ՍՈՒՐԻՈՅ ՔԻՒՐՏԵՐԸ ԻՆՔՆԱԿԱՌԱՎԱՐՄԱՆ ՍԱՀՄԱՆԱԴՐՈՒԹԻՒՆ ԿԸ ՄՇԱԿԵՆ

0
121

Քրտական աղբիւրներ Լոնտոնի մէջ լոյս տեսնող «Հայաթ» թերթին յայտնած են, որ քիւրտ մասնագէտներ եւ փաստաբաններ «Արեւմտեան Քիւրտիստանի ժամանակաւոր կառավարման սահմանադրութեան» նախագիծը ներկայացուցած են, որպէսզի անիկա քննուի քրտական եւ արաբական կուսակցութիւններուն կողմէ եւ անոր վերջնական տարբերակը Սուրիոյ մեծամասնութեամբ քիւրտերով բնակուած շրջանին մէջ հանրաքուէի դրուի:
Նախագիծը կը նախատեսէ ինքնակառավարման կառավարութիւն մը, որ բաղկացած է 21 նախարարութիւններէ, ներառեալ՝ պաշտպանութեան, ելեւմուտքի եւ ներքին, սակայն ոչ արտաքին: Կ՛առաջարկուի նաեւ ճշդել դրօշակ մը, ինչպէս եւ քայլերգ մը: Սուրիոյ հիւսիսարեւելքը գտնուող Գամիշլին պիտի ըլլայ շրջանին մայրաքաղաքը:
Ըստ «Արեւմտեան Քիւրտիստանի խորհրդարան»ի բանբեր Շիրզատ Եզիտիի՝ շրջանին մէջ նախատեսուած ինքնակառավարումը Սուրիոյ մէջ ժողովրդավարութեան եւ համակեցութեան բնորդ մը պիտի ըլլայ եւ շրջանի հարցերը պիտի վարէ ապակեդրոնացման սկզբունքին հիմամբ:
Մինչ այդ, քրտական ուժերը իսլամական ուժերուն հետ Յուլիս 21-ին գոյացած զինադուլի մը համաձայնութեան ծիրին մէջ ազատ արձակեցին «Իրաքի եւ Շամի իսլամական պետութիւն» կազմակերպութեան ղեկավար Ապու Մասաապը, որուն փոխարէն սուրիական ընդդիմադիր ուժերը խոստացան ազատ արձակել փոխանակման նպատակով իրենց պատանդ վերցուցած հարիւրաւոր քիւրտեր:
Քիւրտիստանի Աշխատաւորական  Կուսակցութեան Սուրիոյ մասնաճիւղի համանախագահ Սալիհ Միւսլիմ յայտարարած է, որ «Ժողովրդային ինքնապաշտպանութեան միաւորներ»ու ուժերը իրենց հսկողութեան տակ առած են Թուրքիոյ սահմանակից Սուրիոյ հիւսիսային շրջանները, որոնք ներկայիս քաղաքային ղեկավարներու հակակշիռին տակ են։ Միւսլիմ պնդած է, որ ծայրայեղ իսլամական խմբակներ կը մաքառին զինեալ ուժերու հետ եւ Սուրիա կ՛անցնին՝ աւելցնելով, թէ Թուրքիա պէտք չէ իրենց հարցերուն միջամուխ ըլլայ։
«Հիւսիսի մէջ Թուրքիան Քիւրտերու հետ համաձայնութիւն կնքելու փուլին հասած է. ասիկա լաւ բան է։ Բայց թող ձգեն, որ սուրիացիներն ալ իրենք իրենց համաձայնութեան մը յանգին։ Եթէ խառնուիլ կ՛ուզեն, մարդկային օժանդակութեան համար թող բանան իրենց սահմանները», ըսած է Միւսլիմ՝ աւելցնելով, որ Թուրքիոյ ապահովութեան սպառնացող կացութիւն մը չկայ։
«Չեմ հաւատար, որ Թուրքիոյ բանակը սահմանին վրայ գործողութիւն մը պիտի կատարէ։ Յարձակումը հիւսիսէն ըլլայ կամ հարաւէն, ժողովուրդը անպայման ինքնապաշտպանութեան պիտի դիմէ, բայց չենք փափաքիր, որ այդպիսի կացութիւն մը ստեղծուի», ըսած է Միւսլիմ եւ խստօրէն քննադատած է նաեւ Թուրքիոյ արտաքին գործոց նախարար Ահմետ Տաւութօղլուն, որովհետեւ ան շարունակաբար Սուրիոյ հարցերուն արտաքին միջամտութեան կոչեր կը կատարէ։ Միւսլիմ եզրակացուցած է ըսելով, թէ իրենց նպատակը Սուրիոյ մէջ քրտական պետութիւն մը հիմնելը չէ:
Յայտնենք, թէ քիւրտերը անցած շաբաթավերջին շրջանին մէջ գերեվարած են 13 զինեալներ, որոնցմէ վեցը՝ թուրք, իսկ մէկը չեչեն է:
Մինչ այդ, Թուրքիոյ բանակի սպայակոյտը հաստատեց, որ Քիւրտիստանի Աշխատաւորական Կուսակցութեան Սուրիոյ մասնաճիւղը գրաւած է Թուրքիոյ սահմանակից Ռասուլ Այն քաղաքը, իսկ Թուրքիոյ կառավարութիւնը վստահեցուց, որ հիւսիսային Սուրիոյ մէջ քրտական իշխանութիւն մը երբե՛ք պիտի չթոյլատրէ:

 

LEAVE A REPLY

Please enter your comment!
Please enter your name here