ՊԱՂԸՇԻ ՎԵՐՋԻՆ ՁԱԲՌՏՈՒՔԸ… Ա՜Խ ԱՅԴ ՀԱՅԿԱԿԱՆ ՍՓԻՒՌՔԸ

0
111

 Թուրքիոյ Եւրոմիութեան հարցերով նախկին նախարար Էկեմեն Պաղըշ «իֆթար»ի ճաշկերոյթի մը ընթացքին պնդեց, թէ վերջին քանի մը տարիներուն երկրին մէջ յատկանշական բարեկարգումներ տեղի ունեցած են՝ երկիրը աւելի մօտեցնելով Եւրոմիութեան չափանիշերուն: Իբրեւ օրինակ ան նշեց, թէ երկրի հայերը 112 տարի սպասելէ ետք՝ կրցած են կրօնական արարողութիւն կատարել Աղթամարի Ս. Խաչ եկեղեցւոյ մէջ:
Պատասխանելով ներկաներու հարցումներուն՝ նախարարը յայտնեց, թէ Թուրքիա հարց չունի Հայաստանի հետ եւ թէ հայերուն հետ հարցեր կը ծագին, որովհետեւ Սփիւռքի հայերը իրենց ազգային ինքնութիւնը պահպանելու համար, Թուրքիոյ եւ թուրքերուն դէմ շարունակաբար «ատելութին կը քարոզեն»:
Իբրեւ «անձնական վկայութիւն», ան խօսած է Պոսթընի մէջ տեղի ունեցած պատահարի մը մասին՝ պնդելով, թէ Պոսթընի հայկական մանկապարտէզի մը մէջ հետեւեալ նախադասութիւնը կը սորվեցնեն հայ աշակերտներուն. «Կը նախընտրեմ շուն ըլլալ՝ աղտոտ թուրք մը ըլլալու փոխարէն»: Ապա ան շարունակեց՝ ըսելով. «Այս նախադասութիւնը իւրացնող մանուկ մը անկարելի է, որ կարենայ տաքուկ զգացումներ սնուցանել Թուրքիոյ հանդէպ: Հայերու կողմէ Թուրքիոյ դէմ թշնամանքի այս քարոզչութիւնը կ՛ապահովէ, որ հոն ապրող հաւաքականութիւնը իւրացնէ հասարակաց համոզումներ՝ նոյն գաղափարին շուրջ: Եթէ հարցը միայն Հայաստանի հետ ըլլար, ապա զայն կարելի էր լուծել տնտեսական կարգ մը միջոցներով, որովհետեւ անոր քաղաքացիները չքաւորութեան պատճառով այլ երկիրներ կը գաղթեն: Թուրքիոյ մէջ, Հայաստանի 70,000 քաղաքացիներ փախստականի վիճակով կ՛աշխատին: Կիները առաւելաբար մանուկներ կամ տարեցներ կը խնամեն: Եթէ ազգովին հայերու հանդէպ ատելութիւն սնուցէինք, ապա մեր ամէնէն նուիրական հոգեհատորները՝ մեր մանուկներն ու տարեցները, անոնց չէինք յանձներ: 2015-ը հայերուն համար հարիւրամեակի յիշատակութեան տարի է: Այս տարելիցը անտարակոյս պիտի գործածուի մեզի դէմ: Բայց մենք ոչ թէ հարիւրամեակի, այլ նոյնիսկ հազարամեակի առիթով իսկ չենք ընդնուիր յանցանք մը, զոր չենք գործած»:

 

LEAVE A REPLY

Please enter your comment!
Please enter your name here