ԱՐՑԱԽԻ ԱՆԿԱԽՈՒԹԻՒՆԸ ՃԱՆՉՑՈՂ ՆԻՒ ՍԱՈՒԹ ՈՒԷՅԼԶԻ ԽՈՐՀՐԴԱՐԱՆԱԿԱՆ ՊԱՏՈՒԻՐԱԿՈՒԹԻՒՆԸ Կ’ԱՅՑԵԼԷ ԵՐԵՒԱՆ

0
131

Հայաստան կը գտնուի Աւստրալիոյ Նիւ Սաութ Ուէյլզի նահանգի խորհրդարանական եօթը հոգինոց պատուիրակութիւնը:՝ Աւստրալիոյ Հայ Դատի յանձնախումբի նախաձեռնութեամբ: Պատուիրակութեան մաս կը կազմեն Հայոց Ցեղասպանութեան ճանաչումը վերահաստատող բանաձեւի հեղինակ Ֆրետերիք Նայլը, Լեռնային Ղարաբաղի Հանրապետութիւնը ճանչցող նախագիծի հեղինակ Մարի Ֆիքարան եւ իրենց հայանպաստ գործունէութեամբ յայտնի այլ խորհրդարանականներ:
«Այցելութեան հիմնական նպատակը այն է, որ Հայկական հարցի լուծման իմաստով  մեծ աւանդ ունեցող այս պատգամաւորներն իրենց աչքով տեսնեն Հայաստանը, ծանօթանան հայկական բազմադարեայ մշակոյթին եւ պատմութեան, ապա վերադառնալով՝ աւելի մեծ ոգեւորութեամբ շարունակեն իրենց հայանպաստ գործունէութիւնը Աւստրալիոյ մէջ», «Արմէնփրէս»ին հետ ունեցած զրոյցին ընթացքին նշած է Աւստրալիոյ Հայ Դատի յանձնախումբի գործադիր տնօրէն Վաչէ Ղահրամանեանը:
Պատուիրակութիւնը Հայաստան պիտի մնայ եօթը օր: Ծրագրուած են բարձր մակարդակի հանդիպումներ նախագահ Սերժ Սարգսեանի, Ազգային ժողովի նախագահ Յովիկ Աբրահամեանի, վարչապետ Տիգրան Սարգսեանի, ինչպէս նաեւ Ամենայն Հայոց Գարեգին Բ. կաթողիկոսի հետ:
Պիտի քննարկուին Հայաստանի եւ Աւստրալիոյ միջեւ հետագայ համագործակցութեան ամրապնդման հարցեր: Վաչէ Ղահրամանեանը յոյս յայտնած է, որ հանդիպումները կը խթանեն հայ-աւստրիալական տնտեսական, քաղաքական եւ մշակութային կապերու ամրապնդումը եւ հետագայ համագործակցութիւնը երկու երկիրներուն միջեւ:

 

LEAVE A REPLY

Please enter your comment!
Please enter your name here