ՔԱՂԱՔԱԿԱՆ ՈՒԺԵՐԸ ՆԵՑՈՒԿ ՉԵՆ ԿԵՆԱՐ ՍԱԼԱՄԻՆ

0
126

Նորանշանակ վարչապետ  Թամամ Սալամ  բողոքեց, որ  քաղաքական  ուժերը  նեցուկ  չեն կենար կառավարութիւն  կազմելու իր  ճիգերուն: Ան նշեց, թէ   իւրաքանչիւր  խմբաւորում  հետամուտ դարձած է  սեփական շահերու պաշտպանութեան, իւրաքանչիւրը  ունի  շրջանային դաշինքներ եւ դաշնակիցներ, յանձնառութիւններ, որոնք կը  դժուարացնեն կառավարութեան կազմութիւնը: Սալամ հաւաստեց, թէ   Նեպիհ Պըրրի վստահաբար  պիտի մերժէ  առանց  Հըզպալլայի եւ  Միշէլ Աունի  մասնակցութեամբ որեւէ կառավարութիւն:  Սալամ, Մըսայթպէյի իր  բնակարանին  մէջ  ընդունեց  Լիբանանեան Ուժեր Կուսակցութեան գործադիր խորհուրդի պետ Սամիր Ժաաժայի  ներկայացուցիչ  նախկին նախարար  Թոնի Քարամը եւ  Լիբանանի մօտ Հոլանտայի դեսպան Հէր  Էլճիթ Տիպորը:

Հրաժարեալ  վարչապետ Նեժիպ Միքաթի  դիտել տուաւ, որ  միջազգային  օրինականութիւնը  իսրայէլեան բռնատիրութեան դէմ   պայքարելու իրաւասութիւն կը շնորհէ  Դիմադրութեան:  Միքաթի անգամ մը եւս  շեշտեց,թէ Լիբանան պիտի աշխատի համոզել Եւրոպական Միութեան անդամ պետութիւնները՝ վերանայելու  իրենց որոշումին:  Միքաթի ընդունեց  Լիբանանի մօտ Դանիոյ դեսպան Իան  Թոփ Քրիսթընսընը:  Վերջինս իր պաշտօնավարութեան  ժամկէտը աւարտելու  առիթով հրաժեշտի  փրոթոքոլային այցելութիւն կու տայ իշխանութեան  ներկայացուցիչներուն:  Միքաթի նաեւ ընդունեց  տեղեկատուութեան հրաժարեալ նախարար  Ուալիտ Տաուաքը եւ  երեսփոխան Սիմոն Ապի Ռամիան:

Խորհրդարանի նախագահ Նեպիհ Պըրրի Այն Էլ Թինէի մէջ ընդունեց  Պելճիքայի արտաքին գործոց նախարարութեան յատուկ  պատուիրակ Մարք Օթին եւ անոր հետ քննարկեց   Լիբանան ապաստանած սուրիացիներուն մարդասիրական  օգնութիւն հայթայթելու կարելիութիւնները:

LEAVE A REPLY

Please enter your comment!
Please enter your name here