ՕՃԱԼԱՆ ՊԱՅՄԱՆՆԵՐՈՒ ԲԱՐԵԼԱՒՈՒՄ ԿԸ ՊԱՀԱՆՋԷ

0
152

Քրտամէտ Խաղաղութիւն եւ ժողովրդավարութիւն կուսակցութեան պատուիրակութիւն մը դարձեալ Իմրալըի բանտ այցելեց Կիրակի, Յուլիս 21-ին, տեսակցութիւն ունենալով հոն բանտարկուած քիւրտ ղեկավար Ապտուլլա Օճալանի հետ։ Պատուիրակները կուսակցութեան համանախագահ Սելահէտտին Տեմիրթաշն ու համանախագահի տեղակալ Փերվին Պուլտանն էին։ Որեւէ բացատրութիւն չտրուեցաւ, թէ այս երկու պատուիրակները ինչպէ՞ս Իմրալը գացին. միայն հաղորդուեցաւ, որ Օճալան նոր պահանջներ ներկայացուցած է եւ ըսած, որ եթէ այդ պահանջները իրականացուին, ինք աւելի ազդու կերպով նպաստ կրնայ բերել հաշտութեան գործընթացին։
Օճալան փափաքած է, որ իր հետեւեալ պատգամը փոխանցուի ժողովուրդին. «Նախ բարեւներս եւ սիրոյ զգացումներս կը հաղորդեմ։ Այն գործընթացը, որուն մեկնակէտ տուինք, կը շարունակուի իր ամբողջ ծանրութեամբ, լրջութեամբ եւ խորութեամբ։ Կը շարունակուին նաեւ պետութեան հետ հաստատուած մեր երկխօսութիւնն ու բանակցութիւնները։ Կ՛ուզեմ աւելիով նպաստել լուծման հանգրուանին, սակայն, դժբախտաբար, հոս կարելիութիւններս խիստ սահմանափակ են։ Այս պատճառով, չեմ յաջողիր իրականացնել յաւելեալ նպաստ բերելու իմ ցանկութիւնը։ Պէտք է շօշափելի քայլեր առնուին, որպէսզի կարենամ աւելի ազատօրէն արտայայտուիլ։ Կ՛ուզեմ յայտնել, որ անհանգիստ եմ իմ կարելիութիւններուս սահմանափակումէն։ Երբ Թուրքիոյ ամէն կողմը հրդեհ կայ, աւելի տրամաբանական կ՛ըլլայ, որ ստեղծուին այնպիսի պայմաններ, որոնց շնորհիւ ես առաւել կարենամ նպաստել հաշտութեան։ Կ՛ուզեմ, որ Իմրալըի մէջ մամլոյ ասուլիս մը սարքուի եւ ես ուղղակի խօսիմ մամուլին հետ, այն ատեն հաշտութեան գնացքը աւելի առողջ կ՛ըլլայ։ Կառավարութիւնը պէտք չէ վարանի այսպիսի սովորական քայլեր առնելէ։ Ի վերջոյ, 50 հազար հոգիի մահուան պատճառ դարձած 40 տարուան կռիւի մը հաշտութիւնը կառուցանել կ՛աշխատինք»։
Ան ուզած է նաեւ, որ Թուրքիոյ խորհրդարանը աւելի շօշափելի քայլեր առնէ հաշտութեան երկրորդ շրջանը աւարտելու ու երրորդին ճամբայ հարթելու նպատակով։
Միւս կողմէ, թրքական նամուլը հաղորդեց, թէ Քիւրտիստանի Աշխատաւորական Կուսակցութիւնը հրապարակած է հաղորդագրութիւն մը, որ Թուրքիոյ կառավարութեան կը փոխանցէր «վերջին զգուշացում» մը՝ որդեգրելու քրտական հարցի լուծման հոլովոյթը յառաջ մղելու շօշափելի քայլեր:
Մինչ քիւրտերու ու պետութեան միջեւ հաշտութեան գործընթացը կը շարունակուի հազիւ տեսանելի կշռոյթով, գործընթացը գրեթէ ամէն օր կը ցնցուի նոր արգելքով։ Քիւրտերը, որոնց թարգման կը հանդիսանայ Խաղաղութիւն եւ ժողովրդավարութիւն կուսակցութիւնը, կը պնդեն, թէ քրտաբնակ շրջաններուն մէջ պահականոցներու շինութիւնը կը հակասէ հաշտութեան գործընթացի ոգիին։ Այս նպատակով, քրտամէտ կուսակցութիւնը Յուլիս 21-ին բողոքի ցոյց մը կատարեց նոր պահականոցի մը շինութեան դէմ։ Ցուցարարները քալեցին մինչեւ շինութեան վայրը ու հոն Օճալանի նկարը կախեցին եւ ցոյցեր ըրին։ Կուսակցութեան Տիարպեքիրի կազմակերպութեան նախագահ Զիւպէյտէ Զիւմրիւթ ըսաւ. «Մենք ժողովուրդին խոստացած ենք, որ Քիւրտիստանի այս հողատարածքին վրայ, ո՛ւր ալ պահականոց մը շինուի, մենք դէմ պիտի գանք ու պիտի չարտօնենք, որ կառուցուի այդ պահականոցը։ Վեց ամիսէ ի վեր շարունակուող հաշտութեան գործընթացին դէմ է այսպիսի պահականոցներու շինութիւնը»։
Իր կարգին, կուսակցութեան Էլազիկի կազմակերպութեան նախագահ Թուրան Չելիք ըսաւ, որ կառավարութիւնը պէտք է կառուցէ հիւանդանոց, գործարան ու ճամբայ, այլ ոչ թէ պահականոց։ Ան աւելցուց, թէ Օճալան պէտք է ապրի Քիւրտիստանի կեդրոնը հանդիսացող Ամէտի (Տիարպեքիր) մէջ:

 

LEAVE A REPLY

Please enter your comment!
Please enter your name here