ՄԱՐԶԱԿԱՆ – ԵՒՐՈՊԱԿԱՆ ԱԿՈՒՄԲՆԵՐԸ ԿԸ ՆԱԽԱՊԱՏՐԱՍՏՈՒԻՆ ՆՈՐ ՄԱՐԶԱՇՐՋԱՆԻՆ

0
163

 Եւրոպայի ազգային ախոյեանութիւններու 2013-14  տարեշրջանի նախապատրաստութիւններուն ծիրին մէջ,  գերմանական Աուկսպուրկ խումբը  1-0 արդիւնքով պարտութեան մատնեց Մոնաքօն:  Շթութկարթը, միեւնոյն՝ 1-0  արդիւնքով պարտութեան մատնեց Վալենսիան: Ա.Սէ. Միլան 5-1   արդիւնքով պարտութեան մատնեց  չորրորդ դասակարգի  Փերկոլաթեսէին: Լիվըրփուլ՝  Ճաքարթայի  մէջ   2-0 արդիւնքով պարտութեան մատնեց  Ինտոնեզիոյ  առաջնութեան  մասնակցող  աստղերու ընտրանիի մը:  Մանչեսթըր Եունայթըտ  5-1 արդիւնքով պարտութեան մատնեց Աւստրալիոյ  Ֆութպոլի ախոյեանութեան  մասնակցող  ընտրանիի մը:  Նափոլի՝  5-1 արդիւնքով պարտութեան  մատնեց  Իտալիոյ  Գ. դասակարգէն  Ֆերալփի  Սալօ Խումբին:  Չելսի՝  4-1  արդիւնքով պարտութեան մատնեց   Մալեզիոյ  առաջնութեան մէջ  ելոյթ ունեցող աստղերու ընտրանիին: Ռէալ  Մատրիտ   վեց անպատասխան գնդակ զետեղեց  անգլիական  Պորնմաութ խումբին  բերդին մէջ:

Պայերն  Միւնիխ շահեցաւ  ֆութպոլի բարեկամական  «Թելեքոմ Գափ»  մրցաշարքը:   Եզրափակիչ մրցումին,  պաւարիական կազմը   5-1 արդիւնքով պարտութեան մատնեց Պորուսիա Մէօնշենկլատպախը:

ՉԻՍՈՐԱ ՊԱՏՐԱՍՏ Է  ՃԱԿԱՏԵԼՈՒ  ՔԼԻՉՔՈՅԻ  ԴԷՄ

Արհեստավարժ բռնցքամարտի  գերծանր կշիռքի  աշխարհի ախոյեանութեան տիտղոսի  նախկին յաւակնորդ, բրիտանացի   Տերէք  Չիսորա, Լոնտոնի Ուեմպլի մարզադաշտին մէջ  պարտութեան մատնեց  ամերիկացի  Մալիք  Սքոթը:  29-ամեայ բրիտանացին  6-րդ ռաունտին,   թեքնիքական  «նաք-աութ»ի ենթարկեց իր մրցակիցը:  Մենամարտէն ետք, Չիսորա  յայտարարեց, թէ պատրաստ է  ճակատելու աշխարհի ախոյեան Վիթալի Քլիչքոյի   դէմ:

ՌԷԱԼ ՄԱՏՐԻՏ ԿԸ ՀԵՏԱՊՆԴԷ   ՓԻՐԼՕՆ

 Ռէալ Մատրիտ չի հրաժարիր  Իտալիոյ հաւաքականի եւ Եուվենթուսի  միջնապահ  Անտրէա Փիրլօն ձեռք բերելու ծրագիրէն:  Սպանական ակումբը  պատրաստ է   տասը միլիոն եուրօ վճարելու 34-ամեայ  Փիրլոյի ստորագրութեան համար:  Ռէալի  մարզիչ  Գառլօ Անճելոթի, Փիրլոյի հետ աշխատած է Ա.Սէ. Միլանը   մարզելու  շրջանին:  Փիրլօ, ընթացիկ  մարզաշրջանին  42 մրցում կատարած է Եուվենթուսի հետ, նշանակելով    հինգ կոլ: 

ՀԻԿՈՒԱՅԻՆ  ՊԻՏԻ   ՓՈԽԱՆՑՈՒԻ  ՆԱՓՈԼԻԻ

 Ռէալ Մատրիտ եւ   Նափոլի  նախնական համաձայնութիւն   գոյացուցին Արժանթինի հաւաքականի յարձակող  Կոնզալօ  Հիկուայինի   փոխանցումին  շուրջ:  25-ամեայ արժանթինցին   ունենալու համար,  իտալական ակումբը  35 միլիոն եուրօ  գումար մը պիտի  վճարէ  Ռէալին: Անգլիական Արսենալը մեծ յոյսեր ունէր, որ  Հիկուային միանար իր կազմին:

Հիկուային,  2006-ին արժանթինեան Ռիվըր Փլէյթ ակումբէն միացաւ Ռէալին:  Նափոլի մինչեւ օրս յաջողած է  ձեռք բերել  Խօսէ  Գալյէխոն,  Ռաուլ Ալպիոլը եւ  Փեփէ Ռէյնան:

ՄԱՆՉԵՍԹԸՐ ԿԸ ԽՈՍՏԱՆԱՅ  ԿՐԿՆԱՊԱՏԿԵԼ   ՖԱՊՐԵԿԱՍԻ ԱՇԽԱՏԱՎԱՐՁԸ

Մանչեսթըր Եունայթըտ ակումբը կը փորձէ անպայման իր կազմին մէջ ունենալ  Պարչելոնայի եւ Սպանիոյ հաւաքականի կիսապաշտպան  Սեսկ Ֆապրեկասը:  Անգլիական ակումբը շաբթական  200 հազար  սթերլին աշխատավարձ կը խոստանայ   26-ամեայ միջնապահին:

Ֆապրեկաս, վերջերս  յայտնեց, թէ  միայն  Արսենալի միանալու  պայմանաւ  կրնայ  վերադառնալ Անգլիա:  Սպանացի միջնապահը 2011-ին Արսենալէն  տեղափոխուեցաւ  Պարչելոնա:  Ընթացիկ   մարզաշրջանին, Ֆապրեկաս   32 մրցում  կատարեց  Պարչելոնայի շապիկով, նշանակելով  11 կոլ:   

ԹԻԹՕ  ՎԻԼԱՆՈՎԱ  ՇՆՈՐՀԱԿԱԼՈՒԹՒԻՆ  ԿԸ  ՅԱՅՏՆԷ ԲՈԼՈՐԻՆ

Առողջական  պատճառներով Պարչելոնայի գլխաւոր մարզիչի պաշտօնէն  հրաժարած  Թիթօ Վիլանովա  յայտարարեց, թէ  շատ  դժուար է  ֆութպոլիստներու  նման  կազմ մը  լքել: 44-ամեայ  մարզիչը ի վիճակի չէր  շարունակելու իր  պաշտօնը. «Հինգ անմոռանալի տարիներ անցուցի  Պարչելոնայի հետ: Այժմ ուժերս պիտի  տրամադրեմ, պայքարելու՝   յայտնաբերուած  հիւանդութեան դէմ:  Շնորհակալութիւն, Պարչելոնայի  տնօրէնութեան,   մարզիկներուն, համակիրներուն: Յաջողութիւն կը մաղթեմ աշխարհի լաւագոյն ակումբին եւ անոր նոր մարզիչին: Շնորհակալութիւն բոլորին» նշուած է Վիլանովայի   հրաժեշտի    խօսքին մէջ:

Յիշեցնենք, թէ  ամիսներ առաջ սպանացի մարզիչը  ենթարկուեցաւ  քաղցկեղային  ուռուցքի  հեռացման  վիրահատութեան:

ԿՈՒԱՐՏԻՈԼԱ .« ՇԱՏ ԿԸ ՍԻՐԵՄ ԹԻԹՈՅԻՆ»

« Թիթօ Վիլանովան   իմ շատ  մտերիմ  ընկերն է: Շատ կը սիրեմ զինք:  Անոր կը  մաղթեմ ամենալաւը: Հիմա անոր անհրաժեշտ է  ուժ՝  հիւանդութեան  դէմ պայքարելու: Շատ եւ  շատ դժուար պիտի  ըլլայ   ինծի համար ». յայտարարեց  Պայերն Միւնիխի  մարզիչ Խօսէփ  Կուարտիոլա:

Միւս կողմէ, Պարչելոնայի    համակիրները կը փափաքին, որ  գերմանացի  Եուփ Հէյնքէսը ստանձնէ խումբին գլխաւոր  մարզիչի պատասխանատուութիւնը: Սպանական  թերթերը աւելի հաւանական  կը  գտնեն, որ  ակումբի նախկին մարզիկներէն  Լուիս  Էնրիքէն  նշանակուի մարզիչի  պաշտօնին:  Գաթալոնական ակումբին  տնօրէնութիւնը յառաջիկայ     ժամերուն պիտի  յայտարարէ  նոր մարզիչին անունը:

 

ԹԱՅՍԸՆ ԿԸ  ՎԵՐԱԴԱՌՆԱՅ  ՌԻՆԿ

Բռնցքամարտի  գերծնար կարգի աշխարհի նախկին ախոյեան Մայք Թայսըն մտադրած է վերադառնալ  ռինկ: 52-ամեայ  Թայսն սոյն որոշումը առաւ կնոջ՝ Քիքիի հետ խորհրդակցելէ ետք: «Ռինկ վերադառնալը  հիանալի զգացողութիւն է:  Արտակարգ  վիճակի մէջ կը  զգամ ներկայիս» յայտարարեց աշխարհի նախկին բացարձակ ախոյեանը:  Նշենք, թէ  Թայսըն վերջին անգամ   2005-ին  փորձեց վերադառնալ  ասպարէզ, սակայն «նոք –աութ»ով պարտութիւն մը  կրեց  Քեւին  Մաքպրայտէն:

ԱՐԱՐԱՏԻ ՅԱՂԹԱՆԱԿԸ  ՍԵՐՊԻՈՅ ՄԷՋ

Սերպիոյ մէջ    նախապատրաստական մարզումներու  մեկնած Երեւանի Արարատը  ֆութպոլի  բարեկամական  մրցում մը կատարեց  երկրորդ դասակարգի  Տունաւ  խումբին դէմ:  Երեւանցիները  2-0 արդիւնքով պարտութեան մատնեցին  իրենց մրցակիցը: Արարատ,  26  Յուլիսին   պիտի   մրցի Ապոյէլ  Հայֆայի դէմ:

ԼԷՈՆԱՐՏՕ ԿՐՆԱՅ  ՎԵՐԱԴԱՌՆԱԼ   ԻՆԹԷՐ

Փարի Սէն  Ժերմէնի նախկին տնօրէն Լէոնարտօ կրնայ  վերադառնալ Ինթէր Միլան: 43-ամեայ Լէոնարտօ  2010-11  տարեշրջաններուն վարած է  Ինթէրի  տնօրէնի պաշտօնը: Յիշեցնենք, որ  Ֆրանսայի  ֆութպոլի  ֆետերասիոնը մինչեւ 2014 թուականը  որակազրկած է  Լէոնարտօն՝ Վալենսիյէնի դէմ   ախոյեանութեան 5-րդ հանգրուանի մրցումէն ետք, իրաւարար Ալեքսանտր Գատրոյի դէմ  ֆիզիքական  բրտութիւն  գործադրելու պատճառով:

ԳԱԶԻՐԱԿԻԻ ԶԱՒԱԿԸ ՄԻԱՑԱՒ ՄԻԼԱՆԻ

 Իտալիոյ  հաւաքականի նախկին յարձակող  Փիէռլուիճի Քազերակիի զաւակը՝ Անտրէա պայմանագրութիւն մը կնքեց Ա.Սէ. Միլանի հետ: Մասնագէտներու  կարծիքով,  16-ամեայ  պատանին  կը նկատուի խոստումնալից  ֆութպոլիստ մը: Ա.Սէ. Միլանի պատանեկան խումբին հետ կը մարզուին նաեւ  Փաուլօ Մալտինիի եւ  Մաուրիցիօ Կանցի զաւակները:

 ԼԻՈՎ  ՆՈՐ ՊԱՅՄԱՆԱԳՐՈՒԹՒԻՆ ՊԻՏԻ  ԿՆՔԷ  ԳԵՐՄԱՆԻՈՅ ՀԵՏ

Գերմանիոյ ֆութպոլի  ֆետերասիոնը մտադրած է  վերանորոգել ազգային խումբի  գլխաւոր մարզիչ  Եոաքիմ Լիովի  պայմանագրութիւնը:  53-ամեայ Լիով, 2006-էն ի վեր  ստանձնած է  Գերմանիոյ ազգային խումբը: Անոր պայմանագրութիւնը սկզբունքով կ’աւարտի  2014-ին:

 ՖՐՈՒՄ՝  ՖՐԱՆՍԱՅԻ  ՀԵԾԵԼԱՐՇԱՒԻ ԱԽՈՅԵԱՆ

Քենիա  ծնած, ծագումով բրիտանացի   Քրիստաֆըր Ֆրում  ( Թիմ Սքայ), շահեցաւ Ֆրանսայի  հեծելարշաւին տիտղոսը:  Այս առիթով Ֆրում պիտի ստանայ   450 հազար  եուրօ արժողութեամբ  վճարագիր մը: Մրցաշարքին  վերջին՝  Փարիզ – Վերսայ  հանգրուանին աւարտէն ետք,  տեղի ունեցող  հանդիսութեան  ընթացքին, Ֆրում  պաշտօնապէս  ստացաւ իր տիտղոսը  :  Նշենք, թէ  2013-ը   կը զուգադիպէր Ֆրանսայի հեծելարշաւի հարիւրամեակին:  21 հանգրուաններէ  բաղկացած մրցաշարքը  այս տարի բացառաբար  տեղի ունեցաւ  միայն  ֆրանսական  հողի  վրայ (3360Քմ.):

ՄՈՐԻՆԻՕ  2016-ԻՆ ՊԻՏԻ  ՎԵՐԱԴԱՌՆԱՅ   ԻՆԹԷՐ

Իտալական Ինթէր Միլան ակումբի սեփականատէր  Մասիմօ Մորաթի յայտարարեց, թէ Ժոզէ Մուրինիօ  2016-ին պիտի  վերամիանայ  Ինթէրին.«  Ես  հեռաձայնեցի  Մուրինիոյին եւ  յաջողութիւն մաղթեցի  Չելսիի գլխաւոր  մարզիչի պաշտօնը ստանձնելու առիթով: Ան ըսաւ, թէ  անգամ մը եւս պիտի  հանդիպինք   Իթէրի  հետ՝  երեք տարի ետք»:

Կ’արժէ նշել, որ    Մուրինիօ  չորս տարուան պայմանագրութիւն մը  կնքած է  Չելսիի հետ:

ԼԻՎԸՐՓՈՒԼ  50  ՄԻԼԻՈՆ ՍԹԵՐԼԻՆ ԿԸ ՊԱՀԱՆՋԷ  ՍՈՒԱՐԷԶԻ ՀԱՄԱՐ

Արսենալ եւ Ռէալ Մատրիտ  չեն  հրաժարիր  Լիվըրփուլի եւ Ուրուկուէյի  հաւաքականի յարձակող Լուիս Սուարէզը  գնելու  մտքէն: Լիվըրփուլ ակումբի  տնօրէնութիւնը կը մերժէ  հրաժարիլ  26-ամեայ  յարձակողէն: Լիվըրփուլ նախապէս  մերժեց Սուարէզի համար Արսենալի   35  միլիոն սթերլին առաջարկը:  Լոնտոնեան ակումբը  մտադրած է   40  միլիոն սթերլինի նոր առաջարկ մը  ներկայացնել:   Լիվըրփուլ ակումբի մարզիչ  Պրենտըն Ռոճըրզ յայտարարեց, թէ    ակումբը առնուազն 50 միլիոն սթերլին կը պահանջէ ուրուկուէյցի  յարձակողին համար:

Ռէալ Մատրիտի  մարժիչ Գառլօ Անճելոթի կերպով մը  վերջ տուաւ Սուարէզը հետապնդելու  խօսակցութիւններուն, յայտարարելով, թէ նոր մարզիկներու անհրաժեշտութիւն չզգար   խումբին մէջ: 

ԻՏԱԼԻՈՅ  ՖՈՒԹՊՈԼԻ ԱԽՈՅԵԱՆՈՒԹԵԱՆ  ՄԵԿՆԱՐԿԸ  24 – 25 ՕԳՈՍՏՈՍԻՆ

Իտալիոյ ֆութպոլի ախոյեանութեան  2013-124 տարեշրջանի  մրցումները պիտի սկսին  24 եւ 25  Օգոստոսին:  Ախոյեանութեան վերջին հանգրուանի  մրցումները տեղի պիտի  ունենան   18 Մայիս  2014-ին:

ԼԵՒՈՆ ԱՂԱՍԵԱՆ ԵՒՐՈՊԱՅԻ ԱԽՈՅԵԱՆ

 Հայաստանը ներկայացնող Լեւոն Աղասեան ոսկէ մետալ մը շահեցաւ  Իտալիոյ   Ռիէթի   քաղաքին մէջ  տեղի ունեցող  աթլեթիզմի  Եւրոպայի  պատանեկան  առաջնութեան  եռացատկի մրցումներուն:  Հայ աթլեթը արձանագրեց   16.01 մեթր արդիւնք:  Երկրորդ   դիրքի վրայ եկաւ  ֆինլանտացի  Քրիսթիան Փուլին՝  15.88 մեթր:

ՌՈՒՍԻԱ  ՎՈԼԻՊՈԼԻ ԱՇԽԱՐՀԻ ԱԽՈՅԵԱՆ

Ռուսիոյ  տղոց  հաւաքականը շահեցաւ  վոլիպոլի աշխարհի ախոյեանութեան տիտղոսը:  Աւարտական մրցումին, ռուսերը  3-0 արդիւնքով պարտութեան մատնեցին  Պրազիլը:  Ռուսիա, նախապէս՝ 2002-ին եւ 2011-ին շահած է  տիտղոսը:

 

LEAVE A REPLY

Please enter your comment!
Please enter your name here