ԼԻԲԱՆԱՆԵԱՆ ԿԱՐՃ ԼՈՒՐԵՐ

0
109

– Լիբանանի մօտ Բրիտանիոյ դեսպան  Թոմ Ֆլեչըրի  շքախումբին մաս կազմող ինքնաշարժ մը արկածի  ենթարկուեցաւ  Ռապիէյի մէջ, Միշէլ Աունի  բնակարանէն  դուրս գալու միջոցին: Հանդիպումէն ետք, դեսպանը յայտեց, թէ Բրիտանիա կը փափաքի   զօրակցիլ լիբանանեան բանակին եւ  օժանդակութիւններ  հայթայթել Լիբանանին՝  նպաստելով գաղթականներու տագնապը լուծելու անոր  ճիգերուն:

 – Հանրապետութեան նախագահ Միշէլ Սըլէյման երկօրեայ այցելութեամբ,  3 Օգոստոսին  պիտի մեկնի Թեհրան, մասնակցելու  Իրանի  նորընտիր նախագահ Հասան Ռոհանիի  երդմնակալութեան արարողութեան:

– Ապահովական աղբիւրներ   բացայայտած են Պիր ԷլԱպըտի պայթումին յանցագործներուն անունները: Ամբաստանեալները այժմ  ապաստանած  են  Այն Հելու  գաղթակայանը:  Հետաքննութիւնները կը շարունակուին:

– Մուսթաքպալ Հոսանքը վերջնականապէս  կողմնորոշուած  է  երկարաձգելու   բանակի ընդհանուր հրամանատար զօրավար Ժան Քահուաճիի պաշտօնավարութեան  ժամկէտը:   Հոսանքը  միաժամանակ  հերքեց   Սաատ Հարիրիի Պէյրութ  վերադառնալու մասին տեղեկութիւնները:

– Լրատուական աղբիւրներ կը    հաղորդեն, թէ Նահարի  գետի  ծովահայեաց շրջաններուն մօտ, Սուքլին  ընկերութեան եւ  «Մասլախ»ի շրջանին միջեւ  յայտնաբերուած են  վտանգաւոր կոկորդիլոսներ:  Վերադաս մարմիններ քաղաքացիներուն կը  թելադրեն  չայցելել այդ  շրջանները, իսկ  մարդակերներուն հանդիպելու պարագային, չսպաննել զանոնք..:

–  Սուրիական   իշխանութիւնները լիբանանեան իշխանութիւններուն յանձնեցին  սուրիացի  քաղաքական  մեկնաբան  Մուհամմէտ Տառար Ճամոյի  կողակիցը՝ Սուհամ Եունէսը:  Սուրիական իշխանութիւնները  ձերբակալած են Եունէսի  եղբայրը եւ  քրոջ զաւակը: Վերջիններս կ’ամբաստանուին  Ճամոյի սպանութեամբ: Կառավարութեան մօտ զինուորական ատեանի դատախազ Սաքր Սաքր անմիջապէս հարցաքննութեան  ենթարկեց  Սուհամ Եունէսը:

– Իսրայէլեան  «Մաարէֆ»  օրաթերթը կը գրէ, թէ   Հըզպալլան  ահաբեկչական ցուցակի մէջ   ներառնելու  աշխատանքները  սկսած են տասնամեակ մը առաջ:  Օրաթերթը  կ’ընդծգէ, թէ Ֆրանսա մնայուն կերպով  ընդդիմութիւն յայտնած է  իսրայէլեան  քայլերուն: 

– Լիբանանի մէջ սպառողական  իրերու սակը  Դեկտեմբեր  2007-էն մինչեւ անցնող Յունիս ամիսը  28.5 առ հարիւրի մագլցում  մը արձանագրած  է:  Իսկ դրամայորդումը անցեալ տարուան Յունիսէն մինչեւ այստարուան  Յունիսը կը գնահատուի  8.8 առ հարիւր: 

–   Ընկերվար  Յառաջդիմական Կուսակցութեան պետ Ուալիտ Ճոմպլաթ   ընդունեց  Լիբանանի  մօտ Ֆրանսայի դեսպան  Փաթրիս  Փաուլին եւ  անոր հետ  քննարկեց  ներլիբանանեան բեմի վերջին զարգացումները:

– Պաշտպանութեան  Գերագոյն Խորհուրդը  Երկուշաբթի օր Պաապտայի պալատին մէջ  հանրապետութեան նախագահ Միշէլ Սըլէյմանի գլխաւորութեամբ պիտի գումարէ նիստ մը  եւ  քննարկէ  երկրին ապահովական վիճակը, ինչպէս նաեւ  Սուրիացի գաղթականներուն թղթածրարը:

– Խորհրդարանի նախագահ  Նեպիհ Պըրրի Այն Էլ Թինէ այցելող երեսփոխաններուն առջեւ  շեշտեց  խորհրդարանի լիագումար նիստը  ճիշդ   ժամկէտին  կայացնելու անհրաժեշտութիւնը:

LEAVE A REPLY

Please enter your comment!
Please enter your name here