ԴԱՄԱՍԿՈՍ ԿԸ ԴԱՏԱՊԱՐՏԷ ՈՒԱՇԻՆԿԹԸՆԻ ԵՐԿԱԿԻ ՔԱՅԼԵՐԸ

0
116

Միացեալ Նահանգներու  զօրքերու միացեալ շտապի պետ, զօրավար Մարթին Տեմփսի  զգուշացուց  Սուրիոյ  մէջ  զինուորական  միաջմտութեան հետեւանքներէն:  Ան նշեց, թէ չուսումնասիրուած որեւէ քայլի  ճակատագիրը պիտի  ըլլայ   ձախողութիւն:   Ան նշեց,  թէ  բացի  զինուորական  տարբերակէն, կարելի է  տարբեր  միջոցներով  օգնել սուրիացի  ժողովուրդին:

Փարիզի մէջ  Ֆրանսայի նախագահ Ֆրանսուա Հոլանտ  ընդունեց   Սուրիոյ  ընդդիմադիր ուժերու    նորընտիր  ղեկավար  Ահմէտ  Ճարպօն:  Հանդիպումէն ետք,  Հոլանտ  յայտարարեց, թէ   Սուրիոյ ընդդիմութիւնը  ոչ մէկ ընդհանուր կէտ ունի   ծայրայեղականներուն հետ.« Սուրիոյ   ընդդիմութիւնը կը պայքարի  նախագահ Պաշշար Ասատի վարչակարգին դէմ եւ  ոչ մէկ ընդհանուր կէտ ունի   ծայրայեղականներուն հետ, որոնք սեփական նպատակներու համար կ’օգտուին ստեղծուած  վիճակէն» դիտել տուաւ ան:  Հոլանտ   իր հիւրին   առջեւ ընդգծեց, թէ  Ֆրանսա նախկինին նման  զինուորական միջամտութիւն չի պահանջեր  Սուրիոյ հակամարտութեան պարագային, փոխարէնը՝  կ’առաջարկէ  քաղաքական  լուծում:  

Սուրիոյ  ներքին գործոց նախարար  Մուհամմէտ Ալ Շաար  դիտել տուաւ, թէ  ահաբեկչական  կազմակերպութիւնները  մեծ   ծառայութիւն կը մատուցեն սիոնական  պետութեան եւ  Միացեալ Նահանգներուն: Միւս կողմէ, Սուրիոյ արտաքին գործոց  նախարարութիւնը խստօրէն դատապարտեց  Ուաշինկթընի  կիրարկած  երկակի  քաղաքականութիւնը:  Նախարարութեան կողմէ   լոյս ընծայուած  հաղորդագրութիւնը    յայտնեց թէ  Միացեալ Նահանգներ  պարկեշտ չէ  քաղաքական լուծում  փնտռելու իր  ճիգերուն մէջ:

Ֆրանսական իշխանութիւնները ձերբակալեցին  47-ամեայ   քաղաքացի մը, որ կը  պատրաստուէր  Սուրիա  մեկնիլ, միանալու՝ կառավարական զօրքերու դէմ  յայտարարուած  ճիհատին:

Լեհաստանի արտաքին գործոց  նախարարութիւնը  հաղորդեց, թէ ծայրայեղականները   Չորեքշաբթի  օր առեւանգած են   լեհ  լրագրող  Մարցինա Սուտէրը:

Ռազմական գետնի վրայ  բանակը  շարունակեց  Հոմսի կարգ մը  շրջաններու մէջ խուզարկութիւնները:

LEAVE A REPLY

Please enter your comment!
Please enter your name here