ՔԻՄԻԱԿԱՆ ԶԷՆՔԵՐՈՒ ԳՈՐԾԱԾՈՒԹԻՒՆԸ ՀԵՏԱՔՆՆՈՂ ՄԱԿ-Ի ՊԱՏՈՒԻՐԱԿՈՒԹԻՒՆԸ ԺԱՄԱՆԵՑ ԴԱՄԱՍԿՈՍ

0
111

Սուրիոյ մէջ   քիմիական զէնքերու  գործածութեան  հետաքննութիւնները   վարելու  լիազօրուած՝ Աքէ Սելսթրոմի գլխաւորած  ՄԱԿ-ի պատուիրակութիւնը ժամանեց Դամասկոս: Պատուիրակութեան անդամները  իրենց  Երկօրեայ կեցութեան ընթացքին,     հետաքննութիւններ պիտի վարեն, բացայայտելու՝  հակամարտութեան ընթացքին  քիմիական զէնք   օգտագործող  կողմին ինքնութիւնը:

Ռուսիոյ արտաքին գործոց  նախարար Սերկէյ  Լաւրով դիտել տուաւ, թէ  Մոսկուա նախանձախնդիր կը մնայ   Սուրիոյ մէջ  քիմիական  զէնքի  օգտագործման  իւրաքանչիւր   դէպքի հանդէպ:

ՄԱԿ-ի ընդհանուր քարտուղարի  խօսնակ   Մարթին   Նեսիրքի   յայտնեց, թէ  « Ժընեւ – 2» խորհրդաժողովը տեղի պիտի չունենայ  մօտիկ ապագային:   Ուաշինկթընի մէջ, Սպիտակ Տան խօսնակ Ճէյ Գառնի  յայտարարեց, թէ Միացեալ Նահանգներ  չի կրնար   Պաշշար Ասատը հանդուրժել  իբրեւ  Սուրիոյ  նախագահ.«  Մեր կոշտ դիրքորոշումը  կը  կայանայ այն բանին մէջ,  որ սուրիացի ժողովուրդը  չարտօնէ, որպէսզի Պաշշար Ասատը ապագային   դառնայ իր  ղեկավարը եւ մենք   չենք կրնար  այս մէկը  հանդուրժել» ըսաւ  խօսնակը:  Իրաքի արտաքին գործոց նախարար Հոշիար Զիպարի   հաւաստեց,թէ նախագահ Պաշշար Ասատ   մօտիկ ապագային պիտի յաջողի  չէզոքացնել  ծայրայեղականներու  ըմբոստութիւնը:

Անգարա  բաւական   լուրջ  մտահոգութեամբ  կը հետեւի  հիւսիսային  Սուրիոյ զարգացումներուն: Թուրքիոյ արտաքին գործոց նախարար  Ահմէտ Տաւուտօղլու  զգուշացուց  Սուրիոյ հակամարտութիւնը Թուրքիոյ մէջ  տարածուելու հետեւանքներէն: Ան   յայտնեց, թէ Թուրքիա կը  մերժէ սահմանակից հողերու վրայ   ինքնավար քրտական շրջանի մը իրողութիւնը: Նշենք, թէ հիւսիսային Սուրիոյ  քիւրտերը  ծրագրած են յառաջիկայ   քանի մը  օրերուն ընթացքին  ինքնավարութիւն յայտարարել  իրենց գտնուած  շրջաններուն մէջ:  Թուրքիոյ ոխվարչապետ  Պիւլէնթ Առընչ յայտնեց, թէ  թրքական իշխանութիւնները   չեն պատրաստուիր  ներխուժելու  Սուրիոյ  սահմանամերձ շրջանները:

Ռազմական գետնի վրայ, բրիտանական «Տէյլի Թելեկրաֆ» օրաթերթը  կը գրէ, թէ   Սուրիոյ բանակէն նախապէս  հեռացած դասալիքներ, սկսած են վերադառնալ  բանակին շարքերը:

Ապահովական գետնի վրայ,   23 Յուլիսի առաւօտեան ժամերուն,  երկու օթոպիւսներ  Հալէպէն Պէյրութ ուղեւորութեան ընթացքին դարձան ծայրայեղական զինեալներու  թիրախ:

Քանի մը ժամ օթոպիւսները  կը շարունակեն ճամբան մերթ ընթանալով, մերթ կանգ առնելով: Այսպէս, մինչեւ կէսօրուան ժամը երեք, երբ երկու օթոպիւսերուն  վրայ կը սկսի փամփուշտի տարափ, որուն կը յաջորդէ հրասանդերու տեղատարափը:

Օթոպիւսներուն  կային 16 հայ ուղեւորներ, որոնցմէ 14-ը արիւնլուայ կը հասնին Հալէպ եւ կը տեղաւորուին երեք հիւանդանոցներու մէջ՝ Ալթունեան, Ռազի եւ Պետական Համալսարանի հիւանդանոցը, իսկ երկուքը կը փոխադրուին դէպքի վայրին մօտակայ գիւղերէն մէկուն հիւանդանոցը: Վիրաւորներէն երկուքին պարագան մտահոգիչ է:

Վիրաւորներէն մէկը՝ Թամար Վարվառեան-Սրուրեան  մահացաւ: Ան երկու զաւակի մայր է: Հալէպ հասած վիրաւորներուն մեծ մասը՝ հարկաւոր դարմանումը ստանալէ ետք կը վերադառնան իրենց տուները: Ճամբորդներուն մէջ էին Հալէպէն Կիլիկիոյ Կաթողիկոսարանի Դպրեվանք մեկնող հինգ նորագիր սաներ (12-15 տարեկան): Հալէպի Շտապ Օգնութեան Գործադիր Մարմնի անդամները կը փութան երեք հիւանդանոցները եւ ամէն ձեւ կը փորձեն օգտակար դառնալ:

LEAVE A REPLY

Please enter your comment!
Please enter your name here