ  ՆԱՓՈԼԻԻ

Իտալական  Նափոլի ակումբը կը հետաքրքրուի Ռէալ Մատրիտի  եւ Սպանիոյ հաւաքականի  յետսապահ  Ռաուլ Ալպիոլի ծառայութիւններով: Նափոլիի մարզիչ՝ Ռաֆայէլ  Պենիթէզ յայտարարեց, թէ պատրաստ է   ութ միլիոն եուրօ վճարելու 27-ամեայ  ֆութպոլիստին  փոխանցումին համար: Նշենք, թէ Նափոլի վերջերս  ձեռք  բերաւ Ռէալի կիսապաշտպան   Խօսէ  Քալիէխոնին:

ՖՐՈՒՄ   ՇԱՀԵՑԱՒ  15-ՐԴ  ՀԱՆԳՐՈՒԱՆԸ

Ֆրանսայի հեծելարշաւի  15-րդ հանգրուանը աւարտեցաւ  Քրիստոֆըր   Ֆրումի  յաղթանակով:   15-րդ հանգրուանի մրցումներէն ետք,  ընդհանուր դասաւարումը կը գլխաւորէ   բրիտանացի   Քրիստոֆըր  Ֆրումը:  Հոլանտացի   Պուք  Մոլեման կը  գրաւէ երկրորդ դիրքը:

ՖԵՌԱՐԻ ՉԷ ՀՐԱԺԱՐԱԾ  ՏԻՏՂՈՍԷՆ

Ֆորմիւլա -1  ինքնաշարժներու  սպանացի վարորդ  Ֆեռնանտօ Ալոնզօ յայտարարեց, թէ  դժուար է պայքարիլ Ռէտ Պուլ ինքնաշարժներու  վարորդ   Սեպասթիան Վեթէլի դէմ, սակայն  Ֆեռարի չի պատրաստուիր  թեւաթափ դառնալ եւ պայքարը պիտի շարունակէ մինչեւ վերջին հանգրուանը:  Ալոնզոյի  կարծիքով,  նոյնիսկ  մինչեւ 50-60 կէտերու տարբերութեան պարագային, կարելի է  շարունակել պայքարը:

ԵՈՒՆԱՅԹԸՏ ՆՈՐ ՊԱՅՄԱՆԱԳԻՐ ՊԻՏԻ  ՉԱՌԱՋԱՐԿԷ   ՌՈՒՆԻԻՆ

 Բրիտանական  մամուլին համաձայն, Մանչեսթըր Եունայթըտ  նոր պայմանագրութիւն պիտի  չառաջարկէ   Ուէյն Ռունիին:  Ռունիի պայմանագրութիւնը  Մանչեսթըր Եունայթըտի հետ կ’աւարտի  2015-ին:   27-ամեայ  ֆութպոլիստը շաբթական 200 հազար սթերլին գումար աշխատավարձ  կը գանձէ «Կարմիր Սատանաներ»էն:  Ռունիի  ծառայութիւններով կը զբաղին  Չելսին եւ Արսենալը:

 

 

LEAVE A REPLY

Please enter your comment!
Please enter your name here