Երեւանի Քաղաքապետը Կասեցուց Ուղեվարձի Բարձրացման Մասին Որոշումը

0
104

Ըստ Երեւանի քաղաքապետարանի կայքէջին վրայ հրապարակուած տեղեկատուութեան, Երեւանի քաղաքապետ Տարօն Մարգարեան կասեցուց հասարակական փոխադրամիջոցներու վարձքի բարձրացման մասին որոշումը:

Քաղաքապետը յայտարարեց, որ ինք արդէն յանձնարարած է ստեղծել մասնագէտներէ եւ շահագրգիռ անձերէ կազմուած յանձնախումբ մը, որ քանի մը ամիսներու ընթացքին պէտք է մշակէ բոլոր այն մեքանիզմները, որոնք թոյլ կու տան ամբողջական դարձնել «Երեւան քաղաքի ներքաղաքային փոխադրամիջոցներու վարձքը վերատեսութեան ենթարկելու մասին» որոշումը:

«Մենք ուշադիր կը հետեւինք նաեւ այս օրերուն մայրաքաղաքի կանգառներուն մէջ մեր երիտասարդներուն կողմէ կազմակերպուող ցոյցերուն եւ հնչող կոչերուն: Ինծի կ՛ուրախացնէ այն ջերմութիւնը, որ այսօր կրկին կայ երեւանցիներուն միջեւ իրարու օգնելու, իրարու նկատմամբ աւելի հոգատար ըլլալու առումով: Այս ջերմութիւնը արժէք է, զոր պէտք է կարենանք պահել մեծ ու մնայուն գործել կատարելու համար: Միեւնոյն ժամանակ կ՛ափսոսամ երբեմն-երբեմն նկատուող տգեղ վերաբերմունքէն մեր վարորդներուն նկատմամբ. իրականութեան մէջ ծանրագոյն աշխատանք կատարող ու ոչ համապատասխան վարձատրութիւն ստացող այդ անձերը մեծագոյն յարգանքի արժանի են: Չկայ մենք-դուք: Կայ հինաւուրց մայրաքաղաքը եւ կանք մենք` բոլորս: Ու մենք միասին արժանի ենք Երեւանին հատուցելու», ըսուած է քաղաքապետի յայտարարութեան մէջ:

Ասիկա կը նշանակէ, որ սակագինը այլեւս 150 դրամ չէ, այլ` 100:

Այս ուղերձին նախորդած էր Երեւանի աւագանիի խմբակցութիւններուն հետ Մարգարեանի հանդիպումը, իսկ օրուան առաջին կիսուն վարձքի բարձրացման ու անոր յարուցած հասարակական ընդվզումներուն մասին կառավարութեան նիստին անդրադարձած էր վարչապետ Տիգրան Սարգսեան: «Մենք կը նկատենք, որ ասիկա մարդոց ինքնաբուխ շարժում է, որ կուսակցական բնոյթ չունի` հակառակ անոր, որ վերջին օրուան իրադարձութիւնները ցոյց տուին, որ որոշ կուսակցութիւններ կը ցանկան առիթէն օգտուիլ: Բայց բուն պատճառը քաղաքապետարանի որոշումն է` փոխադրամիջոցներու սակագիներու փոփոխութեան վերաբերեալ», ընդգծեց Տիգրան Սարգսեան:

Ըստ վարչապետին, այս շարժումը կը կրէ նաեւ ընկերային բնոյթ ` ընկերային համերաշխութեան, արդարութեան, աղքատութեան դէմ:

«Մենք ձեզի հետ միասին կը տեսնենք, որ Հայաստանի մէջ կը ձեւաւորուի ուժեղ քաղաքացիական հասարակութիւնը եւ մենք ձեզի հետ միասին պարտաւոր ենք հաշուի առնել այս իրողութիւնը` պետական որոշումներ տալու ընթացքին: Եւ պէտք է շատ ուշադիր ըլլանք քաղաքացիական հասարակութեան ձեւաւորման բոլոր խնդիրներուն շուրջ», ընդգծեց վարչապետ Տիգրան Սարգսեան: Դիմելով կառավարութեան անդամներուն` վարչապետը յայտնեց, որ ինք միշտ կը պահանջէ կառավարութենէն, որ մեծ զանգուածներուն հետ առնչուող որոշումները անպայման քննարկուին հանրութեան հետ, անպայման ներգրաւուին հասարակական կազմակերպութիւններու ներկայացուցիչները:

 

LEAVE A REPLY

Please enter your comment!
Please enter your name here