Քննարկելով Երեւան Կատարուելիք Յաջորդ Այցելութեան Մանրամասնութիւնները. Նախարար Սապունճեան Ընդունեց Հայաստանի Դեսպան Աշոտ Քոչարեանն Ու Ճարտարարուեստի Սեփականատէրերու Միութեան Պատուիրակութիւնը

0
98

«Քննարկեցինք Երեւան կատարուելիք յառաջիկայ այցելութեան եւ Հայաստանի հետ տնտեսական գործակցութեան ապագայ փուլերը, որոնց հիմնաքարերը դրուած էին նախագահ Սլէյմանի Հայաստան կատարած այցելութեան ընթացքին», յայտարարեց ճարտարարուեստի նախարարի պաշտօնակատար Վրէժ Սապունճեան երէկ` ակնարկելով յառաջիկայ սեպտեմբերին լիբանանեան ճարտարարուեստական պատուիրակութեան մը Երեւան կատարելիք այցելութեան:

Ճարտարարուեստի սեփականատէրերու միութեան պատուիրակութեան այցելութիւնը ընդունելով` նախարար Սապունճեան քննարկեց լիբանանցի ճարտարարուեստի սեփականատէրերու յառաջիկայ այցելութիւնը Երեւան, ուր պիտի արծարծուի լիբանանեան արտադրութեանց նոր շուկաներ հայթայթելու կարելիութիւնը Հայաստանի եւ մերձակայքի` Ռուսիոյ ու Վրաստանի մէջ, «ուր կ՛ապրին շուրջ 2,5 միլիոն հայեր, որոնք յարատեւ կապի մէջ են իրենց հայրենիքին հետ»:

Խորհրդակցութիւնները ընդգրկեցին նաեւ նախարար Սապունճեանի նախաձեռնութեամբ իրականացած «Միտըլ Իսթ» ընկերութեան Պէյրութ – Երեւան ուղիղ թռիչքը եւ անոր ընձեռած դիւրութիւնները տնտեսական թէ ճամբորդական գործակցութեանց իմաստով: Պատուիրակութեան նախագահ Նաամաթ Ֆրամ յոյս յայտնեց, որ կարելի ըլլայ լիբանանեան արտադրութեանց շահաբաժիններու մաքսատուրքերը յիսուն առ հարիւրով նուազեցնել:

Միւս կողմէ, Սապունճեան ընդունեց Լիբանանի մէջ Հայաստանի դեսպան Աշոտ Քոչարեանը եւ անոր հետ խորհրդակցեցաւ Երեւան այցելութեան շուրջ: Խօսակցութիւնները ընդգրկեցին յառաջիկայ աշնան լիբանանեան ճարտարարուեստական պատուիրակութեան Երեւան այցելութիւնն ու այս գծով փոխադարձ գործակցութեան կարելիութիւնները: Նմանապէս շեշտուեցան Պէյրութ – Երեւան – Պէյրութ «Միտըլ Իսթ» ընկերութեան ուղիղ թռիչքները, որոնք դրական  անդրադարձ կ՛ունենան նաեւ զբօսաշրջութեան մարզին մէջ: Հանդիպումին արծարծուեցաւ նաեւ շրջանային եւ լիբանանեան այժմու իրավիճակն ու Հայաստան – սփիւռք փոխադարձ գործակցութիւնը:

 

LEAVE A REPLY

Please enter your comment!
Please enter your name here