ՆԱԼՊԱՆՏԵԱՆ .« ԱՆՑՆՈՂ ՔՍԱՆ ՏԱՐԻՆԵՐԸ ԿԸ ՆԵՐԿԱՅԱՑՆԵՆ ԱՄԲՈՂՋ ԴԱՐԱՇՐՋԱՆ ՄԸ»

0
134

Ստեփանակերտ մեկնած Հայաստանի արտաքին գործոց նախարար Էտուարտ Նալպանտեան հանդիպում ունեցաւ Արցախի Հանրապետութեան նախագահ Բակօ Սահակեանի հետ:

Հայաստանի արտաքին գործոց նախարարը Արցախի Հանրապետութեան նախագահին ներկայացուց Յուլիս 12-ին Վիեննայի մէջ Ատրպէյճանի արտաքին գործոց նախարարին եւ ԵԱՀԿ-ի Մինսքի խմբակի համանախագահներուն հետ տեղի ունեցած հանդիպման մանրամասնութիւնները:

Նախագահ Սահակեան եւ նախարար Նալպանտեան զրոյց ունեցան Լեռնային Ղարաբաղի տագնապի խաղաղ լուծման բանակցային հոլովոյթին շուրջ:

Հանդիպման ընթացքին երկու կողմերը կարեւոր համարեցին Հայաստանի եւ Արցախի արտաքին գործոց նախարարութիւններուն միջեւ աշխուժ եւ համակարգուած աշխատանքը:

Նոյն օրը, նախարար Էտուարտ Նալպանտեան Լեռնային Ղարաբաղի արտաքին գործոց նախարարութեան մօտ հանդիպում ունեցաւ նախարար Կարէն Միրզոյեանի, արտերկրի մէջ Արցախի ներկայացուցիչներուն եւ նախարարութեան աշխատակիցներուն հետ: Շնորհաւորելով արցախցի դիւանագէտները Լեռնային Ղարաբաղի Հանրապետութեան արտաքին գործոց նախարարութեան հիմնադրման 20-ամեակին առիթով` նախարար Նալպանտեան նշեց, որ պիտի շարունակէ համակողմանի աջակցութիւնը Արցախի արտաքին գործոց նախարարութեան գործունէութեան: Էտուարտ Նալպանտեան ներկայացուց ղարաբաղեան տագնապի լուծման բանակցային հոլովոյթին վերջին զարգացումները եւ պատասխանեց արցախցի դիւանագէտներու հարցումներուն:

Աւելի ուշ Լեռնային Ղարաբաղի Հանրապետութեան Ազգային ժողովի նիստերու դահլիճին մէջ Էտուարտ Նալպանտեան մասնակցեցաւ Արցախի արտաքին գործոց նախարարութեան 20-ամեակին նուիրուած հանդիսաւոր նիստին:

Խօսք առնելով հանդիսաւոր նիստին` նախարար Նալպանտեան յայտնեց, որ մասնաւորապէս անկախ Արցախի արտաքին գործոց նախարարութիւնը հիմնադրուեցաւ պատերազմի պայմաններուն մէջ: Երկու տասնամեակ ետք խաղաղ, գեղատեսիլ եւ բարեկարգ Ստեփանակերտի մէջ այս գեղեցիկ սրահին մէջ, այսքան տօնական տրամադրութեամբ կը նշուի Լեռնային Ղարաբաղի Հանրապետութեան արտաքին գործոց նախարարութեան հիմնադրման 20-րդ տարեդարձը:

Նախարար Նալպանտեան ընդգծեց, որ այս 20 տարիները, որոնք յետագայ սերունդներուն եւ պատմագիրներուն համար պատմական ակնթարթ կը թուին, մեզի` ժամանակակիցներուս համար, կը ներկայացնեն ամբողջ դարաշրջան մը:

 

 

LEAVE A REPLY

Please enter your comment!
Please enter your name here