ԽՈՐՀՐԴԱՐԱՆԻ ԱՅՍՕՐՈԻԱՆ ՆԻՍՏԸ ՅԵՏԱՁԳՈՒԵՑԱՒ – ՍԸԼԷՅՄԱՆ ԿԱՐԵՒՈՐ ԿԵՑՈՒԱԾՔՆԵՐ ՊԻՏԻ ԱՐՁԱԿԷ ԱՅՍՕՐ

0
104

Լիբանանեան քաղաքական առօրեան   պոյքոթներու եւ   նախապայմաններու   նոր  շաբաթ  մը  թեւակոխեց: Խորհրդարանի այսօրուան լիագումար  նիստին  ճակատագիրը միանգամայն յստակ էր  առաջին իսկ  վայրկեանէն: Մինչեւ հանրապետութեան նախագահին եւ հրաժարեալ վարչապետին կողմէ  յատուկ հրամանագիրի  մը  հրապարակումը,  ժողովի  հրաւէրները  դատապարտուած են   ձախողութեան: Միւս կողմէ, խորհրդարանի նախագահ Նեպիհ Պըրրի    միջոցներ կը  փնտռէ ՝  բանակի ընդհանուր հրամանատար զօրավար Ժան Քահուաճիի պաշտօնավարութեան  ժամկէտը երկարաձգելու  ուղղութեամբ:

 Խորհրդարանի նախագահ  Նեպիհ Պըրրի լիագումար նիստ հրաւիրելու իր  որոշումը կը հիմնաւորէ  սահմանադրութեան 69-րդ  յօդուածի երրորդ  պարբերութեամբ, ուր նշուած է, թէ  կառավարութիւնը  հրաժարելու  եւ  կամ հրաժարեալ վիճակի մէջ գտնուելու պարագային, խորհրդարանը  ինքնաբերաբար՝  բացառիկ պարագաներու տակ,  նիստ  գումարելու իրաւասութիւն կը ստանայ, մինչեւ նոր կառավարութեան կազմութիւնը եւ վստահութեան քուէ ստանալը: Սահմանադրութեան այս  եզրը տարբեր   մեկնաբանութիւններու  առիթ ստեղծած   է  քաղաքական հոսանքներուն մօտ: Պըրրի յայտարարեց, թէ պիտի  մնայ խորհրդարանի լիագումար նիստ հրաւիրելու  իր  տեսակէտին վրայ, առանց փոփոխութեան  ենթարկելու քննարկուելիք օրակարգերը: Պըրրի աւելցուց, թէ  նորանշանակ  վարչապետին համախոհները   պոյքոթի կ’ենթարկեն  լիագումար նիստերը:

Հանրապետութեան նախագահ  Միշէլ Սըլէյման Պաապտայի պալատին մէջ  ընդունեց  հրաժարեալ ներքին գործոց նախարար Մարուան Շերպէլը եւ անոր հետ  քննարկեց երկրին ապահովական  իրավիճակը: Սըլէյման նաեւ ընդունեց  երեսփոխան Ամին Ուահպէն եւ այլ անձնաւորութիւններ: Այսօր՝  Երեքշաբթի,  Պաապտայի պալատին մէջ  հանրապետութեան նախագահին հրաւէրով   տեղի պիտի ունենայ  «իֆթար» մը, ուր  նախագահ  Միշէլ Սըլէյման  պիտի  անդրադառնայ երկրին  բոլորած կացութեան եւ արձակէ կարգ մը կարեւոր կեցուածքներ:

LEAVE A REPLY

Please enter your comment!
Please enter your name here