ԳԱՐԱՅԸԼԱՆ ԿԸ ՊԱՀԱՆՋԷ ԱԶԱՏ ԱՐՁԱԿԵԼ ՕՃԱԼԱՆԸ

0
101

 Օրէ օր նուազ խանդավառութեամբ կը խօսուի քրտական հաշտութեան գործընթացին մասին։ Այս գործընթացը, որ առաջին օրերուն քիւրտերու կողմէ ողջունուած էր իբրեւ մեր վերջին շրջաններու ամէնէն ուրախացուցիչ լուրը, կորսնցուցած կը թուի իր հմայքը, եւ քրտական կողմը չունի առաջին օրերու լաւատեսութիւնը։
Քիւրտիստանի բանուորական կուսակցութեան ղեկավարութեան շարքերէն ներս կատարուած նոր փոփոխութիւնը, ըստ որուն՝ Մուրատ Գարայըլանին յանձնուեցաւ զինեալ ուժերը պատրաստելու պարտականութիւնը, ցոյց կու տայ, որ տագնապին զինուորական լուծում մը գտնելու ընտրանքը կը մնայ սեղանի վրայ:
Գարայըլան անցնող շաբաթավերջին նոր յայտարարութիւններ ըրաւ ու աւելի յստակ կերպով կրկնեց այն, ինչ քրտամէտ Խաղաղութիւն եւ ժողովրդավարութիւն կուսակցութեան անդամները կը պնդեն օրերէ ի վեր։ Ըստ անոր՝ յառաջիկայ օրերը շատ կարեւոր են ու եթէ կառավարութիւնը այս շաբաթ եւս իրմէ սպասուած քայլերը չառնէ եւ համոզիչ փաստեր չներկայացնէ, գործընթացը բոլորովին կանգ պիտի առնէ։ «Գործընթացը տակաւին չէ խցուած, բայց խցուելու հանգրուանին վրայ է», ըսաւ ան:
Գարայըլան կրկնեց, որ պէտք է բարելաւուին Ապտուլլա Օճալանի բանտային պայմանները, պէտք է օգնականներ ու քարտուղար տրուի անոր, ու ան պէտք է դիւրութեամբ կապ հաստատէ արտաքին աշխարհին հետ։
«Ամէն մարդ թող լաւ գիտնայ, որ մենք Թուրքիոյ պետութեան պէտք չունինք։ Եթէ կ՛ուզենք, որ պետութիւնը քայլ մը առնէ, ատիկա պարզապէս այդ պատճառով է, որ կ՛ուզենք համաձայնիլ ու հաշտուիլ։ Իսկ ասիկա միակողմանի չ՛ըլլար։ Կառավարութիւնը պէտք է առնէ քայլեր, որոնք պիտի համոզեն մեզ։ Քիւրտ քաղաքական գործիչները պէտք է ազատ արձակուին, պէտք է կանգ առնեն ամբարտակներու ու պահականոցներու կառուցումները, պէտք է ջնջուի գիւղական պահակներու դրութիւնը», ըսաւ Գարայըլան։
Իսկ Պեսէ Հոզատ, որ համանախագահ նշանակուեցաւ հիւսիսային Իրաքի մէջ գործող Քիւրտիստանի Աշխատաւորական Կուսակցութեան ուժերուն, յայտարարեց. «Օճալան պէտք է ազատ ըլլայ, առանց ազատ առաջնորդութեան՝ քրտական հարցը չի լուծուիր»։

 

LEAVE A REPLY

Please enter your comment!
Please enter your name here