ԹԱՐԱՖ Կ’ԱՆԴՐԱԴԱՌՆԱՅ ՀԱՅԿԱԿԱՆ ՏՈՒՆԵՐՈՒ ՈՉՆՉԱՑՄԱՆ ԳՈՐԾՈՂՈՒԹԻՒՆՆԵՐՈՒՆ

0
100

Թրքական   ծանօթ  «Թարաֆ»  թերթը  անդրադարձած է  Թուրքիոյ տարբեր  շրջաններու մէջ   հայկական  տուներու   ոչնչացման գործողութիւններուն: Ան անդրադարձած է  Մուշի Քալէ թաղամասի  հայկական  տուները քանդելու եւ   նոր  բնակարաններ կառուցելու   թրքական իշխանութիւններու որոշումին: «Թարաֆ» մէջբերած է  Մուշի  քաղաքապետ Նեճէտտին  Տետէի խօսքերը,   իբրեւ թէ  այդ բնակարանները  չեն պատկանիր հայերուն, որովհետեւ  մինչեւ օրս, ոչ մէկ հայ  չէ ներկայացուցած տուներուն սեփականութեան վկայականները:

«Թարաֆ» անդրադարձած է   Մուշէն բացի   Թեքիրթաղի մէջ գտնուող   Մալքարայի   հայկական գերեզմանատան մասին, որուն  քանդման  աշխատանքներուն ընթացքին հողէն դուրս եկած են  մարդկային ոսկորներ:  Անոնք նետուած են աղբանոց:  Նոյն ճակատագրին արժանացած է Սիվասի (Սեփաստիա)  շրջանի  Զարա գաւառին մէջ գտնուող  հայկական գերեզմանտունը, որմէ մնացած է ընդամէնը մէկ տապանաքար:   Յաջորդ անդրադարձը կատարուած է  Սիիթ (Սղերթ)  շրջանի Էրուհ    քաղաքին մէջ  գտնուող Սուրբ  Յովհաննէս   եկեղեցիին, որ  իշխանութիւններու  թոյլտուուոթեամբ վաճառուած է    թրքական   շինարարական ընկերութեան:

«Թարաֆ»  նաեւ կ’անդրադառնայ  Իսթանպուլի մէջ գտնուող  «Սանասարեան Տան»   շինութեան  մասին, որ աճուրդով հանուած է  վարձակալութեան:

Յօդուածին վերջին  պարբերութիւնը  կը  յիշատակէ, որ նախքան  1915-ի  Հայոց Ցեղասպանութիւնը, Մուշի մէջ  գործած  է  299  եկեղեցի, 94 վանք, 53  սրբավայր, 135  հայկական դպրոց  եւ գերեզմանատուն:  Մուշի  շրջակայքը գտնուող  հայկական գիւղերուն մէջ ապրած են    75 հազար հայեր. «Հայոց Ցեղասպանութեան  ճարտարագէտ  Թալէաթ փաշայի   փաստաթուղթերուն մէջ տեղ գտած  տեղեկութիւններուն համաձայն՝ այդ ժամանակ  Մուշէն  եւ անոր   շրջակայքէն 114  հազար   704  հայեր  տեղահանութեան  դուրս  բերուելով  դատապարտուեցան  մահուան: Արդէն  1917 թուականի մարդահամարին ժամանակ  արձանագրուեցաւ, որ   շրջանի հայերուն  99 առ հարիւրը կորսուած է».կ’եզրափակէ   «Թարաֆ»:

 

LEAVE A REPLY

Please enter your comment!
Please enter your name here